بۇل جاعداي بىرنەشە جىلدان بەرى تۇرعىنداردىڭ نارازىلىعىن تۋدىرىپ ءجۇر. قالا حالقىنا كۇز-قىس مەزگىلدەرىندە 5 مىڭ تەكشە مەتر سۋ كەرەك بولسا, جازدا بۇل كورسەتكىش 11 مىڭعا دەيىن ارتادى. ال ونى قاناعاتتاندىرۋعا «قازترانسويل» مەكەمەسىنىڭ قاۋقارى جەتپەي كەلدى. ەندى ماسەلە شەشىلدى دەسەك تە بولادى. «قازترانسويل» اق ماگيسترالدى سۋ تاراتقىشى قۇلسارى قالاسىندا سۋ بەرۋ كولەمىن تاۋلىگىنە 9400-دەن 12 000 تەكشە مەترگە دەيىن كوتەردى.
– وبلىس باسشىلىعىنىڭ «قازترانسويل» اق-پەن كەلىسىمىنە سايكەس ەكىجاقتى كوميسسيا قۇرىلدى. كوميسسيا مۇشەلەرى قۇلسارىدا بەرىلەتىن سۋ مولشەرىن كوبەيتۋگە شەشىم قابىلدادى. جاز مەزگىلىندە كۇننىڭ ىستىعى كەسىرىنەن كوپ قاباتتى تۇرعىن ۇيلەردىڭ جوعارعى قاباتىندا تۇراتىندار سۋ پروبلەماسىنا بايلانىستى قيىندىق كورەتىن ەدى. بەرىلەتىن سۋ كولەمىنىڭ كوبەيۋى ارقاسىندا بۇل پروبلەما شەشىلدى, – دەيدى جىلىوي اۋدانىنىڭ اكىمى ازامات بەكەت.
قۇلسارىعا سۋ استراحان-ماڭعىشلاق سۋ قۇبىرى ارقىلى كەلەدى. پايدالانۋعا بەرىلگەنىنە وتىز جىلداي ۋاقىت وتكەن قۇبىر كوپكە دەيىن جوندەۋ كورمەگەن ەدى, ەندى عانا كۇردەلى جوندەۋ جۇمىستارى ءجۇرىپ جاتىر.
باقىتگۇل باباش,
«ەگەمەن قازاقستان»
تىراۋ
