وتكەن جىلى الەمنىڭ التى ەلىندە تاراتىلعان, 200 ميلليوننان اسا ادام تاماشالاعان ۇلكەن جوبا جالعاسىن تابادى.
سونىمەن, الماتى قالاسىندا «31 ارنانىڭ» ۇيىمداستىرۋىمەن حالىقارالىق «I`m a Singer Kazakhstan» تالانت-شوۋىنىڭ ەكىنشى ماۋسىمىنىڭ تۇساۋى كەسىلدى. بيىلعى ماۋسىمنىڭ سىيلىق قورى 50 000 000 تەڭگەگە جەتتى. قازاقستاندا بالاماسى جوق عالامات جوباعا الەمنىڭ ءار تۇكپىرىنەن ەڭ مىقتى داۋىس يەلەرى جينالادى.
حالىقارالىق تالانت-شوۋىنىڭ جاڭا باستالۋىنا وراي جوبا جەتەكشىلەرى باستى جاڭالىقتارىمەن ءبولىسىپ, رەسمي تۇردە جوبا كاستينگىنىڭ اياقتالعانىن حابارلادى.
وسى ونەردىڭ ءوزى دە ءومىرىمىزدىڭ بۇكىل سالالارىمەن ساباقتاس بولعاندىقتان, «31 ارنانىڭ» باس ديرەكتورى باعدات قوجاحمەتوۆ اتالمىش جوبا قازاقستاننىڭ كورىكتى مەكەندەرىن قامتۋعا, ءتۋريزمدى دە ناسيحاتتاۋعا كۇش سالاتىندىعىن ايتتى. ويتكەنى بيىلعى بايقاۋعا شەت مەملەكەتتەردەن دە قاتىسۋعا تىلەك ءبىلدىرىپ وتىرعان تالانتتار كوبەيدى. ماسەلەن, بيىلعى جاندى داۋىستار جارىسىنا قاتىسۋعا 4 مىڭنان اسا ادام ءوتىنىش جىبەردى. ولاردىڭ اراسىندا قازاقستاننان بولەك, رەسەي, ۋكراينا, وزبەكستان, قىرعىزستان, ازەربايجان, يران, ارمەنيا جانە بەلارۋس مەملەكەتتەرىنەن نيەت بىلدىرگەندەر دە بار.
انسۇيەر قاۋىمنىڭ ەسىندە بولسا, تانىمال انشىلەرىمىز بۇل جوبا بىلتىر باستالعاندا باق سىناۋعا اسا ىقىلاستى بولماپ ەدى. 2017 جىلى كۇز-قىس تەلەماۋسىمىنىڭ ەڭ اۋقىمدى مۋزىكالىق وقيعاسى اتانعان «I’m a Singer Kazakhstan» جوباسىنىڭ ءبىرىنشى ماۋسىمىنا 6 ەلدەن 8 كاسىبي ءان ورىنداۋشى قاتىسىپ, قازاقستاندىق ءانشى قايرات تۇنتەكوۆ جەڭىسكە جەتكەن-ءدى.
ەسەسىنە بيىلعى جوباعا ەلىمىزدىڭ 30 شاقتى تانىمال ەسترادا جۇلدىزى قاتىسقالى وتىر. جانە قاتىساتىن مەملەكەتتەردىڭ دە سانى ارتتى.
سونداي-اق بيىل عالامات شارانىڭ ەرەجەلەرىنە وزگەرىستەر ەندى. بۇدان بىلاي شوۋعا 16 جاسقا تولعان, وزىنە سەنىمدى كەز كەلگەن ۇمىتكەر ءوتىنىش بىلدىرە الادى.
«بۇل جوبا – كەز كەلگەن مۋزىكالىق ەسترادانىڭ دارگەيىن كوتەرەتىن شوۋ, – دەيدى «31 ارنانىڭ» باس ديرەكتورى باعدات قوجاحمەتوۆ. – ول جاي عانا ءان سايىسى ەمەس, ونى جۇلدىزداردىڭ ونەرى دەپ قاراۋ قاتە. ول, ەڭ الدىمەن, وزىندىك دراماتۋرگياسى بار, ءانشىنىڭ ىشكى جان تەبىرەنىسىن بەينەلەيتىن بىرەگەي وقيعا. مۇنداي جوبالاردىڭ باسىم بولىگى كوپتىڭ اراسىنان بىرەۋدى سۋىرىپ الىپ شىعىپ, جۇلدىز جاساۋدى ماقسات تۇتسا, بۇل شوۋدىڭ ماقساتى – كەرىسىنشە جۇلدىزدىڭ دا ادام ەكەنىن كورسەتۋ. ءبىر ۇقساستىعى, ەكەۋىنىڭ دە قۇرالى – ءان».
بيىلعى ماۋسىمدا ساراپشىلار دا جۇرتتىڭ سۇيىكتى انشىلەرىنەن قۇرالعان. ولاردىڭ اراسىندا ساكەن مايعازيەۆ, ماقپال ءجۇنىسوۆا سىندى انشىلەر بار.
– مۇنداي اۋقىمدى حالىقارالىق جوباعا قازىلىق ەتۋ – ۇلكەن مارتەبە. باس جۇلدەگەر الماتىدا جەكە كونتسەرتىن وتكىزىپ, جاڭا ءانىن جازىپ, بەينەبايان تۇسىرۋگە جانە ونى قازاقستاندىق راديوستانتسيالاردا, مۋزىكا تەلەارنالارىندا جىل بويى روتاتسيالاۋعا مۇمكىندىك الادى, – دەيدى شوۋ جاڭالىقتارىمەن بولىسكەن بايقاۋ تورەشىسى ساكەن مايعازيەۆ.
ايناش ەسالي,
«ەگەمەن قازاقستان»
