نيكوليا رۋچتي (شۆەيتساريا):
– مەن بۇرىننان دا ازيا ەلدەرىن جاقسى كورەتىنمىن. بىرنەشە جىل قىتايدا تۇردىم. كەيىن قازاقستانعا بارۋعا مۇمكىندىك تۋدى. شىنىمدى ايتسام, بۇرىنعى كەڭەستىك ەلدەردىڭ ءبىرى بولعاندىقتان, سول زاماننىڭ ارحيتەكتۋراسىن كورەتىن شىعارمىن دەگەن كۇدىك باسىم بولدى. ايتسە دە, قازاقستاننىڭ باس قالاسىنا كەلگەندە, شاھاردىڭ سۇلۋلىعىنا ەرەكشە تامساندىم.
«Tour de France»-قا ءجيى قاتىساتىن «استانا» ۆەلوكومانداسىن ءبىزدىڭ ەلىمىزدە كوپ ادام بىلەدى. «استانا» ۆەلوكوماندانىڭ اتاۋى رەتىندە عانا قابىلدانادى. بىراق ءوز كوزىممەن كورگەن سوڭ, مەن قالا تۋرالى ۇنەمى ايتىپ جۇرەمىن.
گابريەل ماكگۋاير (اقش):
– مەن ورتالىق ازيانىڭ مادەنيەتى مەن ادەبيەتىنە قىزىعىپ, قازاقستانعا قازاق ءتىلىن ۇيرەنۋ ءۇشىن باردىم. الدىمەن وڭتۇستىك قازاقستاندا تۇردىم. اقش-قا كەتپەس بۇرىن استانادا جۇمىس ىستەۋ تۋرالى ويلانا باستادىم. 2007 جىلى استاناعا قىدىرىپ كەلدىم. ءاۋ باستا قالادا بيىك عيماراتتار كوپ, كوشەدە ادام از بولعانى ماعان تاڭسىق كورىندى, ءتىپتى, عىلىمي فانتاستيكا سەكىلدى بولدى. مەنى قازاقستاندا ەڭ ءبىرىنشى تاڭعالدىرعانى – 20-دان اسقان, جۇمىسى, تۇراقتى تابىسى بار ادامداردىڭ اتا-اناسىمەن تۇرۋى بولدى. بىزدە اتا-اناڭدى تەك دەمالىس كۇندەرى كورۋگە بارىپ قايتاتىندىقتان, بۇل ءداستۇر ماعان ەرەكشە اسەر ەتتى ءارى بىردەن قۇرمەتتەۋگە لايىق ءۇردىس ەكەن دەپ ويلادىم. سەبەبى بۇل تۋىستىق قارىم-قاتىناستىڭ بەرىكتىگىن كورسەتەدى.
حانس دريسسەر (نيدەرلاندى):
– قازاقستاننىڭ ەلورداسى ەۋروپانىڭ ەشبىر قالاسىنا ۇقسامايدى. مەن ۇشاقتان تۇسكەن كەزدىڭ وزىندە قالانىڭ اۋاسىن جۇتىپ تۇرىپ, ەرەكشە راحاتتانعانىم ەسىمدە. ال قالانىڭ ارحيتەكتۋراسىن كورىپ, شەكسىز فانتازيانىڭ كۋاسى بولدىم. استانا تۋرالى ەستىپ – بىلگەن ءبىر بولەك, بارىپ قالانى كورگەن – تىپتەن بولەك. استانادا ەسكى مەن جاڭا جاقسى ۇيلەسىم تاپقان. استانا بيزنەس ءۇشىن قولايلى. جاس, ادەمى قالا جاڭاشىلدىعىمەن وزىنە باۋراپ اكەتەدى.
ەلويزا كلەچەسكي (فيليپپين):
– شەتەلگە شىققان سايىن جاڭالىققا بايىپ قايتاسىڭ. ءتىپتى حالىقتار اراسىنداعى ۇقساستىقتارعا كەز بولاتىن ءسات تە از بولمايدى. قازاقستانعا بارعان ساپارىمدا وسىنداي ۇقساستىقتى بايقادىم. مەنىڭ ويىمشا قازاقتار مەن فيليپپيندىكتەر اراسىندا رۋحاني جاقىندىق بار ءتارىزدى. مىسالى, وتباسىلىق بايلانىس, تۋىستىق قارىم-قاتىناس, دوستىقتى قادىرلەۋ ءتارىزدى يگى قاسيەتتەر قوس حالىققا ورتاق قاسيەت ەكەنىنە كوز جەتكىزدىم.
ازىرلەگەن گۇلنۇر قۋانىشبەكقىزى,
«ەگەمەن قازاقستان»
