ەل ىشىندەگى ەلەنبەي جۇرگەن ونەر يەسى مەن قولى ەپتى ىسمەرلەردىڭ جانە كوشباسشى جاستاردىڭ تانىلۋىنا جول اشقان وسى فەستيۆالدە ءان شىرقالىپ, كۇي تارتىلدى. وتتى جىر وقىلىپ, فوتوسۋرەت بايقاۋى دا ءوتتى. ۇزدىكتەر انىقتالىپ, توپجارعاندار وبلىس اكىمىنىڭ قولىنان ماقتاۋ قاعاز بەن باعالى سىيلىقتار الدى. وسى كۇنى «Jetisy Style» جاستار فەستيۆالىنە جينالعاندار عانا ەمەس, جالپاق جەتىسۋلىقتاردىڭ تاڭدايىن قاقتىرعان قولونەر يەسىنىڭ اتىنا قانىق بولدىق.
نۇرلان جارتىبەكوۆ ەسىمدى جاس جىگىت ناعىز توقىماشى ەكەن. ول – ىلمەكتەپ توقۋدان الەم رەكوردىن جاڭارتقان جەرلەسىمىز. قاپشاعاي قالاسىنداعى «بالداۋرەن» رەسپۋبليكالىق وقۋ-ساۋىقتىرۋ ورتالىعىندا توقىما پانىنەن ءدارىس بەرەتىن نۇرلان ىلمەكتەپ توقۋ ونەرى بويىنشا دۇنيە ءجۇزىنىڭ شەبەرلەرىن شاڭ قاپتىرىپتى. مىسالعا, قولىڭىزداعى توقىماڭىزدى كوزىڭىزدى جۇمىپ وتىرىپ جاساي الاسىز با؟ مۇمكىن ەمەس پە؟ ال نۇرلان ارنايى مامانداردىڭ الدىندا كوزىن تارس بايلاپ الىپ رەكورد جاساعان. ەپتىلىك پەن ساتتىلىكتىڭ جارىسىندا ول 1 مينۋتتا 56 رەت ىلمەك توقىپ, حاس شەبەرلەردىڭ قاسىن كەرگىزىپتى. ءارى بۇل جاس توقىماشىنىڭ جالعىز جەتىستىگى ەمەس. جاقىندا عانا نۇرلان جاڭا رەكورد جاسادى. بۇل جولعىسى تىپتەن عاجاپ. ىلمەكتەپ توقۋدىڭ شەبەرى 72 ساعات بويىنا توقتاماستان جۇمىس ىستەپ, يىرىلگەن جۇننەن شارف توقىپ شىقتى. توقىعان مويىنوراماسىنىڭ ۇزىندىعى 35 مەترگە جەتتى. بۇل – الەمدەگى ايگىلى توقىما شەبەرلەرىنىڭ ءوزى مۇنشالىقتى از ۋاقىت ىشىندە قول جەتكىزبەگەن جەتىستىك ەكەن.
دەمەك, 72 ساعاتتا 35 مەتر ءتۇبىت بوكەباي توقىعان نۇرلان جارتىبەكوۆ ناعىز رەكوردشى ەمەس پە؟ توقىماشى جىگىتتىڭ ەڭبەگىن ەسكەرگەن الماتى وبلىسىنىڭ اكىمى اماندىق باتالوۆ وعان ارنايى ديپلوم مەن ستاتۋەتكا سىيلادى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
