ورال قالاسىندا پارلامەنت سەناتىنىڭ دەپۋتاتى, قازاقستاننىڭ بالا قۇقىقتارى جونىندەگى ۋاكىلى ساۋلە ايتپاەۆانىڭ قاتىسۋىمەن دوڭگەلەك ۇستەل ءوتتى, دەپ حابارلادى سەناتتىڭ ءباسپاسوز قىزمەتى.
شارا بارىسىندا ايماقتاعى كامەلەتكە تولماعانداردىڭ قۇقىن قورعاۋ جانە قامتاماسىز ەتۋ, بالالار اراسىنداعى قۇقىق بۇزۋشىلىقتاردىڭ الدىن الۋ, دەنساۋلىق ساقتاۋ, سونداي-اق جەتىم بالالار قۇقىقتارىنىڭ ساقتالۋى ماسەلەلەرى قارالدى. ۇكىمەتتىك ەمەس ۇيىمداردىڭ وكىلدەرى وسى سالاداعى جاعدايدى جاقسارتۋ, ءبىلىم بەرۋ جانە تاربيە مەكەمەلەرى جۇيەسىن جەتىلدىرۋ, مەملەكەت پەن قوعامدى ۇيلەستىرۋ جونىندەگى ءوز ۇسىنىستارىمەن ءبولىستى. ءوز كەزەگىندە س.ايتپاەۆا ولاردىڭ ساۋالدارىنا جاۋاپ بەرىپ, ەلىمىزدەگى بالا قۇقىقتارى جونىندەگى ۋاكىل ينستيتۋتىن دامىتۋ مەن ەلدەگى كامەلەتكە تولماعانداردىڭ قۇقىقتارىن قورعاۋدى قامتاماسىز ەتۋ تۋرالى اڭگىمەلەدى.
سەناتور, سونداي-اق قالادا وتكەن ترانسشەكارالىق سۋ جونىندەگى ىنتىماقتاستىق ماسەلەلەرىنە ارنالعان حالىقارالىق كونفەرەنتسيا جۇمىسىنا قاتىستى. فورۋمعا پارلامەنتتىڭ, ورتالىق جانە جەرگىلىكتى بيلىك ورگاندارىنىڭ, عىلىمي قاۋىمداستىقتىڭ, ازاماتتىق قوعامنىڭ, قازاقستان, رەسەي, اۋستريا, وزبەكستان جانە باسقا دا ەلدەردىڭ ساراپشىلار قوعامداستىعىنىڭ 130-دان استام وكىلى جينالدى. كونفەرەنتسيا بارىسىندا جايىق وزەنىنىڭ سۋ رەسۋرستارىن باسقارۋ جونىندەگى ەكىجاقتى جانە كوپجاقتى ىنتىماقتاستىقتى نىعايتۋ مۇمكىندىكتەرى, سونداي-اق سۋ رەسۋرستارىن قورعاۋ ماسەلەلەرى بويىنشا شەشىم قابىلداۋداعى جۇرتشىلىقتىڭ ءرولى تالقىلاندى.
***
سەنات دەپۋتاتتارى ەربولات مۇقاەۆ پەن ناريمان تورەعاليەۆ جۇمىس بابىنداعى ساپارمەن باتىس قازاقستان وبلىسىنداعى جانىبەك اۋدانىنا كەلدى, دەپ حابارلادى سەناتتىڭ ءباسپاسوزى قىزمەتى.
ولار وبلىستىق جانە اۋداندىق ءماسليحات دەپۋتاتتارىمەن, ارداگەرلەرمەن, ۇكىمەتتىك ەمەس جانە جاستار ۇيىمدارىنىڭ, بۇقارالىق اقپارات قۇرالدارىنىڭ وكىلدەرىمەن كەزدەستى. كەزدەسۋدە اۋداندىق ارداگەرلەر كەڭەسىنىڭ توراعاسى امانگەلدى ۋاليەۆ, اۋدان اكىمىنىڭ ورىنباسارى جاقسىلىق ابدولوۆ, «شۇعىلا» گازەتىنىڭ ديرەكتورى-باس رەداكتورى احمەديار باتىرحانوۆ, اۋداندىق ءماسليحات دەپۋتاتى بەرىك ىقسانوۆ, ەڭبەك ارداگەرى ساميعا قايىروۆا, كاسىپكەرلەر پالاتاسىنىڭ باتىس قازاقستان وبلىستىق بولىمشەسىنىڭ ديرەكتورى جاسۇلان باسىروۆ ءسوز الىپ, ولار اۋدانداعى «رۋحاني جاڭعىرۋ» باعدارلاماسىن ىسكە اسىرۋ بارىسىنان حاباردار ەتىپ, وزگە دە وزەكتى ماسەلەلەر تۋرالى ويلارىن ورتاعا سالدى. اتاپ ايتقاندا, جانىبەك اۋدانىنداعى اكادەميالىق باقتى ارناۋلى ۇيىم رەتىندە قۇرۋ, وبلىس ورتالىعىنان شالعايدا جاتقان جانىبەك, بوكەيوردا جانە قازتالوۆ اۋداندارىن 2021 جىلعا دەيىن كەڭجولاقتى ينتەرنەتپەن قامتاماسىز ەتۋ, جانىبەك اۋدانىنا «باتىر اۋدان» مارتەبەسىن بەرۋ ماسەلەلەرىن كوتەردى. ال اگرارلىق مەكەمە وكىلدەرى سەناتورلارعا اۋىل شارۋاشىلىعىنىڭ وزەكتى ماسەلەلەرىن جەتكىزدى. سونداي-اق ورال-جانىبەك اۆتوموبيل جولىنىڭ قۇرىلىسىن جەدەلدەتۋ تۋرالى ۇسىنىس ايتىلدى.
ساپار بارىسىندا ە. مۇقاەۆ پەن ن. تورەعاليەۆ اۋداننىڭ ەلدى مەكەندەرىن گازبەن جانە اۋىز سۋمەن قامتاماسىز ەتۋمەن, اۋىل ىشىندەگى جولداردى جوندەۋ جۇمىستارىمەن تانىستى.
