ەركەكشوپ, بيدايىق, ميا, بوزعاناق, بۇيىرعىن, بوزجۋسان, قوڭىرجۋسان, جەرجۋسان, كوكپەك, بالىقكوز, تۇزجاپىراق, اجىرىق, قاراشاعىر, اق شاعىر, قارعاتۇياق, قوڭىرباس, اقسەلەۋ دەيسىڭ بە, ءبارى بار. كەشەگى كەڭەس زامانىندا ساۋىرىنا سوقا تيمەگەن جەر قۇنارى تىم جاقسى.
سولتۇستىك وڭىردە مال ازىعى وتە ماڭىزدى. وسىدان ەكى-ءۇش جىل بۇرىن اقپان-قاڭتاردا جاۋىن جاۋىپ, جايىلىمنىڭ ءبارى اق قار, كوك مۇز بولىپ, مالساق قاۋىم جۇگەن ۇستاپ قالا جازداعان. سول ءبىر اۋىر جىلداردان ساباق العان مال باققان جۇرت قازىر جادىراعان جاز ايلارىندا شامالارى كەلگەنشە تىربانىپ, جەم-ءشوپ قورىن جاساۋعا بارىنشا ىنتالى. «ك جانە شاريپوۆ» شارۋا قوجالىعىنىڭ 500 گەكتار شابىندىق القابى ەڭبەك دۇبىرىنە بولەنگەن. قازىر مۇندا شوپشىلەر بريگاداسى قاۋىرت ەڭبەك ۇستىندە. بىرنەشە تراكتور قويۋ وسكەن ءشوپتى شاۋىپ جاتسا, كەلەسىلەرى ءشوپ دەگدىپ, كەبىسىمەن كوك بوياۋىن جويماي, تىرمالاپ جيناپ, تەڭدەپ جاتىر.
– ءبىزدىڭ شارۋا قوجالىعىندا مىڭعا جۋىق قارا مال بار, –دەيدى شارۋاشىلىق باسشىسى قۇتتىمبەت ءشارىپوۆ, – شاما كەلسە بيىلعىداي ءشوپ جاقسى شىققان كەزدە ەكى جىلدىق قور جيناپ الۋدى مەجەلەپ وتىرمىز. تابيعاتتىڭ تارتۋىن ەلەمەۋدىڭ ءوزى كۇنا عوي. جىگىتتەر جاقسى جۇمىس ىستەپ جاتىر. اسىرەسە, تورەبەك ءشارىپ, قاناي راقىمجانوۆتار شابىندىققا شالعى سالعان جىگىتتەرگە ۇلگى.
بيىلعى جاز جاۋىن-شاشىندى. قول بوگەيتىنى دە سول ەكەن. دەگەنمەن, ابجىلدىك تانىتقان ازاماتتار القاپتاعى شوككەن تۇيەدەي تەڭ-تەڭ بولىپ جاتقان بۋىلعان ءشوپتى كىدىرتپەي قىستاق باسىنا تاسىمالداۋدا. ساباقتى ينە ساتىمەن ورىلعان كۇندەرى ەلۋ-الپىس توننا ءشوپ تاسىمالدانادى. شوپشىلەردىڭ تاماعى تەگىن, ماۋسىمدىق جۇمىس كەزىندە ەڭبەكاقىلارى 150 مىڭ تەڭگەدەن اينالۋدا.
سولتۇستىكتە قىم-قۋىت ناۋقان بولىپ ەسەپتەلەتىن ءشوپ دايىنداۋ ەندى باستالدى. بىرەر كۇننەن سوڭ جوكەيدىڭ جاعاسى, بۇلاندىنىڭ بۇيىعىپ جاتقان دالاسى شالعىنىڭ سىرىلىمەن ەڭبەك اۋەنىنە بولەنەتىن بولادى.
بايقال ءبايادىل,
«ەگەمەن قازاقستان»
اقمولا وبلىسى,
ءبىرجان سال اۋدانى
