«بۇل ءىس-شارادا بىرنەشە سەمينار مەن كونفەرەنتسيالار وتەدى. تالقىلاناتىن باستى تاقىرىپتارىنىڭ ءبىرى تەلەراديوحابار تاراتۋ سالاسىن زامانعا ساي دامىتۋ بولماق. فورۋمعا ازيا-تىنىق مۇحيتى ەلدەرىنىڭ ۇلتتىق جانە ايماقتىق حابار تاراتۋ بىرلەستىكتەرىنىڭ 100-دەن اسا وكىلى قاتىسادى. تەلەۆيزيا مەن راديونى جوعارى تەحنولوگيا بويىنشا ءاردايىم دامىتىپ وتىرۋ قاجەت ەكەنىن ءبارىمىز جاقسى تۇسىنەمىز. قازاقستان بۇقارالىق اقپارات قۇرالدارى دا بۇل ۇردىستەن قالىس قالماۋى كەرەك», دەدى اقپارات جانە كوممۋنيكاتسيالار ءمينيسترى داۋرەن اباەۆ.
سەمينارلاردا مەديا سالاسىنداعى جەتەكشىلەر ءۇشىن راديوجيىلىكتىڭ قالىپتاسۋى, اۋديتورياعا جانە ونىڭ زەرتتەۋ قۇرالدارىنا باعا بەرۋ, ازيا جانە ەۋروپا مەديا نارىعىنداعى وزىق تاجىريبەلەر تالقىلانادى. ودان بولەك قازاقستاندا تۇڭعىش رەت كەڭ اۋقىمدى سالالىق كونفەرەنتسيالار وتكىزىلىپ, ول جەردە ازيا راديوسىنا قاتىستى سۇراقتار قويىلادى. ازياداعى جانە ەۋروپاداعى مەديا ءۇشىن ورتاق ماسەلەلەردى تالقىلاۋ ماقساتىندا «Media-2020» كونفەرەنتسياسى قورىتىندى شاراسى وتەدى. مودەراتورلار رەتىندە اۋستراليا, بەلگيا, گەرمانيا, جاپونيا, قىتاي ەلدەرىنىڭ جەكە جانە ۇلتتىق تەلەراديو كومپانيالاردىڭ باسشىلارى شاقىرىلادى.
«اتالعان اۋقىمدى شاراعا الەمنىڭ 37 ەلىنەن كەلگەن 100-گە جۋىق وكىل قاتىسادى. جيىن اياسىندا بىرنەشە ماڭىزدى شارالار وتكىزۋ جوسپارلانعان. سولاردىڭ ىشىندە «ABU Radio Song Festival» ءان فەستيۆالى دە بار. كونكۋرسقا تۇركيا, نەپال, مالديۆ جانە قازاقستاننىڭ ونەرپازدارى قاتىسادى, بۇل شارا «قازمەديا ورتالىعىنىڭ» كينو-كونتسەرت زالىندا وتەدى», دەدى «قازمەديا ورتالىعىنىڭ» باس ديرەكتورى ءلاززات ءجۇنىسوۆا.
راۋان قايدار,
«ەگەمەن قازاقستان»
