ايتىسقا بەلگىلى ساتيريك جازۋشى, قازاقستان جازۋشىلار وداعى قوستاناي فيليالىنىڭ توراعاسى, كوپ جىلدان بەرى قوستاناي-تورعاي وڭىرىندە ايتىستىڭ دامۋىنا اتسالىسىپ جۇرگەن عۇمار احمەتچين جانە ايتىس اقىنى, قر مادەنيەت قايراتكەرى, جاس اقىندار ۇستازى ءالفيا ورمانشينا جانە تاعى باسقالار قازىلىق ەتتى. ايتپاقشى, ايتىس جەرگىلىكتى ونەرپاز جاس مارعۇلان وسپانوۆتىڭ ايتىس اقىنى قۇدايبەرلى مىرزابەكوۆتىڭ سوزىنە جازىلعان «ايتىس ءانى» انىمەن اشىلدى.
ايتىستا 8 اقىن, ياعني استانادان ازامات ءمالجانباي, قاراعاندىدان بوتاگوز مۇحيتدەنقىزى, الماتىدان ايبەك بەستەنقۇلوۆ, پەتروپاۆلدان ماقسات سەرىك, قوستاناي وبلىسىنان سالتانات وتەلباەۆا, باتىرلان ساعىنتاەۆ, ماماي ىزتىلەۋ, توبا وتەپباەۆتار ءتورت جۇپ بولىپ ونەر كورسەتتى.
«اقىنداردىڭ دايىندىعى جاقسى بولدى. كورەرمەننىڭ جىرعا دەگەن سۋسىنىن قاندىردى. استانا, ەلىمىزدىڭ جەتىستىكتەرى تۋرالى جىر كورىگىن قىزدىردى, كەمشىلىكتەر دە ولاردىڭ ولەڭىنەن تىس قالعان جوق, ءازىل-قالجىڭدى دا ولەڭگە ورنىمەن ورە ءبىلدى. وسى اقىن بالالاردىڭ باسىم كوپشىلىگى ءوزىمىزدىڭ قولىمىزدان شىققان بالاپاندار ەدى. ولاردىڭ بارلىعى دەرلىك الامان ايتىستاردا جۇلدە الىپ جۇرگەندەر. اقىندىق دەگەن تۋما, دارىن بولسا دا ەڭبەك عوي. ولاردىڭ وسكەنىنە قۋانامىن» دەدى 25 جىلدان بەرى وبلىستا بالالار ايتىسىن ۇيىمداستىرىپ, ءوزى قازىلىق ەتىپ كەلە جاتقان عۇمار عاريف ۇلى.
ايتىستا قازاقتىڭ قارا ولەڭى جەڭدى دەسەك تە, سايىستىڭ اتى – سايىس, جەڭىمپازدار بولۋى ءتيىس. ءبىرىنشى ورىندى ارقالىقتىق باتىرجان ساعىنتاەۆ, ەكىنشى ورىندى استانالىق ازامات مالجانباەۆ, ءۇشىنشى ورىندى قوستانايلىق سالتانات وتەلباەۆا جەڭىپ الدى. ايتىستان كەيىن ليساكوۆ قالاسىنىڭ اكىمى اتىنان ايتىس ونەرىنىڭ قوستاناي وڭىرىندە وركەن جايۋىنا ۇلكەن ەڭبەك ءسىڭىرىپ جۇرگەن عۇمار احمەتچينگە شاپان جاۋىپ, قۇرمەت كورسەتىلدى.
ءنازيرا جارىمبەت,
«ەگەمەن قازاقستان»
قوستاناي
