ماڭعىستاۋ وبلىسىندا وتكەن بيىلعى بايقاۋعا وڭىردەگى 30-دان استام كاسىپورىن قاتىسىپ, ونىڭ 14-ءى كورمەگە ونىمدەرىن شىعاردى. سونداي-اق بايقاۋدا تانىمال كاسىپورىندارمەن قاتار كاسىبىن جاڭادان باستاعان تاۋار وندىرۋشىلەردىڭ دە ونىمدەرىمەن تانىسۋعا مۇمكىندىك تۋدى.
ماڭعىستاۋ وبلىسى اكىمىنىڭ ورىنباسارى ر.ساكەەۆ ءوڭىردىڭ الەۋمەتتىك-ەكونوميكالىق تىنىسىنا توقتالدى.
– ماڭعىستاۋ وبلىسى قازاقستاننىڭ ەڭ قارقىندى دامىپ كەلە جاتقان ايماعىنىڭ ءبىرى, ەلدىڭ ىشكى جالپى ءونىمى 5,6%- ءتىن قۇرايدى. جىل سايىن ءبىزدىڭ وبلىستا ورتا ەسەپپەن 914 جاڭا كاسىپورىن اشىلادى. قازىرگى ۋاقىتتا شاعىن جانە ورتا بيزنەس سۋبەكتىلەرىنىڭ سانى 9505-تەن اسادى. «اتامەكەن» كاسىپكەرلىك پالاتاسى كومەگىمەن شاعىن نەسيە بەرۋ باعدارلامالارى, سونىڭ ىشىندە اۋىل كاسىپكەرلەرىن قارجىلاندىرۋ بويىنشا اقپاراتتاندىرۋ جۇمىستارى جۇرگىزىلۋدە, − دەدى ايماق باسشىسىنىڭ ورىنباسارى.
ماڭعىستاۋ وبلىسىندا 306 ءىرى جانە ورتا بيزنەس سۋبەكتىسى بار. ۇدەمەلى يندۋستريالىق-يننوۆاتسيالىق دامۋدىڭ مەملەكەتتىك باعدارلاماسى بويىنشا وبلىستىڭ يندۋستريالاندىرۋ كارتاسىنا 22 جوبا ەنگىزىلگەن. قازىرگى تاڭدا وڭىردە ەۋرازيالىق ەكونوميكالىق قاۋىمداستىعى (ەۋرازەق) مەن دۇنيەجۇزىلىك ساۋدا ۇيىمى (دسۇ) اياسىندا جوعارى ساپالى ءارى باسەكەگە قابىلەتتى ونىمدەردى شىعارۋ باستى نازاردا.
− مەملەكەت باسشىسى «ستراتەگيا-2050» باعدارلاماسىندا وتاندىق بيزنەستى ىشكى تابىستى ءوسىرۋدىڭ ەڭ ماڭىزدى كوزى رەتىندە بەلگىلەدى. ماڭعىستاۋ كاسىپكەرلەرى جاڭا باستامالاردى بەلسەندى تۇردە قولدايتىنىنا سەنىمدىمىن. وسىلايشا ولار ەكونوميكانىڭ وسۋىنە جانە حالىقتىڭ ءال-اۋقاتىنىڭ ودان ءارى جاقسارۋىنا ۇلەس قوسادى, − دەيدى «اتامەكەن» كاسىپكەرلەر پالاتاسى وڭىرلىك فيليالىنىڭ ديرەكتورى نۇربەك قاراساەۆ.
ساراپتامالىق كوميسسيانىڭ تاڭداۋىمەن «وڭىرلىك ماقساتتاعى ۇزدىك تاۋارلار» اتالىمى بويىنشا – «كاسپي بيتۋم» جشس, «كاسكور-ماشزاۆود» اق, «پاركەر-كازاحستان» جشس توپ جارسا, «حالىق تۇتىناتىن ۇزدىك تاۋارلار» اتالىمىندا «جانارىس» جشس, «جەكەنوۆا اسەل» جك مەن «دوميك» جك جەڭىسكە جەتتى. ال «ۇزدىك ازىق-ت ۇلىك تاۋارلارى» اتالىمى بويىنشا جۇلدەلەردى «سەلسكوحوزيايستۆەننىي كووپەراتيۆ «سەگيزباي اتا» وك مەن «ساۋكىمبەك» جشس جانە «بەرەكەت-ف» جشس يەلەندى.
جۇلدەگەر تاۋار وندىرۋشىلەر ماڭعىستاۋ وبلىسى اتىنان كۇزدە استانا قالاسىندا وتەتىن «قازاقستاننىڭ ۇزدىك تاۋارى» رەسپۋبليكالىق بايقاۋىنا جانە «قازاقستاندا جاسالعان» كورمەسىنە قاتىساتىن بولادى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
