تىكۇشاق قۇراستىرۋمەن اينالىساتىن استاناداعى ەڭ ءىرى كاسىپورىننىڭ جۇمىس بارىسىمەن تانىسقان دەپۋتات پ.كازانتسەۆ بۇل زاۋىتتىڭ ەلىمىزگە جاڭا مۇمكىندىكتەرىن اشۋ باعىتىندا وزگە ەلدەردىڭ نارىعىنا جول تابۋدا ىلگەرى دامىپ كەلە جاتقان كاسىپورىنداردىڭ ءبىرى ەكەنىن ايتا كەلىپ, قازىرگى تاڭدا بۇل تىكۇشاقتارعا دەگەن سۇرانىس قىرعىز ەلىندە كوپ ەكەنىنە توقتالدى. وسى رەتتە دەپۋتات كەلەر جىلى مادەنيەت جانە سپورت مينيسترلىگىمەن بىرلەسە وتىرىپ يننوۆاتسيالىق الەۋەتتى جانە تۋريستىك سالانى دامىتۋعا باعىتتالعان زاڭ قابىلداۋ قاجەتتىلىگىنە دە نازار اۋداردى.
سونىمەن قاتار زاۋىت شەڭبەرىندە ورتالىق ازيا مەن ەلىمىزدىڭ ايماقتارىنا قاجەتتى مامانداردى دايارلايتىن اۆياتسيالىق ءبىلىم بەرۋ ورتالىعى جۇمىس ىستەيدى. بۇل جەر ۆ1 تەحنيكالىق ءدارىس پەن ەس145 تىكۇشاعىن باسقاراتىن پيلوتتاردى دايارلايتىن الەم بويىنشا جالعىز ورتالىق بولىپ سانالادى. قازىرگى تاڭدا 8 ادام ءبىلىم الۋدا.
زاۋىت اياسىندا سەرۆيس ورتالىعى دا ورنالاسقان. بۇل جەردە كاسىبي مامان يەلەرى تىكۇشاقتاردىڭ ۇشۋعا دايىندىق بارىستارىنا تەكسەرىستەر مەن جوندەۋ جۇمىستارىن جۇرگىزەدى.
ءوز كەزەگىندە «ەۆروكوپتەر قازاقستان ينجينيرينگ» جشس كوممەرتسيالىق ديرەكتورى تيمۋر تيلينين ورتالىقتا تەك ۇشقىشتاردى عانا ەمەس, ماماندىققا قاجەتتى تەحنيكا قىزمەتكەرلەرى مەن اۆيونيكتەردى وقىتاتىنىن ايتىپ, زاۋىت قىزمەتكەرلەرىنىڭ ءوز ىستەرىنىڭ شەبەرلەرى ەكەنىن جانە جۇمىستارىن جىلدام جانە كاسىبي دەڭگەيدە اتقارىپ, ەڭ جوعارعى ساپاداعى قىزمەت كورسەتۋمەن اينالىساتىنىن جەتكىزدى.
