الماتى قالالىق ىشكى ىستەر دەپارتامەنتى وكىلدەرىنىڭ مالىمدەۋىنشە, وقيعا بەيسەنبى كۇنى كۇندىزگى ساعات 15:00 شاماسىندا الماتى قالاسىنداعى قۇرمانعازى مەن بايسەيىتوۆا كوشەلەرىنىڭ قيىلىسىندا بولعان. «دەنيس يۋرەۆيچ تەن كولىگىنەن اينا ۇرلاپ جاتقان انىقتالماعان ەكى ادامنىڭ ۇستىنەن تۇسكەن. جانجال بارىسىندا دەنيس تەنگە پىشاق جاراقاتى تيگەن. وسى دەرەك بويىنشا تەرگەۋ باستالىپ, كۇدىكتىلەردى ۇستاۋعا باعىتتالعان بارلىق شارا جۇرگىزىلىپ جاتىر», دەدى ءىىد وكىلدەرى.
ال الماتى قالالىق دەنساۋلىق ساقتاۋ باسقارماسى تاراتقان مالىمەت بويىنشا, 19 شىلدە كۇنى جەدەل جاردەم ستانساسىنىڭ پۋلتىنە ساعات 14:56-دا پىشاق جاراقاتىن العان ادامعا بايلانىستى شاقىرتۋ تۇسكەن. وقيعا ورنىنا جەدەل جاردەم بريگاداسى شۇعىل تۇردە اتتانىپ, ناۋقاس دەنيس تەن جەدەل جاردەم كولىگىمەن ورتالىق قالالىق كلينيكالىق اۋرۋحاناسىنا جەتكىزىلگەن. دارىگەرلەردىڭ الدىن الا دياگنوزى بويىنشا, وعان وڭ جاق جوعارعى سانىنىڭ جاراقاتى, سان تامىرلارىنىڭ جاراقاتى جانە قان جوعالتۋ دياگنوزى قويىلعان.
وسى وقيعادان ەكى ساعاتتان كەيىن الماتىداعى ورتالىق قالالىق كلينيكالىق اۋرۋحانادا دەنيس تەننىڭ قايتىس بولعاندىعى تۋرالى سۋىت اقپارات حابارلاندى. اتالعان اۋرۋحانانىڭ باس دارىگەرىنىڭ ورىنباسارى ەرجان قۇتتىعوجيننىڭ ايتۋىنشا, دەنيس تەن اۋرۋحاناعا ساعات 15.23-تە جەتكىزىلگەن. «مارقۇمنىڭ بارلىق تۋىسى مەن جاقىنىنا كوڭىل ايتامىن. كەنەتتەن كەلگەن ءولىم بولدى. كلينيكاعا اسا اۋىر جاعدايدا ءتۇستى. ەكى ساعاتتان اسا ۋاقىت بويى جۇرەگى مەن وكپەسىنە جانساقتاۋ شارالارى جۇرگىزىلدى. بىراق, امال نە, قايتىس بولدى. ومىرلىك ماڭىزى بار ورگاندارىنداعى جاراقاتتاردىڭ سالدارىنان ەستەن تانىپ قايتىس بولدى», دەپ ءتۇسىندىردى دارىگەر.
دەنساۋلىق ساقتاۋ ءمينيسترى ەلجان ءبىرتانوۆ سپورتشى دەنيس تەننىڭ قازاسى تۋرالى تۇسىنىك بەردى. «بۇگىن ساعات 14:56-دا جەدەل جاردەم قىزمەتىنە كوشەدە بەلگىسىز ادامنىڭ پىشاق جاراقاتىمەن جاتقانى تۋرالى حابار كەلىپ ءتۇستى. ەكى مينۋتتا شاقىرۋ بريگاداعا جىبەرىلدى جانە 10 مينۋتتا جەدەل جاردەم بريگاداسى وقيعا ورنىنا جەتتى. 11 مينۋتتا ناۋقاس جەدەل ستاتسيونارعا جەتكىزىلدى. جەدەل جاردەم ماشيناسىندا رەانيماتسيالىق شارالار جاسالدى. جول ۇستىندە اۋرۋحاناعا حابار بەرىلىپ, ناۋقاستى حيرۋرگتار توبى كۇتىپ الدى. دارىگەرلەر بىردەن وتا جاساپ, ەكى ساعات بويى جانساقتاۋ بولىمىندە سپورتشىنىڭ ءومىرى ءۇشىن كۇرەستى. بىراق قاندى كوپ جوعالتقاندىقتان, 17:30-دا دەنيس تەن قايتىس بولدى. دارىگەرلەر تاراپىنان بارلىق كومەك تولىق كورسەتىلدى. بىراق جەدەل جاردەمگە حابار بەرىلگەنشە سپورتشى كوپ قان جوعالتقان ەدى. قاننىڭ كوپ كەتۋى قاشاندا ومىرگە قاۋىپ توندىرەتىن فاكتورلاردىڭ ءبىرى. وقيعانىڭ ەگجەي-تەگجەيى پاتولوگيالىق-اناتوميالىق زەرتتەۋدەن كەيىن انىقتالادى», دەدى مينيستر.
