مينيسترلىكتىڭ حابارلاۋىنشا, بيىلعى جىلعى ماۋسىم ايىندا تۇركىستان وبلىسىنىڭ تۇلكىباس پەن سايرام اۋداندارىنىڭ 72 ەلدى مەكەنىندە, سونداي-اق ارىس قالاسىندا «شالقار» راديوسىنىڭ تاراتىلىمىن كەڭەيتۋ جۇمىستارى تولىق اياقتالعان. وسىنىڭ ناتيجەسىندە 185 مىڭ ادام ۇلتتىق راديو يگىلىگىن كورەدى.
شەكارالىق ايماقتاردا وتاندىق راديو حابار تاراتۋ جۇمىستارى الداعى ۋاقىتتا ودان ءارى جالعاسادى. دەمەك بۇگىنگى قادام اقپاراتتىق قاۋىپسىزدىك سالاسىنداعى ىرگەلى شارالاردىڭ باستاۋى بولىپ وتىر.
جالپى, بۇل بۇعان دەيىن ەل تۇرعىندارى مەن دەپۋتاتتار تاراپىنان ءجيى كوتەرىلگەن تۇيتكىلدىڭ ءبىرى. ەلىمىزدىڭ شەكارالىق ايماقتارىنداعى وتاندىق راديو حابارلارىن تاراتۋ ماسەلەسىن رەتتەۋدى سۇراعان وتىنىشتەر مينيسترلىككە دە كوپتەپ كەلگەنىن ايتادى, مينيسترلىكتىڭ ءباسپاسوز قىزمەتى. الايدا تالاي جىلدان بەرى قوردالانعان پروبلەمانى شەشۋگە ءبىراز ۋاقىت كەرەك ەدى. العاشقىدا مينيسترلىك بۇكىل قازاقستان بويىنشا مەملەكەتتىك راديوستانسالاردىڭ قامتۋ اياسىنا تالداۋ جاساعان. وسى زەرتتەۋلەرگە قاراعاندا ەلىمىزدىڭ ءبىراز اۋماعىندا, ونىڭ ىشىندە شەكاراعا جاقىن ايماقتاردا, اسىرەسە وڭتۇستىك وڭىرلەردە وتاندىق راديوسيگنالداردىڭ وتە ناشار ەكەندىگى انىقتالىپتى. ەسەسىنە, جەرگىلىكتى جۇرتشىلىقتىڭ راديو قابىلداعىشتارىندا كورشىلەس قىرعىز, وزبەك, رەسەي, ءتىپتى قىتايدىڭ راديولارى ساڭقىلداپ تۇرعان. بۇل ءبىر مەزەتتىك ماسەلە بولماعاندىقتان, مينيسترلىك تاراپىنان اۋەلى وتاندىق راديوحاباردى دامىتۋ تۋرالى ارنايى كەشەندى جوسپار ازىرلەندى. وسىنىڭ اياسىندا «قازاق راديوسى», «شالقار» سياقتى راديوستانتسيا ەفيرلەرىن بۇكىل قازاقستان اۋماعىنا تاراتۋعا باسىمدىق بەرىلدى.
وسىدان ءبىر جىل بۇرىن «ەگەمەن قازاقستانعا» سۇحبات بەرگەن اقپارات جانە كوممۋنيكاتسيالار ءمينيسترى داۋرەن اباەۆ: «توزعان سيگنال تاراتقىشتاردى اۋىستىرۋ ارقىلى مەملەكەتتىك راديوحابار جەلىسىن جاڭعىرتۋدى قولعا الىپ وتىرمىز. سوندا راديوحابارلارىمىز قالا مەن اۋىل تۇرعىندارىندا بىردەي دەڭگەيگە جەتەدى. سونىمەن بىرگە راديولاردىڭ مازمۇنىن جاقسارتۋ جۇمىستارى دا جۇرگىزىلىپ جاتىر», دەگەن بولاتىن. مىنە, جاقسى جاڭالىقتىڭ جاڭعىرىعى ەستىلگەن بويدا يگىلىگى دە كوپ كۇتتىرگەن جوق.
