اعىمداعى جىلدىڭ 16 شىلدەسى مەن 3 تامىزى ارالىعىندا «باتىس» وڭىرلىك قولباسشىلىعىنىڭ وقۋ-جاتتىعۋ پوليگوندارى مەن تۇراقتى ديسلوكاتسيالانۋ پۋنكتتەرىنىڭ جانىندا اسكەري قىزمەتشىلەر تاجىريبە جۇزىندە رحب بارلاۋ, تەحنيكانى دەگازاتسيالاۋ جانە دەزاكتيۆاتسيالاۋ, ۋلانعان ايماقتاردان ءوتۋ, جىلجىمالى جانە جىلجىمايتىن ءتۇتىن شىمىلدىعىن جاساۋ بويىنشا وزدەرىنىڭ ارنايى ماشىقتىلىعىن ارتتىرادى.
«باتىس» وڭىرلىك قولباسشىلىعىنىڭ رادياتسيالىق, حيميالىق جانە بيولوگيالىق قورعاۋ اسكەرلەرىنىڭ باستىعى پولكوۆنيك ءادىل ماحامبەتوۆتىڭ ايتۋى بويىنشا, «دالالىق جاتتىعۋلار بارىسىندا رحب بارلاۋ ماشينالارى مەن باسقا دا ارنايى تەحنيكالار قولدانىلاتىن بولادى. سونىمەن قوسا, «شمەل» رەاكتيۆتى جاياۋ اسكەرلەرىنىڭ وق شاشقىشىنىڭ اتىستارى جوسپارلانعان. شارتتى تۇردەگى ۋلانعان ايماقتار انىقتالىپ, ولاردى زالالسىزداندىرۋ بويىنشا ارنايى ءىس-شارالار ورىندالىپ, جەكە قۇرامنىڭ, اسكەري تەحنيكانىڭ جانە قارۋدىڭ ارنايى وڭدەۋ جۇمىستارى جۇرگىزىلەدى. وقۋ ورىندارىندا اەروزولدى بۇركەۋ, شارتتى قارسىلاستىڭ ناقتى دالدەۋ جانە بارلاۋ قۇرالدارىنا قارسى تۇرۋ بويىنشا نورماتيۆتەردەن سىناق قابىلدانادى.
بۇگىنگى كۇنى, رادياتسيالىق, حيميالىق جانە بيولوگيالىق قورعاۋ اسكەرلەرىنىڭ باستى مىندەتى - قارسىلاستىڭ جاپپاي جويۋ قارۋىن قولدانۋ سالدارىنان رادياتسيالىق, حيميالىق جانە بيولوگيالىق قاۋىپتى تومەندەتۋ, وبەكتىلەردىڭ قيراتىلۋ زاردابى مەن ماسشتابىن تابۋ جانە باعالاۋ, راديواكتيۆتى, ۋلاعىش, ۋىتتى زاتتار مەن بيولوگيالىق قۇرالداردان جەكە قۇرامدى قورعاۋ, اسكەرلەر مەن وبەكتىلەردىڭ كورىنۋىن تومەندەتۋ بولىپ تابىلادى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
