اسكەردەن ورالعان جىلى كەڭشارعا قارا جۇمىسشى بولىپ ورنالاستى. اكەسىنىڭ اقىل-كەڭەسىمەن قاپلانبەككە وقۋعا ءىلىنىپ, زووتەحنيك دەگەن تاباقتاي كوك ديپلومدى الىپ كەلدى. مالينين كەڭشارىنا فەرما زووتەحنيگى بولىپ جۇمىسقا كىرگەنى سول, كەڭشار تارادى. كپسس ەسىمدى ناعاشىسى باسقاراتىن ەت كومبيناتىنا جۇمىسقا ورنالاسقانى سول ەدى, «اۋداندا مال تاۋسىلدى» دەگەن جەلەۋمەن ول دا جابىلدى. سودان بەرى جۇمىسسىز. كەلىنشەگى كوپشىلىك ءجيى كەلەتىن حالىقتىق كەڭسەدە جۇمىس اتقارادى.
ەركەك ادامنىڭ كوڭىلىن دە, ءومىرىن دە قىسقارتاتىن وسى جۇمىستىڭ جوقتىعى-اۋ. ون تەڭگە تاپسا دا كەشكىسىن «جۇمىستان شارشاپ كەلدىم» دەپ تورىندە شالقايىپ جاتقان ەركەكتەن باقىتتى ەركەك بولماس. ايلىق تاۋىپ, بالا-شاعاسىن اسىراپ وتىرعان ايەلىڭنىڭ قاس-قاباعىنا قاراپ قيمىلداۋ ەركەك ءۇشىن قورلىقتىڭ قورلىعى ەكەنىن ارقاباي وسى جىلدار ىشىندە شەگىنە جەتە ءتۇسىندى. ايەلىڭنىڭ ماڭدايتەرىمەن تاپقان قانت-شايى جۇمىسسىز بولعان سوڭ تاماعىڭنان ازەر وتەدى ەكەن. داستارقانداعى نانعا قول سوزعاندى ايتساڭشى, دەيدى ارقاباي ىشتەي ەگىلە.
ءيا, كەش تۇسە باستاعاننان ايەلىنىڭ جولىنا قاراپ ەلەڭدەيدى. ونى «شارشاپ كەلەدى-اۋ», «نە ىستەپ قۋانتسام ەكەن؟» دەگەن وي ءجيى مازالايدى. «ەڭ قۇرىعاندا, تاماقتى دا ىستەي المايمىن. قوي, ءۇيدى جيناپ, ىدىس-اياقتى جۋىپ قويايىن» دەپ ەلپەڭ قاققانىن كورگەن ادام بولسا اياپ كەتەر ەدى. بۇگىن دە ارقاباي تۇستەگى ءىشىپ-جەلىنگەن ىدىس-اياقتاردى جۋىپ, ءۇي-ءىشىن سىپىرىپ-سيىرىپ تازالاپ شىقتى. وتىنىن اپتالىق جاعاتىن ەتىپ جارىپ, جيىستىرىپ, كۇلشەدەي ەتىپ قالاپ قويدى. بالالارىنىڭ مەكتەپكە كيەتىن كيىمدەرىن دە جۋىپ, جايىپ تاستادى.
وسىلاي جىلدار وتە كۇندەلىكتى كۇيبەڭدەۋمەن ءجۇرىپ تاماقتىڭ ءتۇر-ءتۇرىن, ءتاتتى-تۇتتىنىڭ نەشەمە اتاسىن ءپىسىرۋدى دە ۇيرەنىپ الدى.
كەشە كەشكىسىن كەلىنشەگى گۇلسىم جۇمىستان كوڭىلدى ورالدى. ول «ارقاش, ساعان جاقسى جۇمىس تاپتىم. اۋىلشارۋاشىلىق مەكەمەسىندە مال مامانى قىزمەتى بوس تۇر ەكەن. باستىعىمەن سويلەسىپ قويدىم. ەرتەڭ جۇمىسقا كىرىسەسىڭ», دەگەن جۇبايىنىڭ جاعىمدى, قۋانىشتى جاڭالىعىنا نەگە ەكەنىن ارقاباي اسا سەلت ەتىپ قۋانا قويمادى. تەك اقىرىن عانا كۇبىرلەپ ء«ۇي-ءىشىنىڭ تىرلىگى بار, ونىڭ ۇستىنە بالالاردىڭ جاعدايىن كىم جاسايدى؟» دەي بەردى. قازەكەڭ, ايتاتىن ء«ۇش اي ۇيشىكتە وتىرساڭ, ءۇي كۇشىك بولاسىڭ» دەگەنى وسى شىعار. ەر ادامنىڭ ەڭبەككە دەگەن قابىلەتىن جوعالتۋى وتە وڭاي ەكەنىن ارقابايدىڭ ءوزى ۇعىنسا دا وزگەلەر ۇعىنبايدى-اۋ؟!
ماقسات جەڭىس ۇلى
