جيىن بارىسىندا راديو سالاسىنا قاتىستى وزەكتى تۇيتكىلدەر, اۋديتورياعا جۇمىس ىستەۋ, تىڭدارمان تارتۋ سەكىلدى ماڭىزدى ماسەلەلەر ءسوز بولدى. Xtra Insights كومپانياسىنىڭ وكىلى پول اموستىڭ مودەراتورلىعىمەن وتكەن كونفەرەنتسيانىڭ العاشقى سەسسياسىندا تىڭدارمانمەن جۇمىس ىستەۋ جولدارى تالقىلاندى.
قازىرگى تاڭدا جاڭا مەديانىڭ شىعۋىمەن راديوعا سۇرانىستىڭ ازايعانى بەلگىلى. الايدا جيىنعا كەلگەن ساراپشىلار مۇنىڭ ۋاقىتشا قۇبىلىس ەكەنىن ايتىپ, راديونىڭ ءالى دە تىڭدارمان قۇلاعىنىڭ قۇرىشىن قاندىرا بەرەتىنىنە سەنىمدى. ماسەلەن, كونفەرەنتسيادا ءسوز سويلەگەن راديو جانە جاڭا تەحنولوگيا جونىندەگى حالىقارالىق ساراپشى ستيۆ احەرننىڭ ايتۋىنشا, زاماناۋي تەحنولوگيالار راديونى «ولتىرمەيدى». كەرىسىنشە سولاردى قولدانۋ ارقىلى راديو سالاسى جاڭاشا قىزمەتكە يە بولادى. مىسالى, اۋديوجازبالاردى ينتەرنەتكە جۇكتەۋ ارقىلى ءتۇرلى پودكاستار جاساپ, ونى كەيىنىرەك قايتا تىڭداۋعا مۇمكىندىك تۋادى. ناتيجەسىندە راديوتولقىندار جەتپەيتىن قاشىقتىقتا وتىرىپ ينتەرنەت ارقىلى سۇيىكتى باعدارلامانى تىڭداۋعا مۇمكىندىك مول.
«زەرتتەۋلەرگە سۇيەنسەك, ادامدار تەلەديدار كورگەننەن تىڭداعاندى ءجون كورەدى ەكەن. ويتكەنى تىڭداۋ ارقىلى بەينەلەر ايقىندالىپ, ميعا قونىمدى بولا تۇسەدى. راديونى باسقا تىرلىكپەن اينالىسىپ ءجۇرىپ تىڭداي بەرۋگە مۇمكىندىك بار. ياعني, راديو دەربەستىككە بەيىمدەلىپ كەلەدى», دەيدى س.احەرن.
سونىمەن قاتار حالىقارالىق ساراپشى راديونىڭ ەكى ءتۇرى ماڭىزعا يە ەكەنىن اتاپ ءوتتى. ونىڭ ءبىرى – اقپاراتتىق فورمات بولسا, ەكىنشىسى – ويىن-ساۋىقتىق باعىت. س.احەرننىڭ پايىمداۋىنشا, ەندىگى ماقسات وسى ەكى باعىتتى بىرىكتىرەتىن قولايلى ورتا قالىپتاستىرۋ قاجەت.
بۇدان بولەك كونفەرەنتسيا بارىسىندا ءۇندىستان راديوسىنىڭ باس ديرەكتورى فاياياز شەدەريار ءوز ەلىندەگى تاجىريبە تۋرالى اڭگىمەلەپ بەرسە, بۋتاننىڭ ۇلتتىق راديوسىنىڭ باسشىسى تشەرينگ ۆانگچۋك الاقانداي ەلدەگى سانى از تىڭدارمانمەن جۇمىس ىستەۋ تاسىلدەرىن ايتتى. سونداي-اق وگايو ۋنيۆەرسيتەتىنىڭ پروفەسسورى دريۋ ماكدانيەل دە ءوز بىلگەنىمەن ءبولىستى.
ءىس-شارا ەلوردانىڭ 20 جىلدىق مەرەيتويى قارساڭىندا «ازيا مەديا ديالوگى» اياسىندا ۇيىمداستىرىلىپ وتىر. اتالعان اۋقىمدى شارا بارىسىندا بۇدان بولەك بىرنەشە كونفەرەنتسيالار, سەمينارلار مەن ءانى فەستيۆالى وتپەك. جيىنعا اقپارات جانە كوممۋنيكاتسيالار مينيسترلىگى, ازيا جانە تىنىق مۇحيت حابار تاراتۋ وداعى, «قازمەديا ورتالىعى» كومپانيالارى ۇيىتقى بولدى.
ۇيىمداستىرۋشىلاردىڭ ايتۋىنشا, «ازيا مەديا ديالوگى» شاراسىنا 40 ەلدەن 150-گە جۋىق دەلەگات كەلگەن. جيىن اياسىندا «ازيا ەلدەرىندەگى راديو», «مەديا 2020» جانە ء«ان فەستيۆالى» وتەدى.
ءىس-شارا بارىسىندا راديو فورماتىن جاساۋ, اۋديتوريانى باقىلاۋ جانە ونى زەرتتەۋ قۇرالدارى, ەۋرازيا مەديا نارىعىنىڭ وزىق ۇلگىلەرىمەن تانىسۋ, كونتەنت جاساۋ تاسىلدەرى تالقىلانادى. «ازيا مەديا ديالوگى» ءۇش كۇنگە سوزىلادى.
اباي اسانكەلدى ۇلى,
«ەگەمەن قازاقستان»