اقپارات جانە كوممۋنيكاتسيالار مينيسترلىگى مەديا تالداۋ باسقارماسىنىڭ باسشىسى ءمادي ۋايسوۆتىڭ ايتۋىنشا, بوس راديوجيىلىكتەردى پايدالانۋعا قاتىستى اشىق كونكۋرس وتكىزىلىپ, راديوحابارلار تاراتۋ اۋماعى كەڭەيە تۇسكەن. ال شەكاراعا جاقىن ەلدى مەكەندەرگە راديو جيىلىگىن تارتۋ ءۇشىن حالىقارالىق ۇيىمداردىڭ كەلىسىمى قاجەت جانە بۇل جۇمىستار ەداۋىر كۇش پەن ۋاقىتتى تالاپ ەتەدى. ويتكەنى قازاقستاننىڭ شەكاراعا جاقىن ستانسالارى كورشى مەملەكەتتەردىڭ اۋماعىنا اسىپ وتەتىندىكتەن, الەمدىك تاجىريبە بويىنشا حالىقارالىق رۇقساتتاما جۇيەسى ارقىلى جۇزەگە اسىرىلادى. وسىعان قاراماستان, مينيسترلىك تاراپىنان ءبىرىنشى كەزەكتە وسى شەكاراعا جاقىن ەلدى مەكەندەردى وتاندىق اقپارات قۇرالدارىنىڭ حابارلارىمەن قامتۋعا باسىمدىق بەرىلگەن.
جالپى, وتاندىق تەلەۆيزيا مەن راديو سالاسىنىڭ باسەكەگە قابىلەتتىلىگىن ارتتىرۋ, قامتۋ اۋماعىن كەڭەيتۋ بويىنشا جوعارىدا اتالعاننان بولەك كەشەندى شارالار قولعا الىنىپ جاتقانىن ايتا كەتكەن ءلازىم. سونىڭ ءبىرى – تەلەارنالاردىڭ انالوگتىق حابار تاراتۋدان تسيفرلىق حابار تاراتۋ جۇيەسىنە كوشىرىلۋى. مينيسترلىكتىڭ مالىمەتتەرىنە قاراعاندا, بيىلعى جىلدىڭ قازان ايىندا ماڭعىستاۋ وبلىسى, ال جەلتوقسان ايىندا تۇركىستان مەن جامبىل وبلىستارىنا حابار تاراتۋ تولىقتاي تسيفرلى جۇيەگە اۋىسادى. وزگە وڭىرلەر ءارى قاراي كەزەڭ-كەزەڭىمەن كوشىرىلەدى. بۇل رەتتە مينيسترلىك جەرگىلىكتى اكىمدىكتەرمەن بىرلەسە وتىرىپ تۇرعىنداردى تسيفرلى جۇيەنى پايدالاناتىن قۇرىلعىلارمەن قامتۋ جوسپارىن دا بەكىتكەن.
ال راديوحابارلارىن تاراتۋ ايماعىن كەڭەيتۋگە قايتا توقتالار بولساق, بۇل ارىس پەن مانكەنتكە راديو قابىلداعىشتى اپارىپ, توققا قوسا سالۋ ەمەس. العاشقى تالداۋدان باستاپ, ورتالىق پەن جەرگىلىكتى جەرلەردەگى راسىمدىك شارالار, كەلىسىمدەر مەن زاڭ تالاپتارىنا بايلانىستى قۇجاتتاردىڭ ءوزىن ازىرلەۋگە وراسان كۇش جۇمسالادى. بۇعان قوسا قازاقستاننىڭ بايتاق دالاسىندا راديوستانسالاردى كوبىرەك جانە جيىرەك سالۋ دا قاجەت, ول قوماقتى رەسۋرستى قاجەت ەتەدى.
جارتى عاسىردان استام ۋاقىت بويى ۇلتتىڭ ءۇنجارياسى بولىپ كەلە جاتقان «شالقاردىڭ» كوكجيەگى كەڭەيە تۇسكەن ەلدىڭ قۋانىشى.
– بۇل تىڭدارماندارىمىزدىڭ ۇزاق كۇتكەن قۋانىشى. بۇگىنگى ءىس-شارانى ۇلكەن شارۋانىڭ باسى دەپ ويلايمىن. «شالقاردى» ۇلتتىڭ ءۇنى, ءۇنجارياسى دەپ اسپانداتىپ, اسقاقتاتىپ ايتىپ ءجۇر ەدىك, ەندى مىنە ءسوز بەن ءىس قابىسىپ جاتىر, – دەيدى «شالقار» راديوسىنىڭ ديرەكتورى قالقامان سارين.
سەرىك ابدىبەك,
«ەگەمەن قازاقستان»
