رەسمي دەرەكتەرگە سۇيەنسەك, جىل سايىن قازاقستاندا بالالار مەن جەتكىنشەكتەردىڭ 91 پايىزى جازعى دەمالىسىن 11 مىڭنان استام ءتۇرلى ۇلگىدەگى ساۋىقتىرۋ كەشەندەرىندە وتكىزەدى ەكەن.
اقمولا وبلىستىق ءبىلىم باسقارماسىنىڭ مالىمەتىنشە, 2017-2018 وقۋ جىلىندا 1-10 سىنىپ وقۋشىلارىنىڭ سانى 111700 جەتكىنشەكتى قۇرادى. اعىمداعى جاز مەزگىلىندە 110583 بالا وقۋ-ساۋىقتىرۋ جوبالارىنا قاتىسادى. بۇل – جەتكىنشەكتەر قۇرامىنىڭ 99 پايىزدىق كورسەتكىشى. ءوڭىر بويىنشا وقۋشىلاردى ساۋىقتىرۋمەن 13 مەملەكەتتىك جانە 6 جەكەمەنشىك لاگەر اينالىسادى. مەملەكەتتىك لاگەرلەردىڭ سەگىزى تابيعي سۋ قويمالارىنىڭ ماڭىندا ورنالاسسا, قالعان بەسەۋىنىڭ اشىق اسپان استىنداعى باسسەيندەرى بار. مۇنداي نىسانعا زەرەندى اۋدانىنداعى «سۇڭقار» لاگەرى جاتادى.
اقمولا وبلىسىندا جازعى دەمالىستى ۇيىمداستىرۋ بويىنشا قىزۋ جۇمىس جۇرگىزىلۋدە. ماسەلەن, وبلىستىڭ 650-گە جۋىق ءبىلىم ورداسى قىزىقتى جازعى باعدارلامالار مەن ارنايى جوبالار ۇسىنىپ وتىر. سونىمەن قاتار وقۋشىلاردىڭ تانىمدىق قىزىعۋشىلىقتارىن دامىتۋ ماقساتىندا اعىلشىن ءتىلىن ۇيرەنۋگە ارنالعان باعدارلامالار ۇيىمداستىرىلدى. جاس ەكولوگتار جازعى دەمالىستارىن شاتىرلى, كيىز ءۇي, ەكولوگيالىق جانە سپورتتىق لاگەرلەردە وتكىزۋ مۇمكىندىگىنە دە يە بولۋدا. جازعى وقۋ-ساۋىقتىرۋ مەكەمەلەرىنە جىبەرۋ جولداماسىنا كوپ بالالى وتباسىنان شىققان, جەتىم, قامقورشىسىنان ايىرىلعان, مۇگەدەك بالالار يە.
جىل سايىن وبلىستىق ءبىلىم باسقارماسى سانيتارلىق-ەپيدەميولوگيالىق قىزمەت وكىلدەرىمەن بىرلەسە وتىرىپ, ەلىمىزدىڭ مەملەكەتتىك بالالار ساۋىقتىرۋ لاگەرلەرىن جوسپارلى تۇردە تەكسەرىستەن وتكىزەدى. تەكسەرىس ناتيجەسىندە 2017- 2018 جىلدار ارالىعىندا زاڭسىز جۇمىس ىستەيتىن لاگەرلەر انىقتالعان جوق. وقۋشىلاردىڭ اسكەري-پاتريوتتىق سەزىمىن ارتتىرۋ ماقساتىندا «زۆەزدنىي» بالالار ساۋىقتىرۋ ورتالىعىندا 200-دەن استام بالانى قامتيتىن شاتىرلى كەشەن ۇيىمداستىرىلىپ, العاشقى دەمالۋشىلارىن قارسى الدى. مەكتەپ وقۋشىلارى مەن ستۋدەنتتەرگە ارنالعان « ۇلى دالا ەلى» اتتى تۋريستىك-ايماقتىق زەرتتەۋ ەكسپەديتسياسى تامىز ايىنا دەيىن جالعاسىن تابادى. بۇل اۋقىمدى جوبادا 5 مىڭنان استام قاتىسۋشى ەل تاريحى مەن شەجىرەسىن زەردەلەيتىن بولادى. قۇرامىنا 500 ادامدى جيناعان تۋريستىك توپ بۋراباي اۋدانىندا رەسپۋبليكالىق جيىن وتكىزسە, 10 مىڭعا جۋىق وقۋشى اقمولا وبلىسى جانە ەلىمىزدىڭ باسقا دا ايماقتارىنا ساپار شەكپەك. سونداي-اق جۇزدەن استام مەكتەپ وقۋشىسى اۋىل ءومىرىن زەرتتەپ, سالت-داستۇرلەرمەن تانىسۋعا باعىتتالعان ء«بىر اپتا اۋىلدا» الەۋمەتتىك باستاماسىنا قاتىسۋ نيەتىن ءبىلدىردى.
بوتاكوز امالبەك,
ل.ن.گۋميلەۆ اتىنداعى ەۇۋ ساياساتتانۋ جانە جۋرناليستيكا فاكۋلتەتىنىڭ ستۋدەنتى
اقمولا وبلىسى
