قازاقستان بايقاۋدىڭ 15 جىلدىق تاريحىندا العاش رەت قاتىسقالى وتىر. قازاقستاننىڭ اۋماعىندا بايقاۋدى «حابار» تەلەارناسى كورسەتەدى. «حابار» اگەنتتىگى 2016 جىلعى 1 قاڭتاردان باستاپ ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى, وسى مۇشەلىك اتالعان بايقاۋعا قاتىسۋ ءۇشىن ەلدەن ۇمىتكەر ۇسىنۋعا ىقپال ەتتى.
«حابار» اگەنتتىگىنىڭ باسقارما توراعاسى الان اجىباەۆ: «قازاقستاننىڭ قاتىسۋى جونىندەگى كەلىسسوزدەر ۇزاق ۋاقىت جۇرگىزىلىپ كەلدى, «EBU» شەشىمى سوڭعى ساتكە دەيىن بەلگىسىز بولاتىن. «حابار» «EBU» قاۋىمداسقان مۇشەسى بولىپ تابىلاتىندىعىنا قاراماستان, وسى تەكتەس اۋقىمدى حالىقارالىق ءىس-شارالاردى تەحنيكالىق جابدىقتاۋ, تەلەۆيزيالىق تولتىرۋ جانە ترانسلياتسيالاۋ تاجىريبەسى بويىنشا بەلگىلى ءبىر تالاپتارعا سايكەس كەلۋى قاجەت بولدى. وسى اتاقتى بايقاۋعا ەلىمىزدىڭ قاتىسۋ مۇمكىندىگى پايدا بولعانىنا قۋانىشتىمىز. قازىرگى ساتتە ءبىزدىڭ اگەنتتىك پەن اقپارات جانە كوممۋنيكاتسيالار مينيسترلىگى ەلىمىزدە ىرىكتەۋ جۇرگىزۋدىڭ بىرنەشە نۇسقاسىن قاراستىرۋدا, ءاربىر تالانتتى بالانىڭ قاتىسۋعا مۇمكىندىگى بولۋى ءۇشىن بارىنشا وڭتايلى نۇسقا ويلاستىرىلۋدا. ءبارى جاقىن ارادا ايتىلاتىن بولادى», دەدى.
شارت بويىنشا بايقاۋعا قاتىسۋشىلار جاڭا, ەش جەردە جاريالانباعان ءان ورىنداۋى, سونداي-اق ۇزاقتىعى 2 مينۋت 45 سەكۋندتان باستاپ 3 مينۋتقا دەيىنگى ءوز كومپوزيتسياسىن جاندى داۋىسپەن ايتۋى قاجەت. جەڭىمپاز تەلەكورەرمەندەردىڭ جانە قۇرامىنا 5 ادام ء(ۇش ەرەسەك جانە ەكى بالا) كىرەتىن, بارلىق قاتىسۋشى ەلدەردەن قۇرالعان قازىلار القاسىنىڭ داۋىس بەرۋى جولىمەن انىقتالادى. «ەۆروۆيدەنيەنىڭ» ەرەكشەلىگى – بالالار بايقاۋىندا جەڭىمپاز ەل اۆتوماتتى تۇردە كەلەسى بايقاۋدى ءوز ەلىندە وتكىزۋ قۇقىعىن يەلەنبەيدى, بۇل جاس قاتىسۋشىلارعا قىسىمدى ازايتۋ ءۇشىن جاسالدى. بايقاۋلاردىڭ ۇيىمداستىرۋشىلارىن ەۋروپالىق حابار تاراتۋ وداعى الدىن الا انىقتايدى.
باعاشار تۇرسىنباي ۇلى,
«ەگەمەن قازاقستان»
