ء«سىبىر ميسسياسى» – ليتۆا رەسپۋبليكاسى بيلىگىنىڭ تاراپىنان قولداۋ تاۋىپ, 2006 جىلدان بەرى ىسكە اسىرىلىپ كەلە جاتقان جوبا. جوبا شەڭبەرىندە جاستاردان قۇرالعان ەكسپەديتسيا جەر اۋدارىلعان ليتۆالىقتاردىڭ زيراتتارىنا بارادى. سونداي-اق جەرگىلىكتى ليتۆالىقتار نەمەسە ولاردىڭ ۇرپاقتارىمەن كەزدەسەدى. ميسسيا مۇشەلەرى جىل سايىن الەم بويىنشا دەپورتاتسيالانعان ليتۆالىقتاردىڭ قابىرلەرىن ارالاپ, مالىمەتتەر جيناقتايدى.
ليتۆا حالقىنىڭ تاريحىن ساقتاۋ, ليتۆا مەن قازاقستاننىڭ ورتاق تاريحىن ءتۇسىنۋ, العان اسەرلەرىن ليتۆا جۇرتشىلىعىمەن ءبولىسۋ, سونداي-اق ليتۆا مەن قازاقستان اراسىنداعى مادەني بايلانىستى نىعايتۋ ماقساتىنداعى ەكسپەديتسيا ەلىمىزگە 19 شىلدەدە كەلگەن بولاتىن. ەكسپەديتسياعا قاتىسۋشىلار ليتۆالىقتاردىڭ قاراعاندى وبلىسىنداعى زيراتتارىنا بارىپ, وڭىردە تۇراتىن قانداستارىمەن كەزدەستى. جەر اۋدارىلعان ليتۆالىقتاردىڭ قابىرلەرىن جوندەۋمەن اينالىستى. ەكسپەديتسيا مۇشەلەرى 10 كۇننىڭ ىشىندە قاراعاندى, جەزقازعان جانە بالقاش وڭىرلەرىن ارالاپ ۇلگەرگەن. ەندى, مىنە, استاناداعى ۇلتتىق كىتاپحانادا ساپار قورىتىندىسىن جاريالادى.
ايتۋلارىنشا, كەزىندە ەلىمىزگە جەر اۋدارىلعان ليتۆالىقتار تۋرالى اقپاراتتاردى تۇگەندەپ, ولاردىڭ ۇرپاقتارىمەن كەزدەسكەن. ال قيىن-قىستاۋ كەزەڭدە قازاقستانعا ليتۆادان 50 مىڭنان اسا ادام كەلگەن. ءيا, 1941 جىلدىڭ ماۋسىمىنداعى كوتەرىلىستەن كەيىن قازاقستانعا ماجبۇرلەپ قونىس اۋدارعان ليتۆالىقتار كوپ. ساپار بارىسىندا سولاردىڭ 200-ىنە قاتىستى اقپارات ناقتىلانىپ, تىڭ دەرەكتەر تابىلعان.
دينارا بىتىك,
«ەگەمەن قازاقستان»