دەنيس تەننىڭ قازاسىنا بايلانىستى مادەنيەت جانە سپورت ءمينيسترى ارىستانبەك مۇحامەدي ۇلى پىكىر ءبىلدىرىپ, تۋعان-تۋىستارىنىڭ قايعىسىنا ورتاقتاسىپ كوڭىل ايتتى.
«دارىندى مانەرلەپ سىرعاناۋشى, ءبىزدىڭ سپورتىمىزدىڭ اڭىزى دەنيس تەن دارىگەرلەردىڭ بارىن سالعانىنا قاراماستان, قايتىس بولدى. ونىڭ جاسى ەندى عانا 25-كە تولعان ەدى... بارلىعى دا ونى جاقسى كورۋشى, قۇرمەتتەۋشى ەدى. وسىدان ءبىر اي بۇرىن عانا استانادا «دەنيس تەن جانە ونىڭ دوستارى» اتتى مۇزدى شوۋى ءوتتى. وعان الەمنىڭ ءتۇرلى ەلدەرىنەن مانەرلەپ سىرعاناۋشى جۇلدىزدار جانە اتاقتى جاتتىقتىرۋشى تاتيانا تاراسوۆا كەلدى. دەنيستىڭ مۇزدى شوۋى استانانىڭ 20 جىلدىعىنا ارنالدى. ال بۇگىن ءبىزدىڭ «التىن بالا» دەنيس باۋكەسپە ۇرىلاردىڭ قولىنان قازا تاپتى...», دەپ جازدى مينيستر فەيسبۋكتەگى پاراقشاسىندا.
مانەرلەپ سىرعاناۋدان جاستار جانە ەرەسەكتەر اراسىندا بىرنەشە دۇركىن ەل چەمپيونى اتانعان دەنيس تەن ماۋسىم ايىنىڭ 13-ءى كۇنى 25 جاسقا تولعان. 2011 جىلى استانا مەن الماتىدا وتكەن قىسقى ازيا ويىندارىنىڭ چەمپيونى, 2013 جىلعى الەم چەمپيوناتىنىڭ جۇلدەگەرى, 2014 جىلعى سوچي وليمپياداسىنىڭ سوڭعى كۇنىندە قورجىنعا قولا جۇلدە سالىپ, قازاقستان قۇراماسىنىڭ سپورتشىلارىن ەلگە جۇلدەسىز قايتۋدان ساقتاپ قالعان بولاتىن. سونداي-اق دەنيس 2015 جىلعى ءتورت قۇرلىق چەمپيوناتىندا توپ جارعان. حالىقارالىق كونكيمەن سىرعاناۋ وداعىنا (ISU) ەنەتىن ءتۇرلى حالىقارالىق تۋرنيرلەردىڭ جەڭىمپازى جانە جۇلدەگەرى اتانعان. بىلتىر عانا ەلىمىزدە دۇركىرەپ وتكەن قىسقى ۋنيۆەرسياداعا قاتىسىپ, قازاقستانعا التىن جۇلدە سىيلاعان ەدى.
