«ەلىمىز بويىنشا شومىلۋعا ارنالعان قالالىق جانە جەكەمەنشىك جاعاجايلار انىقتالعان. بۇل جەرلەردە تجك بولىمشەلەرىندە ارنايى دايارلىقتان وتكەن قوعامدىق قۇتقارۋشىلار ەسەبىنەن وبەكتىلىك قۇتقارۋ بەكەتتەرى قۇرىلعان. سۋ ايدىندارىنىڭ قاۋىپتى جانە كۇزەتىلمەيتىن ۋچاسكەلەرىندە قۇتقارۋشىلار تجك ءموبيلدى قۇتقارۋ بەكەتتەرىن ۇيىمداستىردى. تجد اكىمدىكتەرمەن بىرلەسىپ شومىلۋعا تىيىم سالىنعان جەرلەردى بەلگىلەدى. بۇل جەرلەرگە 3 مىڭنان استام تىيىم سالۋ جانە ەسكەرتۋ بەلگىلەرى ورناتىلدى. العاش رەت بيىل ەلىمىز بويىنشا پروفيلاكتيكالىق جۇمىس جۇرگىزۋ ءۇشىن ەرىكتىلەر ۇيىمدارى تارتىلدى. «جاس وتان» جاستار قاناتىمەن بىرگە ءتيىستى جوسپار-كەستە بەكىتىلدى. اتاپ ايتقاندا, بارلىعى 2 مىڭنان استام ۆولونتەر تارتىلدى. ولار 330 اكتسيا وتكىزۋگە, 200 بەينەماتەريال ازىرلەۋگە قاتىستى, 123 مىڭ ۇگىت ءونىمى تاراتىلدى. حالىق اراسىندا 300 مىڭنان استام ۇگىت ونىمدەرى پاراقشالار, جادىنامالار, بروشيۋرالار ۇلەستىرىلدى. ماسەلەن, اعىمداعى جىلعى ساۋىردەن 16 شىلدەگە دەيىن 5 مىڭنان استام رەيد جۇرگىزىلدى», دەدى ول.
سونىمەن بىرگە قابىلدانىپ جاتقان شارالارعا قاراماستان, شومىلۋعا ارنالماعان سۋ ايدىندارىندا ادامداردىڭ قازا بولۋ فاكتىلەرى تىركەلگەنى تۋرالى اقپارات بەرىلدى. بۇل رەتتە سۋعا باتقانداردىڭ 85 پايىزى شومىلۋ ماۋسىمىنىڭ باسىندا تىركەلگەن.
«ەلىمىزدىڭ سۋ ايدىندارىنداعى وقىس جاعدايلاردىڭ نەگىزگى سەبەپتەرىنە توقتالىپ وتەلىك. ءبىرىنشى, ءوز كۇشتەرىن تولىق باعالاماۋ, قاتتى اعىس, اياق-قولدارىنىڭ قۇرىسۋى, بالىق اۋلاۋ كەزىندەگى ەرەجەلەردى ساقتاماۋ, سۋ ايدىندارىنىڭ ماڭىندا قاراۋسىز قالعان بالالاردىڭ سۋعا ءتۇسىپ كەتۋى, جۇزە بىلمەۋ, ماس كۇيىندە شومىلۋ, ءجۇزۋ قۇرالدارىمەن سەرۋەندەگەن كەزدە سۋعا كەتۋ ءجيى كەزدەسەدى», دەدى ول.
ۆيتسە-مينيستر ەل ازاماتتارىن سۋ ايدىندارىنداعى قاۋىپسىزدىك قاعيدالارىنىڭ تالاپتارىن ساقتاۋعا شاقىرادى.
ء«بىرىنشى كەزەكتە تىيىم سالىنعان جانە جابدىقتالماعان ورىنداردا شومىلماۋعا, ماساڭ كۇيىندە سۋعا تۇسپەۋگە, قايىقتاردان, كاتەرلەردەن, ايلاقتاردان, سونداي-اق بەيىمدەلمەگەن قۇرىلىستاردان سۋعا سەكىرمەۋگە, ءجۇزۋ شەگىن بىلدىرەتىن قالتقى بەلگىلەردەن اسپاۋعا, جۇزۋگە ارنالماعان زاتتاردى پايدالانىپ جۇزبەۋگە, تەحنيكالىق جانە ەسكەرتەتىن بەلگىلەرگە, قالتقىلارعا مىنبەۋگە, بالالارعا ەرەسەكتەردىڭ قاراۋىنسىز سۋعا تۇسپەۋگە كەڭەس بەرەمىز», دەدى ىشكى ىستەر ءمينيسترىنىڭ ورىنباسارى.
راۋان قايدار,
«ەگەمەن قازاقستان»
