ەكى جاققا بىردەي قولايلى «قىزىلوردا-تاشكەنت-قىزىلوردا» تۇراقتى مارشرۋتى اشىلدى.
كۇندىزگى ساعات بەستە جۇرەتىن اۆتوبۋستاردىڭ بيلەتى ەرەسەكتەر ءۇشىن 3 مىڭ تەڭگە. ال, جەتى مەن ون ەكى جاس ارالىعىنداعى بالالار ءۇشىن ءبىر جارىم مىڭ تەڭگە تۇرادى.
– ەكى مەملەكەت باسشىلارىنىڭ كەلىسىمى ارقاسىندا شەكارا اشىلىپ, قازاق-وزبەك قاتىناسىنىڭ اياسى كەڭەيدى. ەندى جولاۋشىلارىمىز جايلى زاماناۋي اۆتوبۋستار ارقىلى دىتتەگەن جەرىنە بارا الادى, – دەيدى «سالتانات» جشس باسشىسى بايانباي سىزدىقوۆ.
بۇرىن وزبەكستانعا بارۋ ءۇشىن كولىك اۋىستىرىپ, جارتى كۇن ۋاقىتىن جولدا وتكىزەتىن جولاۋشىلار قۋانۋلى.
ايتا كەتەيىك, بۇگىنگى تاڭدا وبلىس اۋماعىندا 212 ەلدى مەكەندى اۋدان جانە وبلىس ورتالىعىمەن بايلانىستىراتىن 211 اۆتوبۋس مارشرۋتى ۇيىمداستىرىلعان. سونىمەن قاتار, وبلىس ورتالىعىنان استانا, الماتى, اقتوبە, تۇركىستان, شىمكەنت, جەزقازعان, سارىاعاشقا قالاارالىق اۆتوبۋستار قاتىنايدى.
باقتيار تايجان,
«ەگەمەن قازاقستان»
قىزىلوردا وبلىسى
