«رۋحاني جاڭعىرۋ» باعدارلاماسى اياسىندا يسپانيا مادەنيەت مينيسترلىگىمەن ستراتەگيالىق سەرىكتەستىك ورناتىلىپ, «سەرۆانتەس ينستيتۋتى» جوبا كەڭەسشىسى رەتىندە بەكىتىلدى. قازىرگى زامانعى قازاق ادەبيەتىنىڭ يسپان تىلىندەگى ەكى انتولوگياسىن اۋدارۋ, باسىپ شىعارۋ, تاراتۋ جۇمىستارى ءۇشىن «Visor-Libros» باسپا ءۇيى تاڭدالدى.
اتالعان مەموراندۋم يسپان استاناسىنداعى قازاقستان ەلشىلىگىندە جاسالدى. قۇجاتقا «رۋحاني جاڭعىرۋ» باعدارلاماسىن ىسكە اسىرۋ جونىندەگى ۇلتتىق كوميسسيانىڭ حاتشىسى ايدا بالاەۆا مەن باسپا ءۇيىنىڭ پرەزيدەنتى حەسۋس گارسيا سانچەس قول قويدى. ءىس-شاراعا قازاقستاننىڭ يسپانياداعى ەلشىسى كونستانتين جيگالوۆ پەن «ۇلتتىق اۋدارما بيۋروسىنىڭ» ديرەكتورى راۋان كەنجەحان ۇلى قاتىستى.
«Visor-Libros» باسپاسى – شەتەل ادەبيەتىمەن اينالىساتىن مامانداندىرىلعان بىرەگەي باسپا. باسپا ءۇيى كوپ جىلدىق تاجىريبەگە يە. الەمنىڭ ونداعان ەلىمەن جۇمىس جاساپ, اقىن-جازۋشىلار شىعارماشىلىعىن ناسيحاتتاۋدا ءونىمدى ەڭبەك ەتىپ كەلەدى.
«Visor-Libros» باسپاسى يسپانيادا عانا سۇرانىسقا يە بولىپ قويماي, لاتىن امەريكا ەلدەرى مەن سولتۇستىك امەريكاداعى يسپان ءتىلدى مەملەكەتتەردە دە كەڭىنەن تانىمال.
قازاقستان مەن ەكى ەل اراسىنداعى كەلىسىمگە سايكەس, قازاق ادەبيەتى انتولوگياسىن تەك يسپانيادا عانا ەمەس, وزگە ەلدەردە دە تاراتۋ-ناسيحاتتاۋ جۇمىستارى كوزدەلگەن. كوپشىلىك بىلەتىندەي, يسپان ءتىلى تەك يسپان ەلىنىڭ عانا ەمەس, سونىمەن قاتار لاتىن امەريكاسىنىڭ 18 ەلى ءۇشىن دە انا ءتىلى سانالادى. بۇل تىلدە الەمدە 600 ميلليوننان استام ادام سويلەيدى.
