وسى سپورت ءتۇرىن سەرىك ەتكەن سۇلۋلارىمىزدىڭ بۇعان دەيىنگى ازيا ويىندارىندا دا تابىستى ونەر كورسەتكەنىن جانكۇيەرلەر جاقسى بىلەدى. جوعارىدا ايتىلعان ءسوزدىڭ دالەلدى بولۋى ءۇشىن الىسقا بارماي-اق, سوڭعى ءۇش جارىستىڭ قورىتىندىسىنا كوز جۇگىرتسەك تە جەتكىلىكتى دەپ ويلايمىز. مىسالى, 2006 جىلى دوحادا وتكەن ءدۇبىرلى دودادا ءاليا يۋسۋپوۆا جەكەلەگەن سايىستا الدىنا جان سالماي, التىننان القا تاعىندى. سونداي-اق, قۇرامىندا ءاليا يۋسۋپوۆا, ايدانا قاۋىلداشەۆا جانە مايا زاينۋلينا سىندى ارۋلارى بار قازاقستاندىقتار كوماندالىق ەسەپتە باس جۇلدەنى ولجالادى.
2010 جىلى گۋانجوۋدا دا وتانداستارىمىزعا تەڭ كەلەر ەشكىم تابىلمادى. جەكەلەگەن باسەكەدە اننا اليابەۆا توپ جارسا, كوماندالىق سايىستا دا قارسىلاس شىداتپادىق. ال 2014 جىلى ينچحوندا قازاقستان قۇراماسى وزبەكستان مەن وڭتۇستىك كورەيا سپورتشىلارىن العا جىبەرىپ, ءۇشىنشى ورىنعا تۇراقتادى. سول كوماندانىڭ ساپىندا ءاليا اسسيموۆا, ۆيكتوريا گوربۋنوۆا, سابينا اشىرباەۆا جانە ەكاتەرينا سكوريكوۆا ونەر كورسەتكەن ەدى.
بيىل جاكارتادا الينا ءادىلحانوۆا, ءاديليا تلەكەنوۆا, سەلينا جۇماتاەۆا جانە دايانا ابدىربەكوۆا باق سىنايدى. جاسىراتىنى جوق, بۇگىنگى تاڭدا سارى قۇرلىقتاعى باسەكەلەستىك دەڭگەيى وتە جوعارى. سول سەبەپتى دە جەكەلەگەن سايىستا جەڭىس تۇعىرىنا كوتەرىلۋ قيىنعا سوعاتىنى انىق. ال كوماندالىق سايىستا جەرلەستەرىمىز جۇلدەلى ورىنداردىڭ ءبىرىن يەلەنۋى ابدەن مۇمكىن. ۇلتتىق كوماندامىزدىڭ باس باپكەرى ءاليا يۋسۋپوۆانىڭ ايتۋىنشا, يندونەزياداعى دودادا قازاقستان گيمناسشىلارىنىڭ باستى باسەكەلەستەرى – جاپونيا, وڭتۇستىك كورەيا, قىتاي جانە وزبەكستان قۇرامالارى.
عالىم سۇلەيمەن,
«ەگەمەن قازاقستان»
