وسى ساياباقتاعى امفيتەاترعا جينالعان حالىقتا ەسەپ جوق. توبىل وزەنى الاقانداعىداي كورىنىپ تۇراتىن امفيتەاتردا سالتاناتتى جيىن باستالدى. ءانۇران شىرقالدى, ونى قوستانايلىقتار وڭ قولىن جۇرەك تۇسىنا ۇستاپ, تاۋەلسىزدىككە تاعزىم ەتە تۇرىپ تىڭدادى. وبلىس اكىمى ارحيمەد مۇحامبەتوۆ قوستانايلىقتاردى استانا كۇنىمەن قۇتتىقتادى جانە ەلوردامىز تۋرالى بايانداما جاسادى.
« ۇلى دالا ەلورداسى ۇلتتىق سانانى جاڭا دەڭگەيگە كوتەرىپ, ەل بىرلىگىنىڭ جاڭا يدەيالارىنىڭ نىشانىنا اينالدى. باس قالا مادەني جانە تۋريستىك قالا بولا وتىرىپ, رەسپۋبليكا وڭىرلەرىنىڭ دامۋىنا تىڭ سەرپىن بەردى. الەمدىك دەڭگەيدەگى وزىندىك ءمانى بار, بىرەگەي تەحنولوگيالىق جانە ساۋلەت قۇرىلىسى بارلىق ايماقتار ءۇشىن ۇلگى بولىپ وتىر. ەلباسىنىڭ "استاناسىنا قاراپ, ەلىن تانيدى" دەگەن سوزىندە تەرەڭ ءمان بار. بارلىق حالقىمىز استانانى سالۋعا اتسالىسسا, استانا مەملەكەتتى دامىتقانى ءسوزسىز», دەدى ارحيمەد بەگەجان ۇلى.
ءوڭىر باسشىسى ەلوردامىز تۋرالى, ونىڭ بۇگىنگى مەملەكەتتىڭ ساياسي, ەكونوميكالىق, مادەني ومىرىندە ايرىقشا ورىن الاتىنىن, ەلىمىزدىڭ ۆيزيت كارتوچكاسى ەكەنىن تىلگە تيەك ەتتى. ول مۇنان كەيىن وبلىستىڭ بيزنەستە, ونەردە, مەملەكەتتىك قىزمەتتە, الەۋمەتتىك جانە ءومىردىڭ بارلىق سالاسىندا ەلىمىزدىڭ گۇلدەنۋىنە اتسالىسىپ جۇرگەن بەتكە ۇستار ازاماتتارىنا «استانانىڭ 20 جىلدىعى» مەدالىن تابىس ەتتى.
«مەن وبلىس ورتالىعىنان شالعايدا جاتقان جانكەلدين كەنتىنەنك ەلدىم, سونداعى مۋزەيلەر كەشەنىن باسقارامىن. وبلىس اكىمىنىڭ قولىنان استانانىڭ 20 جىلدىعى مەدالىن الدىم. قۋانىشتىمىن. استانا ەلىمىزدىڭ ايبىنى بولىپ وتىر. استانانىڭ تاريحى – حالقىمىزدىڭ, ەلىمىزدىڭ تاريحى, ول تۋرالى ءبىزدىڭ مۋزەيلەردە دە ماتەريالدار بار. استانا كۇنى مەركەسى ادامدارعا جوعارى پاتريوتتىق رۋح سىيلايدى, قازاقستاندى ءار قازاقستاندىق جاقسى كورەدى», دەدى تورعاي كەنتىندەگى مۋزەيلەر كەشەنىنىڭ ديرەكتورى گۇلبانۋ سارسەكەي.
قوستاناي قالاسىنىڭ ونەر ۇجىمدارى مەرەكەگە جينالعان جۇرتشىلىققا ءان مەن جىردان شاشۋ شاشتى. قوستانايدا وسىلاي استانا كۇنى بيىك رۋحتا اتالىپ ءوتتى.
ءنازيرا جارىمبەت
«ەگەمەن قازاقستان»
قوستاناي
