ناقتى ايتساق, ەلباسىنىڭ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىندە ايتىلعان «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنت جاستاردىڭ جاتاقحاناداعى جاعدايىن جاقسارتۋ» باستاماسى اۋليەاتا وڭىرىندە ورىندالۋدا.
تاراز قالاسىنداعى جامبىل داڭعىلىنىڭ بويىندا ورنالاسقان «تاراز» قوناقۇيى بۇدان بىلاي تاراز يننوۆاتسيالىق-گۋمانيتارلىق ۋنيۆەرسيتەتىنىڭ جاتاقحاناسى بولادى. وتكەن عاسىردىڭ الپىسىنشى جىلدارى سالىنعان بۇل عيماراتتىڭ جالپى اۋماعى 7656,2 شارشى مەتردى قۇرايدى. اتالعان ۋنيۆەرسيتەت «تاراز» قوناقۇيىن ءوز قاراجاتىنا ساتىپ الىپ, عيماراتتىڭ كەي بولىكتەرىندە جوندەۋ جۇمىستارىن باستاپ تا كەتىپتى. ۋنيۆەرسيتەتتىڭ تاربيە جانە ستراتەگيالىق دامىتۋ جونىندەگى پرورەكتورى سانات اشىربەكوۆ الداعى ۋاقىتتا بۇل عيماراتتىڭ 400 ورىندىق ستۋدەنتتەر ۇيىنە اينالاتىنىن ايتادى.
بيىلعى جىلدىڭ وزىندە 200 ستۋدەنت جاتاقحانا الۋعا سۇرانىس بەرىپتى. ال كۇزگە قاراي تاعى 160 ستۋدەنتتى ۇيمەن قامتۋ جوسپارلانۋدا. بۇل ماسەلە كەزەڭ-كەزەڭىمەن شەشىمىن تابادى.
سانات اشىربەكوۆتىڭ ايتۋىنشا, ۋنيۆەرسيتەت باسشىلىعى العاشىندا ستۋدەنتتەرگە ارناپ جاتاقحانا سالۋدى جوسپارلاعان ەكەن. الايدا تاڭداۋ تالاي جىل بويى كوپشىلىككە قىزمەت كورسەتىپ كەلگەن «تاراز» قوناق-ۇيىنە ءتۇسىپتى. بۇگىندە اتالعان ۋنيۆەرسيتەتتىڭ اكىمشىلىك-شارۋاشىلىق قىزمەتكەرلەرىنىڭ اتسالىسۋىمەن نىساننىڭ ەكىنشى جانە ءۇشىنشى قاباتتارىنا اعىمدىق جوندەۋ جۇمىستارى جۇرگىزىلۋدە. بۇل جۇمىس كۇز مەزگىلىندە اياقتالسا, ودان كەيىن نىساننىڭ شاتىرىن تولىق جاڭالاۋ ءۇشىن 200 ميلليون تەڭگە كولەمىندە قاراجات قاراستىرۋ كوزدەلۋدە. شاتىرى تولىق جوندەۋدەن وتكەن سوڭ ءتورتىنشى جانە بەسىنشى قاباتتارمەن قاتار, نىساننىڭ وزگە دە بولىكتەرى قايتا جاڭعىرتىلادى. قوناقۇيدىڭ ءار قاباتىنداعى 40 بولمەنىڭ ارقايسىسىن ەكى ادامدىق بولمە رەتىندە جابدىقتاۋ جوسپارلانۋدا. تاراز يننوۆاتسيالىق-گۋمانيتارلىق ۋنيۆەرسيتەتىنە شەتەلدەن جانە ەلىمىزدىڭ وزگە وڭىرلەرىنەن كەلىپ قىزمەت اتقارىپ جۇرگەن عالىمدار مەن پروفەسسورلاردى, سونداي-اق جاس مامانداردى اتالعان وقۋ ورنى وسى ۋاقىتقا دەيىن قىزمەتتىك پاتەرلەرمەن قامتىپ كەلگەن. ەندى قايتا جاڭعىرتىلىپ جاتقان جاتاقحانادان ولارعا بولمەلەر بەرىلەدى ەكەن.
بۇرىنعى «تاراز» قوناقۇيى, بۇگىنگى تاراز يننوۆاتسيالىق-گۋمانيتارلىق ۋنيۆەرسيتەتىنىڭ جاتاقحاناسىندا ستۋدەنتتەردىڭ ءوزىن-ءوزى دامىتۋعا ارنالعان كابينەتتەر, ساباققا دايىندالۋ, پسيحولوگيالىق كومەك كورسەتۋ بولمەلەرى, ينتەرنەت-كافە, كىتاپحانا, سپورتزال جانە ءتۇرلى ۇيىرمەلەر اشىلادى. مۇنىڭ ءبارى جاستاردىڭ بوس ۋاقىتىن ءتيىمدى پايدالانۋىنا, سونىمەن قاتار ءوزىن-ءوزى دامىتۋىنا سەپتىگىن تيگىزبەك. جاتاقحانادا تۇرۋ اقىسى ستۋدەنتتەرگە قولايلى, وڭىردەگى وزگە وقۋ ورىندارىنداعى جاتاقحانا باعاسىنان اسپايتىن دەڭگەيدە بەلگىلەنەتىن بولادى.
حاميت ەسامان,
«ەگەمەن قازاقستان»
جامبىل وبلىسى
