ءىس-شاراعا پرەمەر-ءمينيستردىڭ ورىنباسارى اسقار جۇماعاليەۆ, پرەزيدەنت اكىمشىلىگىنىڭ, ۇكىمەتتىڭ وكىلدەرى, قارجى ءمينيسترى, ۇيلەستىرۋ كەڭەسىنىڭ مۇشەلەرى قاتىستى.
جيىن بارىسىندا مەملەكەت باسشىسىنىڭ «تسيفرلى قازاقستان» باعدارلاماسى شەڭبەرىندەگى تاپسىرماسىنا سايكەس ەلىمىزدە قىلمىستىق سوت ءىسىن جۇرگىزۋدى ەلەكتروندى فورماتقا كەزەڭ-كەزەڭمەن كوشىرۋدىڭ جۇزەگە اسىرىلىپ جاتقانى اتالىپ ءوتتى.
باس پروكۋروردىڭ مالىمدەۋىنشە, جوبانى ىسكە اسىرۋدىڭ باستى ماقساتى – ازاماتتاردىڭ قۇقىقتارىن قورعاۋ جانە سوت تورەلىگىنە جىلدام قول جەتكىزۋدى قامتاماسىز ەتۋ.
جالپى, سالانى اۆتوماتتاندىرۋ قىلمىستىق پروتسەستىڭ بارلىق ساتىسىن, اتاپ ايتقاندا, قىلمىستى تىركەۋدەن باستاپ ۇكىم ورىندالعانعا دەيىنگى ساتىلاردى قامتيدى دەپ كۇتىلۋدە.
سونداي-اق ىستەردى ەلەكتروندى فورماتتا تەرگەپ-تەكسەرۋدىڭ ارتىقشىلىعى رەتىندە وڭتايلاندىرۋ, دالەلدەمەلەردى جيناۋ جانە پروتسەستىك قۇجاتتاردى جاساۋ راسىمدەرىنىڭ جەڭىلدەتىلۋى, سونداي-اق پروكۋرورلىق جانە سوت باقىلاۋىن كۇشەيتۋ تۋرالى ايتىلدى.
وتىرىستا كەلتىرىلگەن مالىمەتتەرگە سۇيەنسەك, بۇگىنگى تاڭدا 5 مىڭعا جۋىق ءىس ەلەكتروندى تۇردە تەرگەپ-تەكسەرىلۋدە, ونىڭ 2,3 مىڭى سوتقا جولدانعان.
ال ۇيلەستىرۋ كەڭەسىنىڭ توراعاسى – باس پروكۋرور قايرات قوجامجاروۆ اتاپ وتكەندەي, ەلەكتروندى سوت ءىسىن جۇرگىزۋدى تولىققاندى ەنگىزۋ ءۇشىن قىلمىستىق قۋدالاۋ ورگاندارىن قارجىلاندىرۋ, تيىسىنشە تەحنيكالىق جاراقتاندىرۋ جانە قىزمەتكەرلەرگە ونى جۇرگىزۋ داعدىلارىن وقىتۋ ماسەلەلەرىن شەشۋ قاجەت.
وسىعان بايلانىستى, ۇكىمەت مۇشەلەرى جوبانى ودان ءارى ىسكە اسىرۋ ءۇشىن قاراجات ءبولۋ ماسەلەسىن تالقىلادى, ال قۇقىق قورعاۋ ورگاندارىنىڭ باسشىلارىنا قىلمىستىق پروتسەستى كەزەڭ-كەزەڭمەن اۆتوماتتاندىرۋ مەرزىمىنىڭ مۇلتىكسىز ساقتالۋىن قامتاماسىز ەتۋ تاپسىرىلدى.
ودان كەيىن قىلمىستىق پروتسەستە ازاماتتاردىڭ قورعالۋ دەڭگەيىن كوتەرۋ, ونىڭ اسىرە قاتاڭدىعىن تومەندەتۋ, قىلمىستىق سوت ءىسىن جۇرگىزۋ نىساندارىن وڭتايلاندىرۋ بويىنشا ۋاكىلەتتى ورگانداردىڭ قابىلداپ جاتقان شارالار تۋرالى باياندامالارى تىڭدالدى.
جيىندا بەلگىلى بولعانداي, قىلمىستىق جانە قىلمىستىق-پروتسەستىك زاڭنامانى جاڭعىرتۋعا باعىتتالعان زاڭ قولدانىستا بولعان 7 اي ىشىندە ۇستالعاندار (9 789-دان 6 508-گە دەيىن), كۇزەتپەن ۇستالعاندار (8 835-تەن 6 148-گە دەيىن) جانە باس بوستاندىعىنان ايىرۋعا سوتتالعاندار (12 414-تەن 4 231-گە دەيىن) سانى ۇشتەن بىرگە ازايعان.
وسى جىلدىڭ ناۋرىزىنان باستاپ سوتتار جاسىرىن تەرگەۋ ارەكەتتەرىن جۇرگىزۋگە 8 مىڭ سانكتسيا بەرگەن. بۇيرىقتىق ءىس جۇرگىزۋ تارتىبىمەن 600-دەن استام ءىس اياقتالعان.
باس پروكۋرور, سونىمەن قاتار جاسىرىن تەرگەۋ ارەكەتتەرىنە باستاما جاساۋ كەزىندە زاڭدىلىقتىڭ ساقتالۋىن جانە ازاماتتاردىڭ قۇقىقتارىنىڭ بۇزىلۋىنا جول بەرىلمەۋىن, ازاماتتاردى نەگىزسىز ۇستاۋ فاكتىلەرىن بولدىرماۋدى, دالەلدەمەلەردى جيناۋ بويىنشا ادۆوكاتتاردىڭ وكىلەتتىكتەرىن ىسكە اسىرۋ كەپىلدىگىنىڭ قامتاماسىز ەتىلۋىن تاپسىردى.
ۇيلەستىرۋ كەڭەسىنىڭ قورىتىندىسى بويىنشا بىرقاتار ناقتى ۇسىنىمدار ازىرلەندى.
سەرىك ابدىبەك,
«ەگەمەن قازاقستان»
