وبلىس تۇرعىندارىن استانا كۇنىمەن قۇتتىقتاعان ايماق باسشىسى قىرىمبەك كوشەرباەۆ: «قازاق تاريحىندا حالقىنا قورعان بولسام, العا جەتەلەپ, ارمانىنا جەتكىزسەم, تاۋەلسىز ەل قىلىپ, بيىككە كوتەرسەم دەگەن تۇلعالار از بولماعان. قاسىم حاننىڭ قاسقا جولى, ەسىم حاننىڭ ەسكى جولى, ءاز-تاۋكەنىڭ جەتى جارعىسى سودان قالعان. ابىلاي حاننىڭ ارپالىسى, ابىلقايىر حاننىڭ جانتالاسى قازاقتى قالاي دا قازاق قىلسام دەگەن ارماننان تۋعان. ال سول بابالاردىڭ ارمانىن اسقاق, ماقساتىن مۇرات ەتكەن بۇگىنگى كوشباسشىمىز – تۇڭعىش پرەزيدەنتىمىز نۇرسۇلتان ءابىش ۇلى نازارباەۆ بولدى. ءبىز ەندى ەلباسىمىزدى ساسقانعا سايا دەسەك تە, اسقانعا توسقان دەسەك تە, ۇلتقا ۇران, ۇرپاققا ۇستاز دەسەك تە, ەلدىڭ يەسى, جەردىڭ كيەسى دەپ قانشا ايتساق تا ارتىق بولمايدى! ويتكەنى, بۇگىنگى قازاقستان – بولاشاعى بەكەم, كەلەشەگى كەمەل ەل!», دەدى.
بۇگىندە «مەملەكەت ماعان نە بەردى دەمە, مەن مەملەكەتكە نە بەردىم دە» دەگەن وي كوبىرەك ايتىلادى. ياعني, ەندى الدا نە بولار ەكەن دەپ كەتپەننىڭ سابىنان قاراۋىل قاراماي, ءوز ەڭبەگىمەن ۇلەس قوسۋىڭ كەرەك. ەل باسىنا كۇن تۋعاندا, قاسىنداعى قارۋلاستارى پۋلەمەتتىڭ جاڭبىرشا جاۋعان وعىنان ورعان بيدايداي جاپىرىلىپ جاتقاندا سۇلتان بايماعامبەتوۆ اجال شاشقان دزوتتى كەۋدەسىمەن جاپتى. جۇزدەگەن جاۋىنگەردىڭ ءومىرىن ساقتاپ قالدى. ال وسىنداي ەرلىك بەيبىت زاماندا دا بولادى. ولار قيىن جاعدايدا ابدىراپ قالمايدى, ەرلىك كورسەتەدى. ماسەلەن, وبلىستىق ىشكى ىستەر دەپارتامەنتىنىڭ جىلدام قيمىلدايتىن ارنايى جاساعىنىڭ ينسپەكتورى باۋىرجان نۇرجانوۆ ورتكە ورانعان كوپ قاباتتى ءۇيدى كورگەندە الدىمەن ءورت ءسوندىرۋ قىزمەتىنە حابار بەرگەن. سودان سوڭ ويلانباستان جالىن قۇشقان ۇيگە كىرىپ, بەس جانە التى جاستاعى ەكى بالدىرعاندى الىپ شىققان.
ون ءبىر جاستاعى ارۋجان بيسەنباەۆانىڭ ۇيىندە ەرەسەكتەر بولماعان كەزدە ءورت شىققان. ۇيىندە ەكى ءسىڭلىسى مەن ءىنىسى بولعان. سول كەزدە بارماقتاي عانا قىز بالا ەش ابدىراماستان باۋىرلارىن تەرەزە ارقىلى ورتتەن الىپ شىقتى.
ال كولىك اپاتىنا ۇشىراپ بەلدەن قالعان ساعاتبەك سيۋوۆ «تاعدىر سالدى مەن كوندىم» دەپ ۇيىندە وتىرىپ قالماپتى. مۇگەدەكتەر ارباسىنا تاڭىلعان ول – «جىلى جۇرەكتى جاستار» ەرىكتىلەر توبىنىڭ جەتەكشىسى. قايىرىمدىلىق شارالارىنا قاتىسىپ جۇرگەن ساعاتبەك – «فريستايل» سپورتىنان ەلىمىز چەمپيوناتىنىڭ جەڭىمپازى.
«ەرلىك» ۇيلەستىرۋ كەڭەسىنىڭ جانە «اۋعانستان سوعىسى ارداگەرلەرى ۇيىمى» قوعامدىق بىرلەستىگىنىڭ توراعاسى قايراددين بايماحانوۆ كوپ جىل بويى جاس ۇرپاقتى پاتريوتتىققا تاربيەلەۋ بويىنشا بەلسەندى جۇمىس جۇرگىزىپ كەلەدى. اۋعان سوعىسى ارداگەرلەرىمەن كەزدەسۋلەر وتكىزىپ, بىرنەشە اسكەري-پاتريوتتىق جوبا جاساعان.
سوفيا اۋجاروۆا – 25 جىل ەڭبەك ءوتىلى بار دارىگەر, وبلىستىق جەدەل جاردەم ستانساسىنىڭ ءبولىم مەڭگەرۋشىسى. 19 جىل العاشقى مەديتسينالىق قىزمەت كورسەتۋ بريگاداسىندا قىزمەت اتقارعان سوفيا تۇرسىنبايقىزى – كلينيكالىق ءولىم جاعدايىنداعى, اۋىر كوما ۇستىندەگى, جول جاراقاتتارى, سۋىق قارۋمەن ءولىم جاعدايلارىندا اجالمەن ارپالىسىپ جاتقان ناۋقاستاردى امان الىپ قالعان باتىل دارىگەر.
مىنە, ءتىزىم وسىلاي جالعاسا بەرەدى. قىرىمبەك ەلەۋ ۇلى پاتريوتتار فورۋمىندا ولاردى ماراپاتتاپ, الداعى ومىرلەرىنە اق تىلەۋ ايتتى.
وتانىنىڭ جارقىن بولاشاعى ءۇشىن بەيبىت كۇندە ەرلىك كورسەتكەن ازاماتتار تاۋەلسىز قازاقستاننىڭ تۇعىرى بيىك بولۋى ءۇشىن ۇلەس قوسۋى كەرەكتىگىن ايتادى.
دۇركىرەپ وتكەن استانا تويى بۇكىل الاش جۇرتىنىڭ مەرەكەسىنە اينالدى. الەمدىك كيكىلجىڭدەردە قوس تاراپتاردى ءبىتىستىرۋ ءۇشىن ورتاق ديالوگ جاساپ وتىرعان ەلوردانىڭ مارتەبەسى اسقاقتاي بەرسىن, دەيدى ولار.
باقتيار تايجان,
«ەگەمەن قازاقستان»
قىزىلوردا وبلىسى
