قىسقاسى, الماتى قالاسىنداعى بوستاندىق اۋداندىق سوتى فوتوگرافتىڭ ارىزىن جارتىلاي قاناعاتتاندىرىپ, سۋديا ايدا ءابىلماجىنوۆا الماتى قالالىق ىشكى ساياسات باسقارماسىن شاعىمدانۋشى سارسەنبەك قىزايبەك ۇلىنا 300 ايلىق ەسەپتىك كورسەتكىش (680700 تەڭگە) كولەمىندە وتەماقى تولەپ بەرۋگە مىندەتتەدى. الايدا بۇل ايداردىڭ مىندەتى باسقا. ال وتە ءساتتى تۇسىرىلگەن سۋرەتتىڭ سىرى تومەندەگىدەي.
– بۇل سۋرەت الماتى وبلىسىنىڭ ەڭبەكشىقازاق اۋدانىندا وتكەن «سونار-2014» قۇسبەگىلەر بايقاۋى كەزىندە ءتۇسىرىلدى. جارىس باستالار الدىندا ءار جەردەن كەلگەن قۇسبەگىلەر قىراندارىن سىلاپ-سيپاپ, ءوزارا شۇيىركەلەسىپ جاتادى. فوتوگرافتار دا وسىنداي ساتتەردە جاقسى سۋرەت ءتۇسىرىپ قالۋدىڭ ءساتىن اڭديمىز. جارىس باستالۋعا جاقىنداعان كەزدە قۇسبەگىلەر ساپقا ءتۇرىپ جاتتى.
كوزىمە بىردەن قارشىعاسىن قولىنا قوندىرعان قازاقتىڭ قارا دومالاق بالاسى ءتۇستى. ولاردىڭ قيمىلىن وبەكتيۆتە اڭدۋمەن بولدىم. بالا مەن قارشىعانىڭ اراسىندا ءبىر بايلانىس, كوزگە كورىنبەيتىن سۇيىسپەنشىلىك بار ەكەنىن اڭعاردىم. تەك وسى بالانى فوتوكوزبەن اڭدىپ وتىردىم. وڭتايى كەلگەندە سۋرەتتى ءتۇسىرىپ قالدىم. الايدا باستاپقىدا بۇل سۋرەتكە ريزا بولمادىم. جالعاستى ءساتتى ىزدەپ, تاعى سوڭدارىنا ءتۇستىم. اينالىپ كەلگەندە كوپ كادرلاردىڭ ىشىنەن وسى سۋرەتكە كوز توقتادى. كەيىن بىرقاتار گازەت-جۋرنالداردا, وقۋلىقتىڭ مۇقاباسىنا دا شىقتى. قىتايدا وتكەن حالىقارالىق فوتوبايقاۋدا دا جۇلدەلى بولدى. وسى فوتونى «ۇركەر» سىيلىعىنا دا ۇسىنىپ كورگەنمىن, بىراق جولى بولمادى.
كەيىن بيلبوردتاردا ەلىمىزدىڭ جەر-جەرىندە ىلىنە باستادى.
سودان كەيىن قىزىقتىڭ كوكەسى باستالعانى بەلگىلى. فوتو رۇقساتسىز قولدانعانعا دەيىن اۆتور اقىسىنا بار بولعانى 50 مىڭ تەڭگە سۇراعان... ناتيجەسى جوعارىدا. بۇل جەردە ءفوتوتىلشى ءوزىنىڭ اۆتورلىق قۇقىعىن قورعاپ قالعاندىعىن باستى جەڭىس سانايدى.
وسى وقيعادان كەيىن بىزدەگى سايتتار سۋرەتتى پايدالانعاندا اۆتورىن ىزدەيتىن بولدى. مەنىڭ سۋرەتتەرىم بۇرىن رۇقساتسىز ءجيى باسىلاتىن. بۇعان دەيىن ولارعا تۇسىنىستىكپەن قاراپ كەلدىم. كوپ ماسەلە قازاقى جولمەن شەشىلەتىن. بۇل فوتونىڭ داۋى قولدانىستاعى زاڭمەن شەشىلدى. دەمەك ءبىزدىڭ زاڭدا ءبارى دۇرىس. بىراق زاڭ جولىمەن جۇرمەيدى ەكەنبىز, – دەيدى تاجىريبەلى ءفوتوتىلشى.
ايناش ەسالي,
«ەگەمەن قازاقستان»
الماتى
