جەڭىستەرگە باستاعان جەڭىلىستەر بولماسا, جەتىستىكتەردىڭ قادىرى قانشالىقتى قۇندى بولار ەدى؟ ەگەمەندىكتىڭ بەدەرىندە ەكى دۇركىن وليمپيادا چەمپيونى ء(وزىم ءۇشىن ءالى سولاي) اتانعان يليا ءيليننىڭ جەتكىنشەك كۇنىنەن قالعان مىنا سۋرەتتى كورىپ وتىرىپ, وسى ءبىر قاس-قاعىم ءساتتىڭ جان تولقىتار تاريحى بارىن بىلگەندە اياقاستىنان التىن تاۋىپ العانداي قۋانىشىمىز ەسەلەنە ءتۇستى.
– 1998 جىلى الماتىدا جاسوسپىرىمدەر اراسىندا اۋىر اتلەتيكادان رەسپۋبليكالىق چەمپيونات ءوتتى. ۇل بالالاردىڭ اراسىنداعى ەل بىرىنشىلىگى تسسكا-دا ۇيىمداستىرىلدى. مەن ول كەزدە قازتاگ ءفوتوتىلشىسىمىن. وسى سپورتتىق شارادان بىزگە رەپورتاج جاساۋعا تاپسىرما بەرىلگەن. ارمياشىلار كلۋبىنىڭ ورتالىق ستاديونىنا كەلسەك, قاتىسۋشىلار سانىنىڭ ازدىعىنان جارىس ۋاقىتىنان بۇرىن اياقتالىپ كەتىپتى. ستاديوندا ادام جوقتىڭ قاسى.
قاراسام بۇرىشتا ءبىر بالا جىلاپ وتىر. اكەسى جانىندا جۇباتىپ تۇر. كورسەتكىشى ءسال تومەن بولىپ, ەكىنشى ورىن الىپ قالعان ەكەن.
– اتىڭ كىم, بالاقاي؟ – دەدىم جاقىنداپ.
– يليۋشا.
– فاميلياڭ؟
– يلين, – دەدى ول قورسىلداعان تاناۋىن تارتىپ.
– قانە, شتانگاعا وتىر. جىلاما! ءالى-اق الەم چەمپيونى بولاسىڭ, – دەدىم ارقاسىنان قاعىپ.
– سۋرەتتەگىدەي يليا شتانگادا كوڭىلسىز وتىردى. مەن شىرت ەتكىزىپ فوتوعا ءتۇسىرىپ الدىم. بۇل سۋرەت «كازاحستانسكايا پراۆدا» گازەتىنىڭ ءبىرىنشى بەتىندە جارىق كوردى.
– ەكىنشى ورىن العان بالا رەسپۋبليكالىق باسىلىمنىڭ ءبىرىنشى بەتىنە قالاي شىقتى؟
– ايتىپ وتىرمىن عوي. بۇل رەسپۋبليكالىق ءىرى سپورتتىق جارىس بولاتىن. ءبىز بارعاندا جارىس اياقتالىپ, جۇرت تاراپ كەتكەندىكتەن گازەتتىڭ ءبىرىنشى بەتى يلياعا بۇيىردى. كەيىن يليا يلين جىلدار وتە كەلە, 2006 جىلى قىتايدا وتكەن جاستار اراسىنداعى الەم چەمپيوناتىنان جەڭىسپەن ورالعاندا, اۋەجايدان قارسى العان باق وكىلدەرىمەن بىرگە بارىپ, قۇتتىقتادىم, – دەيدى ەلىمىزدەگى ەڭ بايىرعى فوتوتىلشىلەردىڭ ءبىرى يۋري بەككەر.
– ايتتىم عوي ساعان, كوردىڭ بە الەم چەمپيونى بولدىڭ! – دەدىم يلياعا.
– ال مەن ءسىزدى كوپ جىلدان بەرى ىزدەپ ءجۇرمىن. اتى-ءجونىڭىزدى دە سول كەزدە سۇراپ, جازىپ الماپپىز. باياعىدا گازەتكە شىققان فوتونى انام با, اعام با, قيىپ الىپ قويعان ەكەن, قىزىلورداداعى ءۇيىمنىڭ قابىرعاسىندا ءىلۋلى تۇر, – دەدى ول قۋانا قۇشاقتاپ.
سودان بەرى بەلگىلى ءفوتوتىلشى يۋري بەككەر مەن سپورت ساڭلاعىنىڭ دوستىعى بەرىك دەسەك تە بولادى.
ورايى كەلىپ تۇرعاندا, قورجىنى ەل شەجىرەسىنە تولى يۋري بەككەر جەلتوقسان وقيعاسى كەزىندە تۇسىرىلگەن ايگىلى سۋرەتتەرىمەن دە تانىمال ەكەنىن ايتا كەتەلىك. جانە بۇل جۇمىستارى ءۇشىن از تاياق جەمەگەن...
وسىلايشا الەمنىڭ ۇزدىك اۋىر اتلەتى, ەكى دۇركىن وليمپيادا چەمپيونى, ءۇش دۇركىن الەم چەمپيونى, قازاقستاننىڭ ەڭبەك سىڭىرگەن سپورت شەبەرى اتانعان يليا يلين بيىل وردا بۇزار 30 جاسقا تولدى.
ايناش ەسالي,
«ەگەمەن قازاقستان»
الماتى