دەنيس تەن 2011 جىلى قازاقستان رەسپۋبليكاسىنىڭ تاۋەلسىزدىگىنە 20 جىل مەدالىمەن, 2013 جىلى اتىراۋدا وتكەن «مەنىڭ قازاقستانىم» اتتى VI رەسپۋبليكالىق پاتريوتتار فورۋمىنا قاتىسىپ, «قازاقستاندى الەمگە تانىتقان» اتالىمى بويىنشا ماراپاتتالعان. 2014 جىلى مادەنيەت جانە سپورت مينيسترلىگىنە قاراستى سپورت جانە دەنە شىنىقتىرۋ ىستەرى كوميتەتىنىڭ «جىل سپورتشىسى» اتاعىن جەڭىپ العان. ءدال سول جىلى سوچي وليمپياداسىنىڭ قولا جۇلدەگەرى اتانعانى ءۇشىن وعان «قۇرمەت» وردەنى بەرىلدى. 2015 جىلى قازاقستان حالقى اسسامبلەياسىنىڭ 20 جىلدىق مەدالى مەن 2017 جىلى قازاقستان رەسپۋبليكاسى ۇكىمەتىنىڭ № 821 جارلىعىمەن دەنيس تەن «سپورت» نوميناتسياسى بويىنشا «دارىن» مەملەكەتتىك جاستار سىيلىعىنا يە بولدى. سونداي-اق دەنيس تەن قازاقستان رەسپۋبليكاسىنا ەڭبەگى سىڭگەن سپورت شەبەرى.
دەنيس تەننىڭ مەزگىلسىز قايتىس بولۋىنا بايلانىستى «ەگەمەن قازاقستان» گازەتى ۇجىمىنىڭ اتىنان مارقۇمنىڭ وتباسىنا, تۋعان-تۋىسقاندارىنا قايعىرىپ كوڭىل ايتامىز.
قوش بول, دەنيس!
Cەرىك جاراسباەۆ, سپورت جانە دەنە شىنىقتىرۋ ىستەرى كوميتەتىنىڭ توراعاسى:
– قازاقستان حالقى, قازاق سپورتى اۋىر قايعىعا دۋشار بولدى. ورنى تولماس قازا. «اجال ايتىپ كەلمەيدى» دەگەن وسى بولار. 25 جاسىندا الەمگە اتى ايگىلى, مانەرلەپ سىرعاناۋدان قازاقستان سپورتىنىڭ تاريحىندا وليمپيادادان مەدال العان العاشقى سپورتشى دەنيس تەن ومىردەن وزدى. بۇل وقيعا سوڭىنا دەيىن زەرتتەلىپ, قىلمىسكەرلەر ۇستالادى دەگەن سەنىمدەمىز.
قازاقستان رەسپۋبليكاسى مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى اتىنان مارقۇمنىڭ وتباسى, تۋعان تۋىستارىنا قايعىرىپ كوڭىل ايتامىز.
باقتيار ارتاەۆ, بوكستان وليمپيادا چەمپيونى:
– دەنيس تەن ءىنىمنىڭ وتكەندە عانا 25 جاسقا تولعان تۋعان كۇنىندە بىرگە بولىپ, از-كەم اڭگىمەلەسىپ, وي بولىسكەن ەدىك. سول كەزدە اڭگىمە اراسىندا «قۋانىشتىڭ ءبارىن جاقسى كورەمىن» دەپ ايتىپ قالىپ ەدى. بۇگىن, مىنە, ومىردەن وزعانى تۋرالى سۋىت حاباردى ەستىپ, ەسەڭگىرەپ وتىرمىز. «جالعان دۇنيە» دەپ وسىندايدا ايتاتىن شىعار... ويتكەنى ەشتەڭە ماڭگى ەمەس. ءار نارسەنىڭ ولشەۋى بار. اللانىڭ دەنيسكە ولشەپ بەرگەن ءومىرى وسى بولدى. ارينە بولمايتىن دۇنيە ءۇشىن التىن بالامىزدىڭ ومىردەن ءوتىپ جاتقانىنا قابىرعامىز قايىسىپ, جۇرەگىمىز اۋىرادى. مارقۇمنىڭ اتا-اناسىنا بەكەم, سابىرلى بولىڭىزدار دەپ ايتقىم كەلەدى. دەنيستىڭ اتى ءبىزدىڭ جۇرەگىمىزدەن ماڭگى ورىن الادى. ونى ەشقاشان ۇمىتپايمىز!
ەۆگەني پليۋششەنكو, مانەرلەپ سىرعاناۋدان ەكى دۇركىن وليمپيادا چەمپيونى:
– قانداي ماسقارا! ءتىپتى, ايتارعا ءسوز جوق. دەنيس تەننىڭ اتا-اناسىنا, تۋىستارىنا, دوستارىنا جانە جانكۇيەرلەرىنە كوڭىل ايتامىن. بۇل جالپى سپورتتاعى ورنى تولماس وتە اۋىر قازا بولدى. ول كەرەمەت ادام, تاڭعاجايىپ سپورتشى ەدى. ءسوزىم جوق...
