سونداي-اق ەكسپەديتسيانىڭ قۇرامىندا بيىكتىگى سەگىز مىڭ مەتردەن اساتىن بارلىق شىڭداردى باعىندىرعان قازاقستاننىڭ اتاقتى ءالپينيسى ۆاسيلي پەۆتسوۆ جانە وسكەمەن قالاسىنىڭ جاس الپينيستەرى بولدى. بەلۋحا شىڭىن باعىندىرۋدا 30 ساراپشىدان تۇراتىن كوماندا ءۇش شاعىن توپقا ءبولىندى: ءبىرىنشى توپ تۇراقتى دامۋ ماقساتتارىنىڭ تۋىن شىڭعا ءىلۋ مەن بەلۋحا تاۋىن باعىندىرۋمەن اينالىستى, ەكىنشىسى – تاۋدا جاڭا تۋريستىك مارشرۋتتاردى سالۋمەن, ال ءۇشىنشى توپ قازىرگى مارشرۋتتاردى زەرتتەپ, ونى جاقسارتۋ ءۇشىن ۇسىنىس دايىندادى. بىرلەسكەن جۇمىس شىعىس قازاقستان وبلىسى, وسكەمەن قالاسى جانە كاتونقاراعاي اۋدانى اكىمدىگىنىڭ قولداۋىمەن جۇزەگە اسىرىلدى.
«مەنى كاتونقاراعاي ۇلتتىق پاركىنىڭ تاماشا تابيعاتى مەن ونىڭ بيوالۋانتۇرلىلىگى تاڭعالدىردى. تاۋ شىڭىنا شىعۋدىڭ ءوزى وڭاي بولعان جوق, بىراق ءبىز ءوزىمىزدىڭ بىرلىگىمىزدىڭ ارقاسىندا شىڭعا قول جەتكىزە الدىق. ويتكەنى تاۋ ادامنىڭ توزىمدىلىگىن تەكسەرەدى. قيىندىقتارعا قاراماستان كوماندا بولىپ ءتىل تابىسۋدىڭ ارقاسىندا قيىندىقتاردى جەڭە بىلدىك, العا قويعان ماقساتىمىزعا قول جەتكىزدىك», دەيدى ەۋروپا قايتا قۇرۋ جانە دامۋ بانكى قازاقستانداعى وكىلدىگى ديرەكتورىنىڭ ورىنباسارى اسقار نامازباەۆ.
«بىرىككەن ۇلتتار ۇيىمىنىڭ دامۋ باعدارلاماسىنىڭ شەڭبەرىندە ءبىز كاتونقاراعاي ۇلتتىق پاركىنىڭ اۋماعىندا ەكوتۋريزمدى دامىتۋ ماقساتىن كوزدەگەن ەدىك. بۇگىندە پارككە جىلىنا شامامەن 3500 ادام كەلەدى ەكەن. بۇل وتە از كورسەتكىش. سوندىقتان ەكوتۋريزمدى دامىتۋ ءۇشىن ءالپينيزمدى, اتتى, جاياۋ جانە اۆتوكولىك مارشرۋتتارىن قاتار قولدانۋىمىز قاجەت», دەدى بۇۇ دب بيوالۋانتۇرلىلىك جونىندەگى مەنەدجەرى تالعات كەرتەشەۆ.
بىرىككەن ۇلتتار ۇيىمىنىڭ دامۋ باعدارلاماسى ءبولىمىنىڭ باسشىسى يرينا گوريۋنوۆا التايدىڭ تابيعاتىن تاماشالاۋ بارىسىندا ءبىراز دۇنيەگە كوز جەتكىزگەنىن ايتادى. ونىڭ ايتۋىنشا, جەرگىلىكتى تۇرعىندار بۇل ايماقتا جاپپاي ءتۋريزمدى دامىتۋدىڭ ورنىنا تەك تابيعاتتى سۇيەتىن, ايالايتىن تۋريستەردى تارتۋ كەرەك دەگەن ۇسىنىس بىلدىرگەن. ءوز كەزەگىندە يرينا گوريۋنوۆا جەرگىلىكتى تۇرعىندارمەن قويان-قولتىق ارالاسىپ, ولاردىڭ ماسەلەلەرىن شەشۋگە كومەكتەسەتىنىن جەتكىزدى.
ء«بىز ەكسپەديتسيا بارىسىندا تۇرعىندارمەن كەزدەسىپ, ولاردىڭ تالاپ-تىلەكتەرىن تىڭدادىق. وسى كەزدەسۋدەن سوڭ كۇرمەۋى شەشىلمەي تۇرعان ءبىراز ماسەلەلەرگە كوز جەتكىزدىك. ەندى وسى ماسەلەلەردى تۇرعىندارمەن بىرلەسە وتىرىپ شەشەتىن بولامىز. سونداي-اق ارا شارۋاشىلىعى مەن جىلقى تۇقىمىن ءوسىرۋ, پانتوكرينمەن ەمدەۋ جانە وڭىردەگى قوناقۇيلەرىنىڭ جۇمىسى تۋرالى اقپاراتقا قانىق بولدىق», دەدى ول.
ال «Kazakh Tourism» ۇلتتىق كومپانياسى شىلدە ايىنان باستاپ قازاقستاننىڭ بۇكىل ايماقتارى بويىنشا ەلوردانىڭ 20 جىلدىعىنا وراي 20 تابيعي مەكەنگە ارنالعان ەكسپەديتسياسىن باستايتىنىن جاريالادى. سونداي-اق وسى شارا اياسىندا شىعىس قازاقستان ايماعىنا قايتا كەلەتىندەرىن جەتكىزدى. «تامىز ايىنىڭ وزىندە-اق «التاي – وركەنيەتتىڭ بەسىگى» ەكسپەديتسياسىنىڭ شەڭبەرىندە ءبىز قازاقستاننىڭ ايگىلى جيھانگەرلەرى, بلوگەرلەرى جانە باق وكىلدەرىمەن بىرگە شىعىس قازاقستانعا قايتا ورالاتىن بولامىز», دەپ اتاپ ءوتتى Kazakh Tourism ۇك PR جانە ماركەتينگ دەپارتامەنتىنىڭ ديرەكتورى دۋلات يمان.
«ۋاقىت بويىنشا بەلۋحا تاۋىنا كوتەرىلەتىن ەڭ ءتيىمدى شاق – بۇل شىلدەنىڭ 15-ىنەن باستاپ تامىزدىڭ 15-ىنە دەيىنگى كەز بولاتىن. بىراق ءبىز بۇل كەزەڭدى استانانىڭ جيىرما جىلدىق مەرەيتويىمەن قۇتتىقتاۋ ءۇشىن ادەيى تاڭداپ الدىق. سونىمەن قاتار ەلوردانىڭ جالاۋىن التايدىڭ ەڭ بيىك نۇكتەسىنە تىكتىك», دەدى قازاقستانداعى ازيا بانكىنىڭ باسشىسى دجوۆانني كاپاننەللي.
جوبا شەڭبەرىندە ەكسپەديتسيا تۋرالى دەرەكتى فيلم جاسالىپ, جەرگىلىكتى تۋريستىك مارشرۋتتار كوبەيتىلىپ, وسىلار جايىندا ماتەريالدار دايىندالاتىن بولادى.
ءالي بيتورە,
«ەگەمەن قازاقستان»
