استانانىڭ 20 جىلدىعىنا وراي وتكەن مەرەكەلىك سالتاناتتا الماتى وبلىسىنىڭ اكىمى اماندىق باتالوۆ قالانىڭ جاڭادان پايدالانۋعا بەرىلگەن شاعىن اۋداندارىنداعى كوشەلەرگە شىت جاڭا اتاۋ بەرىلگەنىن حابارلادى. استانا اتاۋىن يەلەنگەن داڭعىلدان بولەك, اسا كورنەكتى قازاق تاريحشىسى قادىرعالي جالايريدىڭ, ەڭبەك ەرلەرى بايكەن ءاشىموۆ پەن زىليحا تامشىباەۆنىڭ اتىنا كوشەلەر پايدالانۋعا بەرىلدى.
- وسىنداي اتاۋلى مەرەكە قارساڭىندا وبلىس اۋماعىندا كوپتەگەن ءىس-شارالار وتكىزىلۋدە. سونداي شارانىڭ ءبىرى, بۇگىنگى ەلوردامىز - استانانىڭ 20 جىلدىعى قارساڭىندا «استانا» داڭعىلىنىڭ سالتاناتتى اشىلۋى بولىپ وتىر. سونىمەن قاتار, ۇلى تۇلعالارىمىزدىڭ ۇلاعاتتى ەڭبەگى مەن ەرلىككە تولى ەرەن ىستەرىن اسپەتتەۋ ماقساتىندا, عۇلاما تاريحشى قادىرعالي جالايىري داڭعىلى, ەڭبەك ەرلەرى بايكەن ءاشىموۆ پەن زىليحا تامشىباەۆانىڭ قۇرمەتىنە كوشە اتتارى بەرىلدى, - دەدى ءوز سوزىندە ايماق باسشىسى.
وبلىستاعى زيالى قاۋىم وكىلدەرى, ارداگەرلەر, قالا تۇرعىندارى قاتىسقان سالتاناتتى جيىندا تالدىقورعان قالالىق ارداگەرلەر كەڭەسىنىڭ توراعاسى م. حالىق, بايكەن ءاشىموۆتىڭ ۇلى و. ءاشىموۆ, زىليحا تامشىباەۆانىڭ قىزى س. توقسانبايقىزى ءسوز الىپ بۇگىنگى اتقارىلىپ وتىرعان تاعىلىمدى ىسكە ريزاشىلىقتارىن جەتكىزىپ, كوپشىلىكتى استانا مەرەكەسىمەن قۇتتىقتادى.
سونداي-اق, استانا كۇنى مەرەكەسىندە تالدىقورعاندىق وتباسىلار جاڭا پاتەرگە يە بولىپ, بىرقاتار ازاماتتار مەرەيتويلىق مەدال الدى. پاتەرگە يە بولعاندار قاتارىندا كوپ بالالى وتباسىلار, I, ءىى توپتاعى مۇگەدەكتەر, تولىق ەمەس وتباسىلار, زەينەتكەرلەر, ۇلى وتان سوعىسىنا قاتىسۋشىلارعا تەڭەستىرىلگەن ازاماتتار, مۇگەدەك بالا تاربيەلەپ وتىرعان وتباسىلار بار. بۇل كۇنى جالپى سانى 180 وتباسى وسىنداي قۋانىشقا كەنەلدى.
قالماحانبەت مۇقامەتقالي,
«ەگەمەن قازاقستان».
الماتى وبلىسى.
