مەملەكەت باسشىسى وقۋ-جاتتىعۋ جۇرگىزۋگە, دايىندىق جاساۋعا جانە جارىس وتكىزۋگە ارنالعان جاڭا سپورت جانە تۋريستىك نىسانمەن تانىستى.
رەسپۋبليكالىق شاڭعى سپورتى بازاسى شاڭعى ستاديونىن, مىلتىقپەن اتۋ الاڭىن, ءجۇزۋ باسسەينى مەن جاتتىعۋ زالى بار جابىق سپورت كەشەنىن, تراپمليننەن سەكىرۋگە ارنالعان ورىندى, اكىمشىلىك-تۇرمىستىق جانە باسقا دا ماقساتتاعى ءۇي-جايلاردى قامتيدى.
سپورت بازاسىمەن تانىسۋ بارىسىندا قازاقستان پرەزيدەنتىنە ەلىمىزدىڭ تۋريزم سالاسىن دامىتۋ پەرسپەكتيۆالارى تۋرالى مالىمدەلدى. «تۋريستىك قازاقستان» باعدارلاماسىنىڭ الداعى ۋاقىتتا جۇزەگە اسىرىلۋ جانە ششۋچينسك-بۋراباي كۋرورتتىق ايماعىن ءارى قاراي جەتىلدىرۋ جوسپارلارى جونىندە پرەمەر-ءمينيستردىڭ ءبىرىنشى ورىنباسارى ا.مامين, مادەنيەت جانە سپورت ءمينيسترى ا.مۇحامەدي ۇلى جانە اقمولا وبلىسىنىڭ اكىمى م.مىرزالين بايانداما جاسادى.
باياندامالاردى تىڭداعان مەملەكەت باسشىسى قازاقستاننىڭ تۋريستىك الەۋەتىن ارتتىرۋدىڭ وزەكتىلىگىن ايتتى.
– قازىرگى ۋاقىتتا قازاقستاندىقتار بالالاردى وتانىمىزدىڭ كورىكتى جەرلەرىمەن تانىستىرا الاتىنداي دەمالىس ورىندارىن سالۋ باستى مىندەت سانالادى, – دەدى نۇرسۇلتان نازارباەۆ.
قازاقستان پرەزيدەنتى ششۋچينسك-بۋراباي كۋرورتتىق ايماعىنىڭ اۋماعىنداعى ينفراقۇرىلىمدى دامىتۋدىڭ قاجەتتىلىگىن ايتتى.
سونىمەن قاتار, مەملەكەت باسشىسى ءتيىستى كادرلاردى دايارلاۋ ەسەبىنەن تۋريستىك قىزمەت كورسەتۋ ساپاسىن جاقسارتۋدىڭ ماڭىزدىلىعىنا ەرەكشە توقتالدى.
نۇرسۇلتان نازارباەۆ بۇگىندە 10 تۋريستىك ايماققا باسا نازار اۋدارىلاتىنىن ايتتى. بۇلار – يمانتاۋ, باياناۋىل, تۇركىستان, الماتى وبلىسى, شارىن شاتقالى, الاكول, كاسپي جاعالاۋى جانە باسقالارى.
– تۋريستىك نىساندارعا سۋبسيديا ءبولۋ كوزدەلىپ وتىر. تۋريستەردى باسەكەگە قابىلەتتى باعا بولعاندا عانا تارتا الامىز. ءبىز ەكونوميكانىڭ وسى سالاسىنا زور ءمان بەرۋىمىز كەرەك, – دەدى ەلباسى.
مەملەكەت باسشىسى وڭىرلەردىڭ باسشىلارىن جانە ينۆەستورلاردى ەلىمىزدىڭ تۋريستىك كلاستەرىن دامىتۋ ۇدەرىسىنە بەلسەندى اتسالىسۋعا شاقىردى.
