جيىندى سىرتقى ىستەر مينيسترلىگى مەن «KAZENERGY» قازاقستان مۇناي-گاز جانە ەنەرگەتيكا كەشەنى ۇيىمدارىنىڭ قاۋىمداستىعى» ۇيىمداستىردى. ءىس-شاراعا سالا ماماندارى, حالىقارالىق بيزنەس قاۋىمداستىق وكىلدەرى مەن ديپلوماتيالىق كورپۋس قاتىستى.
بريفينگتە بايانداما جاساعان «KAZENERGY» باس ديرەكتورى اسەت ماعاۋوۆ ەلدە اتقارىلىپ جاتقان شارالارعا توقتالدى. ونىڭ ايتۋىنشا, قازىرگى تاڭدا مۇناي جانە ەنەرگەتيكا سالاسىندا ماڭىزدى جۇمىستار اتقارىلۋدا.
«KAZENERGY» زاڭنامالىق جۇمىستارعا بەلسەندى قاتىسادى. ءبىزدىڭ ماقسات – مۇناي جانە ەنەرگەتيكا سالاسىنداعى ينۆەستيتسيا كليماتىن جاقسارتۋ. ەنەرگەتيكا مينيسترلىگىمەن بىرلەسە جەر قويناۋى تۋرالى كودەكستى رەفورمالاۋعا اتسالىستىق. بىلتىر وسى زاڭ جوباسى قابىلداندى», دەدى ءا.ماعاۋوۆ.
بيىل ەلىمىزدەگى ءۇش مۇناي وڭدەۋ زاۋىتى تولىعىمەن ىسكە قوسىلعاننان كەيىن مۇناي ونىمدەرىنىڭ كولەمى ارتپاق. سونداي-اق بەنزين جانە ديزەلدى وتىننىڭ ەكسپورتى بويىنشا كەدەندىك باج سالىعىنا وزگەرتۋلەر ەنگىزىلەدى. سپيكەردىڭ ايتۋىنا قاراعاندا, اۋىل شارۋاشىلىعىنا ارنالعان جانارماي جەتكىزۋ مەن كوممۋنالدىق كاسىپورىندارعا ارنالعان جىلىتاتىن مازۋت جەڭىلدىكتەرى الىنىپ تاستالعان.
«بىلتىر ەكسپورت دوللار ەكۆيۆالەنتىندە 25%-ءتى قۇراسا, ءبىزدىڭ زاۋىتتارعا جەتكىزىلەتىن مۇناي باعاسى 47%-كە وسكەن. بيىل ءۇش زاۋىتتى جاڭعىرتۋ اياقتالدى. قازىر بەنزين مەن ديزەل وتىنىنا قاتىستى ەكسپورتتىڭ كەدەندىك باجىن رەفورمالاۋ بويىنشا جۇمىستارعا قاتىسۋدامىز. كەلەسى جىلدىڭ 1 قاڭتارىنان باستاپ بەنزين مەن ديزەلدى وتىندى ەكسپورتقا شىعارمايمىز. بىراق ەلدەگى مۇناي وڭدەۋ كولەمى ايتارلىقتاي كوبەيەدى. سوندىقتان جاقىن جانە الىس شەت ەلدەرگە مۇناي ونىمدەرىن تاسىمالداۋ جولدارى اشىلسا قۇبا-قۇپ», دەدى ءا.ماعاۋوۆ.
سونىمەن قاتار مۇناي ونىمدەرىنىڭ اكتسيزدەرى سالاسىنداعى بىرقاتار ماسەلەگە توقتالدى. بايانداماشىنىڭ سوزىنە سۇيەنسەك, وتاندىق وندىرۋشىلەر وسى باعىتتا كوپ قاراجات جۇمسايدى ەكەن. سالىستىرمالى تۇردە قاراساق, رەسەيدە اكتسيزدەردىڭ قۇنى ەلىمىزدەگى باعادان ەكى ەسە تومەن.
«اكتسيزدىڭ مولشەرى بىردەي بولعانى ءجون. ماسەلەن رەسەيلىكتەر ءوز بەنزينىن يمپورتتاعاندا 4 500 تەڭگە تولەسە, وتاندىق زاۋىتتار 10 500 تەڭگە جۇمسايدى. سول سەكىلدى ديزەلدى وتىندى يمپورتتىق جەتكىزۋ تونناسىنا 540 تەڭگەنى قۇرايدى. ال قازاقستاندىق ونىمگە 9 300 تەڭگە تولەۋگە تۋرا كەلىپ وتىر», دەدى ءا.ماعاۋوۆ.
بۇدان بولەك, جيىن بارىسىندا مۇناي جانە ەنەرگەتيكا سالاسىنداعى جوسپارلار دا ايتىلدى. ماسەلەن مۇناي جانە گاز ءوندىرۋ بويىنشا قازاقستانداعى ەڭ ۇلكەن ءۇش مەكەن – تەڭىز, قاراشىعاناق جانە قاشاعان ەل ەكونوميكاسىن دامىتۋعا ەلەۋلى ۇلەس قوسادى. ال 2025 جىلى مۇناي ءوندىرۋ كولەمى 104 ميلليون تونناعا دەيىن جەتپەك.
اباي اسانكەلدى ۇلى,
«ەگەمەن قازاقستان»
