ەلباسىنىڭ ماڭعىستاۋلىقتارعا جولداعان العىس حاتىندا «تاۋەلسىز قازاقستاننىڭ سيمۆولى سانالاتىن باس قالامىزدىڭ ايتۋلى مەرەيتويى - بارشا قازاقستاندىقتارعا ورتاق قۋانىش.
سارىارقا توسىنە قازىعىن قاققان ەڭسەلى ەلوردامىزدى تۇرعىزۋعا بۇكىل حالقىمىز جۇمىلا اتسالىستى.
بيىل باس قالانىڭ تۋعان كۇنىنە وراي «وڭىرلەردىڭ استاناعا تارتۋى» جوباسى اياسىندا ماڭعىستاۋ وبلىسى دا ءوز ۇلەسىن قوستى. ۇلتارالىق كەلىسىمدى تۋ ەتكەن قازاقستان ءۇشىن دوستىق پەن بەيبىتشىلىك باستى بايلىق سانالادى. وسىعان وراي, ماڭعىستاۋ ءوڭىرى سىيلاعان دوستىق ءۇيى تاتۋلىعى مەن ىنتىماعى جاراسقان كوپ ۇلتتى حالقىمىزدىڭ بەرەكە-بىرلىگىن بەكەمدەي تۇسەدى دەپ سەنەمىن. استانانى كوركەيتۋگە زور ۇلەس قوسقان سىزگە جانە ءوڭىر تۇرعىندارىنا شىنايى ريزاشىلىعىمدى بىلدىرەمىن.
سىزدەرگە زور دەنساۋلىق, باق-بەرەكە تىلەيمىن!» دەلىنگەن.
دوستىق پەن بەيبىتشىلىكتىڭ سيمۆولىنا اينالعان بۇل عيمارات استانا قالاسىنداعى الماتى اۋدانى, باۋىرجان مومىش ۇلى كوشەسى, 24 ۇيدە ورنالاسقان. جوبانىڭ ىسكە اسىرۋشىسى - «دوستىق-قازاقستان» قوعامدىق قورى.
جاڭا دوستىق ءۇيى ءۇش قاباتتان تۇرادى. عيماراتتىڭ ءبىرىنشى قاباتىندا كورمە زالى, اكت زالى, «قوعامدىق كەلىسىم» كمم-ءنىڭ جانە قازاقستان حالقى اسسامبلەياسىنىڭ قوعامدىق قۇرىلىمدارىنىڭ بولمەلەرى بار. ەكىنشى قاباتىندا كونفەرەنتس-زال, مۇراجاي, ەتنومادەني بىرلەستىكتەردىڭ بولمەلەرى كوزدىڭ جاۋىن الىپ تۇر. حورەوگرافيالىق زال, ۆوكال ستۋدياسى, اسحانا, قىزمەتكەرلەر بولمەسى تسوكولدى قاباتتا ورنالاسقان. قوناقتار جانە قىزمەتكەرلەر ءۇشىن ارنايى ىڭعايلى اۆتوتۇراق جاسالعان. اتالمىش عيماراتتىڭ جان-جاعى اباتتاندىرىلىپ, كوگالداندىرىلعان.
قازاقستان حالقى اسسامبلەياسىنىڭ مۇشەسى سالمان گەروەۆ باس قالامىزداعى ەتنومادەني بىرلەستىكتەردىڭ اتىنان استانا قالاسىنىڭ 20 جىلدىعىنا وراي جاساعان كەرەمەت سىيلىق ءۇشىن ەلباسى ن.ءا.نازارباەۆقا ءوز العىسىن جەتكىزدى.
ماڭعىستاۋ وبلىسىنىڭ باس قالامىزعا تارتۋى – استانانىڭ اجارىن كوركەيتە تۇسەرى انىق.
ەڭسەسى بيىك ەلوردامىز ماڭعىستاۋ ءوڭىرى سىيعا تارتقان دوستىق ءۇيى عيماراتىمەن بىرگە جاڭارىپ, جاسارا بەرەرى حاق.
