الماتىداعى س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنىنىڭ ۇيىمداستىرۋىمەن «اتاكەنت» قازاقستان ىسكەرلىك ىنتىماقتاستىق ورتالىعىنىڭ «باقشاساراي» سالتانات ۇيىندە «مۇقانوۆتىڭ حاتحاناسى – پيسموتەكا مۋكانوۆا» اتتى حاتتار جيناعىنىڭ تۇساۋكەسەرى ءوتتى. بۇل كىتاپقا قازاق ادەبيەتىنىڭ كلاسسيگى, اكادەميك-جازۋشى س.مۇقانوۆتىڭ 1924–1973 جىلدار ارالىعىندا ءوزى جازعان جانە باسقالاردان العان حاتتارى تۇڭعىش رەت (300-دەن اسا حات) توپتاستىرىلعان. حاتتار شەرتەر سىر الۋان. بۇل حاتتاردا ءار جىلداردىڭ بوياۋ-بەدەرى دە, ۋاقىت تابىنىڭ ىزدەرى دە, قوعامدىق-ساياسي ءومىردىڭ تىنىسى دا, جەكە تۇلعانىڭ قالىپتاسۋ, ەسەيۋ كەزەڭدەرىنىڭ سۋرەتتەرى دە ساقتالعان. كىتاپ مازمۇنىنا قاراپ وتىرىپ-اق وقىرماننىڭ قىزىعۋشىلىعى ەركىنەن تىس ويانا باستايدى. ويتكەنى س.مۇقانوۆتىڭ حات جازىسقان ادامدارىنىڭ ءتىزىمىنىڭ ءوزى كوز سۇرىندىرەدى: ا.تولستوي, م.شولوحوۆ, م.جۇماباەۆ, ش.قۇدايبەردى ۇلى, د.نۇرپەيىسوۆا, م.اۋەزوۆ, ءى.جانسۇگىروۆ, ي.ستالين, ج.شاياحمەتوۆ, د.قوناەۆ, ك.سيمونوۆ, ا.فادەەۆ, ن.تيحونوۆ, ل.سوبولەۆ, ي.شۋحوۆ, ا.حراپچەنكو, س.قۇداش, ك.ياشين, ءى.وماروۆ, ن.باجان, ءۇ.بالقاشەۆ, ا.توقماعامبەتوۆ, ءا.نۇرپەيىسوۆ, ءا.نۇرشايىقوۆ, م.عابدۋللين, ج.مولداعاليەۆ, س.قيراباەۆ, ت.كاكىشەۆ ن.بايمۇراتوۆ, ك.ورازالين, ت.الىمقۇلوۆ, ى.ءۋاليحانوۆ, ن.فازىلوۆ, ت.نۇرتازين, ز.شاشكين, ۆ.فارمەر, ە.فلەيس, ا.بەكون, ي.الىباەۆ, ح.بەكىشەۆ, ع.مالدىباەۆ, ءا.شمانوۆ, ج.بەكتۇروۆ, ءا.قوڭىراتباەۆ, ج.شال ۇلى, ت.ب. كىتاپ پاراساتتى, پايىمدى وقىرماندارعا, ادەبيەت تاريحىن جانە جازۋشى شەبەرحاناسىن زەرتتەۋشىلەرگە ارنالعان.
زيالى قاۋىم وكىلدەرى, س.مۇقانوۆتىڭ قىزدارى بايان مەن جاننا, «اقنيەت» كورپوراتيۆتىك قورىنىڭ توراعاسى اسقار كوكىموۆ, ت.ب. قاتىسقان بۇل جيىندا قالامگەرلەر وي ءبولىسىپ, مۇقانوۆتىڭ باي ەپيستوليارلىق مۇراسى تۋرالى, ونىڭ كەلەر ۇرپاققا عيبراتى تۋرالى ايتتى. كىتاپ تۇساۋكەسەرى ءراسىمىن قازاقستان جازۋشىلار وداعى باسقارما توراعاسىنىڭ ورىنباسارى مەرەكە قۇلكەنوۆ پەن بايان سابيتقىزى جاسادى. كىتاپ «اقنيەت» كورپوراتيۆتىك قورى قامقورشىلىق كەڭەسىنىڭ توراعاسى س.ابدۋللاەۆتىڭ دەمەۋشىلىگىمەن جارىققا شىقتى. كىتاپ تانىستىرىلىمىنا ارنالعان كەشتى جيناقتىڭ قۇراستىرۋشىسى ءارى جاۋاپتى رەداكتورى – س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنىنىڭ جەتەكشىسى, اقىن ادىلعازى قايىربەكوۆ جۇرگىزىپ وتىردى.
نازگۇل التاەۆا
