كونستيتۋتسيالىق كەڭەستىڭ اتالعان شەشىمىنە سايكەس, اتقارۋشىلىق ءىس جۇرگىزۋ كەزىندە سوت ورىنداۋشىسىنا كەلۋدەن باس تارتقان ادامعا ماجبۇرلەپ اكەلۋدى قولدانۋ سوت شەشىمدەرىن جانە وزگە دە مەملەكەتتىك ورگاندار مەن لاۋازىمدى تۇلعالاردىڭ اكتىلەرىن ورىنداۋدى قامتاماسىز ەتۋدە اتقارۋشىلىق ءىس جۇرگىزۋگە قاتىسۋشى ازاماتتاردىڭ كونستيتۋتسيالىق قۇقىقتارىن بۇزبايدى ەكەن. الايدا كونستيتۋتسيالىق كەڭەس ماجبۇرلەپ اكەلۋدى قولدانۋ ماسەلەلەرىنە قاتىستى زاڭنامانىڭ جانە قۇقىق قولدانۋ پراكتيكاسىنىڭ ەلەۋلى كەمشىلىكتەرىنە مۇددەلى مەملەكەتتىك ورگانداردىڭ نازارىن اۋدارۋدى دا ءجون سانايدى.
ويتكەنى قولدانىستاعى «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسi تۋرالى» زاڭدى قولدانۋ تەتىگى پراكتيكادا قاتاڭ قۇقىقتىق شەكتەۋ سيپاتىنا يە شارالارمەن ۇشتاساتىن كۇشتەپ, ياعني ماجبۇرلەپ اكەلۋدى ورىنداۋ ءتارتىبىن رەگلامەنتتەمەيدى. سەبەبى زاڭنامادا ماجبۇرلەپ اكەلۋدى جۇزەگە اسىرۋ ۋاقىتى, ماجبۇرلەپ اكەلۋگە جاتپايتىن ادامداردىڭ تىزبەسى, تۇلعانىڭ كەلمەۋ سەبەپتەرىن دالەلدى دەپ تانۋدىڭ ءمان-جايلارى, ارناۋلى قۇرالداردى, دەنە كۇشى مەن قارۋدى قولدانۋ مۇمكىندىگى, سونداي-اق ادامنىڭ كونستيتۋتسيالىق قۇقىقتارىن قوزعايتىن باسقا دا ماسەلەلەر ايقىندالماعان. دەمەك, زاڭنامادا كۇشتەپ اكەلۋدى قولدانۋ سۋبەكتىسى انىق بەلگىلەنبەگەن.
سوندىقتان, كونستيتۋتسيالىق كەڭەستىڭ پىكىرىنشە, ماجبۇرلەپ اكەلۋدى سانكتسيالاۋ راسىمىندەگى سوت باقىلاۋى ونى قولدانۋدىڭ فورمالدى شارتتارىن عانا انىقتاۋمەن شەكتەلمەۋى ءتيىس. بۇل پروتسەستە سوتتىڭ مىندەتى ءىستىڭ بارلىق ءمان-جايلارىن زەرتتەي وتىرىپ, كۇشتەپ اكەلۋدى قولدانۋدىڭ نەگىزدەرىن, زاڭدىلىعى مەن نەگىزدىلىگىن مۇقيات تەكسەرۋدى بىلدىرەدى.
كونستيتۋتسيالىق كەڭەس اتاپ وتكەندەي, ءارتۇرلى ءىس جۇرگىزۋلەردە قولدانىلاتىن كۇشتەپ اكەلۋ مەملەكەتتىك ماجبۇرلەۋ شارالارىنىڭ قۇقىقتىق بولمىسى ورتاق, تاڭداۋ نەگىزدەرى, ىسكە اسىرۋ تەتىگى ۇقساس, ادامنىڭ جانە ازاماتتىڭ كونستيتۋتسيالىق قۇقىقتارى مەن بوستاندىقتارىن قوزعايدى. دەمەك ولاردى قولدانۋ ءتارتىبى جانە جۇزەگە اسىرۋ سۋبەكتىسى زاڭدا انىق بەلگىلەنۋى ءتيىس.
وسى ورايدا, كونستيتۋتسيالىق كەڭەس ۇكىمەتكە «اتقارۋشىلىق iس جۇرگiزۋ جانە سوت ورىنداۋشىلارىنىڭ مارتەبەسi تۋرالى» زاڭعا جانە وزگە دە قۇقىقتىق اكتىلەرگە تۇزەتۋلەر ەنگىزۋ تۋرالى ۇسىنىم جىبەردى. قاجەتتى زاڭنامالىق تۇزەتۋلەر قابىلدانعانعا دەيىن ۋاكىلەتتى مەملەكەتتىك ورگاندارعا اتقارۋشىلىق ءىس جۇرگىزۋدە كۇشتەپ اكەلۋدى قولدانعاندا قىلمىستىق-پروتسەستىك كودەكستە جانە «پروكۋراتۋرا تۋرالى» زاڭدا كوزدەلگەن ءتيىستى كەپىلدىكتەر دەڭگەيىندە ادام قۇقىقتارىن ساقتاۋعا ۇسىنىس بەرىلدى.
الەكساندر تاسبولات,
«ەگەمەن قازاقستان»
