ءبىر اپتا بۇرىن «استانا ارەنا» ستاديونىندا وتكەن كەزدەسۋدە «استانا» رومان مۋرتازاەۆتىڭ پەنالتيدەن سوققان جالعىز گولىنىڭ ارقاسىندا جەڭىسكە جەتكەن ەدى. دەگەنمەن, بۇل ەسەپ فۋتبول ماماندارىنىڭ بولجامى بو-
يىنشا «استانا» ءۇشىن سىرت الاڭدا وتەتىن جاۋاپتى ماتچ الدىندا الاڭدارلىق ناتيجە بولاتىن. ايتكەنمەن 2014 جىلدان بەرى ەۋروكۋبوك ويىندارىندا باق سىناپ, ءبىرشاما تاجىريبە جيناپ ۇلگەرگەن ەلوردالىقتار كەشەگى كەزدەسۋدە جىگەرلى ويىن كورسەتىپ, قازاقستاندا سوقپاعان گولدارىن چەرنوگوريادا سوقتى. ءبىرىنشى تايمنىڭ 38-مينۋتىندا سەرىكجان مۇجىقوۆتان پاس العان دجوردجە دەسپوتوۆيچ ەسەپتى اشسا, ەكىنشى تايمنىڭ 65-مينۋتىندا مۇجىقوۆتىڭ ءوزى گول سالىپ, قورىتىندى ەسەپتى 2:0-گە جەتكىزدى.
وسىلايشا ەكى كەزدەسۋدىڭ قورىتىندىسى بويىنشا 3:0 ەسەبىمەن باسىم تۇسكەن «استانا» چەمپيوندار ليگاسىنىڭ ەكىنشى ىرىكتەۋ كەزەڭىنە جولداما الدى. بۇل سىندا «استانانى» دانيا چەمپيونى «ميتيۋللاند» كومانداسى كۇتىپ تۇر. فۋتبول جانكۇيەرلەرىنىڭ ەسىندە بولسا, ەۋرودودالاردا 2001 جىلدان بەرى تۇراقتى سىنعا ءتۇسىپ كەلە جاتقان بۇل ۇجىم 2015/16 جىلعى ەۋروپا ليگاسىنىڭ پلەي-وفف كەزەڭىندە انگليانىڭ اتاقتى «مانچەستەر يۋنايتەد» كومانداسىن ءوز الاڭىندا قابىلداپ, 2:1 ەسەبىمەن باسىم تۇسكەن. بىراق قارىمتا كەزدەسۋدە «ميتيۋللاند» 1:5 ەسەبىمەن جەڭىلىپ قالعان-دى. «استانا» – «ميتيۋللاند» اراسىنداعى العاشقى كەزدەسۋ 24 شىلدە كۇنى استانادا, قارىمتا ماتچ 1 تامىز كۇنى دانيادا وتەدى.
ايتا كەتەيىك, «استانا» سىرت الاڭدا «سۋتەسكا» كومانداسىن جەڭگەن سوڭ ۋەفا كلۋبتار رەيتينگىندە 57-ورىنعا كوتەرىلىپ الدى. وسىدان تۋرا ءبىر جىل بۇرىن ەلوردا كومانداسى 79-ورىندا تۇرعان بولاتىن.
ءالي بيتورە,
«ەگەمەن قازاقستان»
