ءدۇبىرلى جىر بايگەسىنە ايتىسسۇيەر قاۋىمعا تانىمال وت اۋىزدى, وراق ءتىلدى سۋىرىپ سالما 12 اقىن ولەڭمەن ورنەكتەلگەن ءسوز جارىسىن قىزدىردى.
سوزگە جۇيرىك, ويعا تاپقىر, شاشاسىنا شاڭ تيمەس كىلەڭ جۇيرىكتەر كونەدەن كەلە جاتقان ونەرىمىزدى جاڭا قىرىنان ۇلىقتاپ, تاۋەلسىزدىكتىڭ ارايلى تاڭىن, ەل بىرلىگىن جىرعا قوستى. ءبىرىن-ءبىرىن ءزىلسىز قالجىڭدارمەن تۇيرەپ, ءازىل ارالاس شۋماقتاردى توگىلتتى.
«جۇيرىكتەن-جۇيرىك وزار جارىسقاندا» دەمەكشى, كىمنىڭ جەڭىمپاز اتانارى اركىمنىڭ دايىندىعىنا بايلانىستى. قازىلار القاسى باعىنا ەمەس, بابىنا قاراپ باعالايتىنىنا, ەشقانداي بۇرا تارتۋعا جول بەرىلمەيتىنىنە سەنىمدىمىن»– دەيدى حالىقارالىق «الاش» سىيلىعىنىڭ لاۋرەاتى داۋلەتكەرەي كاپ ۇلى.
جىر كەشىندە جۇرتشىلىق قىزىعا تاماشالاعان جۇپتاردىڭ ءبىرى قاراعاندىلىق ماقسات اقانوۆ پەن الماتىلىق جاس اقىن اياۋلىم جۇمابەكقىزىنىڭ قىز بەن جىگىت ايتىسى بولدى. باسقا جۇپتار دا كوپشىلىكتىڭ قوشەمەتىنە بولەندى.
قازىلار القاسىنىڭ ءبىراۋىزدى شەشىمى بويىنشا باس جۇلدەگە تىگىلگەن 700 مىڭ تەڭگە اقشالاي سىيلىقتى ماقسات اقانوۆ يەلەندى. ءبىرىنشى ورىن مەن 500 مىڭ تەڭگە رينات زايىتوۆقا , ەكىنشى ورىن مەن 300 مىڭ تەڭگە اسپانبەك شۇعاتاەۆقا, ءۇشىنشى ورىن مەن 200 مىڭ تەڭگە جارقىن جۇپارحانعا بۇيىردى.
وزگە جىر سۇيەيلەرى دە اقشالاي سىيلىقتارمەن, العىس حاتتارمەن ماراپاتتالدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
