العاشقى جارمەڭكەگە قاتىسقان 50-دەن استام كاسىپكەر, جالپى قۇنى 122,8 ملن تەڭگە بولاتىن 286 توننا اۋىل شارۋاشىلىعى ونىمدەرىن ارزان باعامەن ساۋدالادى. اتاپ ايتقاندا, 65 توننا ەت ونىمدەرى, 101 توننا كوكونىس, 18 توننا ءسۇت ونىمدەرى, 23 توننا جەمىس-جيدەك, 18 توننا كارتوپ, 20 مىڭ دانا جۇمىرتقا, 6 توننا بالىق, 5 توننا كەپتىرىلگەن جەمىس, 4 توننا ءتۇرلى كونسەرۆىلەر, 41 توننا باسقا دا ونىمدەر ساتىلىمعا شىعارىلعان. وبلىس مەرەكە اياسىندا 5 رەت جارمەڭكە وتكىزبەك. وسى ارالىقتا تۇركىستاندىق شارۋالار ەلورداعا 14 753 توننا بولاتىن اۋىل شارۋاشىلىعى ونىمدەرىنىڭ 28 ءتۇرىن جونەلتەدى. بۇل ورايدا وبلىستان 35 ءىرى جانە قوسالقى شارۋا قوجالىقتارى مەن كاسىپورىندارى ىرىكتەلىپ, دايىندىق جۇمىستارى كۇشەيتىلگەن. سونداي-اق وبلىستا «استانانىڭ 20 جىلدىعىنا – 20 نىسان» اكتسياسى وتۋدە. ياعني مەرەكە قارساڭىندا وبلىستا 20 نىسان اشىلىپ, ەل يگىلىگىنە بەرىلەدى. مىسالى, «وڭتۇستىك» يندۋستريالىق ايماعىندا ورنالاسقان «شىمكەنت تەمىر» جشس-نىڭ بولات قۇيۋ زاۋىتى ىسكە قوسىلادى. جالپى قۇنى 4,2 ملرد تەڭگە بولاتىن كاسىپورىن جىلىنا 240 مىڭ توننا ءونىم شىعارۋعا قاۋقارلى. ءوندىرىس ورنى ىسكە قوسىلعاندا 150 ازامات جۇمىسپەن قامتىلماق. سونىمەن قاتار شىمكەنتتە ۇلتتىق تەننيس ورتالىعى, زووباقتىڭ «سافاري» بولىگى مەن استانا داڭعىلىنىڭ بويىندا گۇلزاردىڭ اشىلۋ ءراسىمى ءوتتى. بۇدان باسقا مەرەيتوي قارساڭىندا ەل يگىلىگى ءۇشىن وبلىس اۋماعىندا 4 بالاباقشا, شاردارا اۋدانىندا 10 پاتەرلى ەكى قىزمەتتىك تۇرعىن ءۇي مەن تولە بي اۋدانىندا 20 پاتەرلى بەس قاباتتى تۇرعىن ءۇي, ال بايدىبەك اۋدانىندا 1 پاتەرلى 20 كوممۋنالدىق تۇرعىن ءۇي قۇرىلىسى پايدالانۋعا بەرىلەدى. ال 1-6 شىلدە ارالىعىندا تۇركىستان قالاسىندا «ياسسى قۇس» شارۋا قوجالىعىنىڭ ەكىنشى كەزەڭى, سىيىمدىلىعى 200 توننا بولاتىن كوكونىس جانە جەمىس-جيدەك ساقتايتىن سەرۆيستىك ورتالىق اشىلادى. 200 ورىندىق مادەنيەت ءۇيى مەن 600 ورىندىق مەكتەپ, 60 بالاعا شاقتالعان «اقكەن» ەمدەۋ-ساۋىقتىرۋ لاگەرى جانە سپورت نىساندارى مەن دەمالىس ورىندارى دا «استانا قالاسىنىڭ 20 جىلدىعىنا – 20 نىسان» اكتسياسى بارىسىندا ەل يگىلىگىنە تاپسىرىلماق.
مۇنداي يگى ىسكە شىمكەنت قالاسى دا ءوز ۇلەسىن قوسۋدا. جۋىردا «استانا» شاعىن اۋدانى مەن «استانا» گۇلزارى اشىلدى. تۇرعىندارعا شاعىن اۋداننان جاڭا پاتەرلەردىڭ كىلتى تاپسىرىلدى. «نۇرلى جەر» باعدارلاماسى بويىنشا سالىنعان بۇل ءۇيدىڭ پاتەرلەرى الەۋمەتتىك از قامتىلعان وتباسىلار مەن جەتىمدەرگە جانە ۇزاق ۋاقىتتان بەرى تۇرعىن ءۇي كەزەگىندە تۇرعان ازاماتتارعا بەرىلدى. جالپى, قالانىڭ اكىمشىلىك-ىسكەرلىك ورتالىعىندا وسى ۋاقىتقا دەيىن 90 مىڭ شارشى مەتر تۇرعىن ءۇي پايدالانۋعا بەرىلگەن بولاتىن. قازىرگى تاڭدا مۇندا كوپ قاباتتى 27 ءۇي سالىنۋدا. ەندى بۇل شاعىن اۋدان «استانا» دەپ اتالادى. ال اۋماعى ءبىر گەكتارعا جۋىق «استانا» گۇلزارىندا شىنار, كاشتان, قايىڭ اعاشتارى مەن ءتۇرلى گۇلدەر ەگىلىپ, ورىندىقتار مەن جارىقشامدار, بالالارعا ارنالعان ويىن الاڭشالارى ورناتىلعان.
عالىمجان ەلشىباي,
«ەگەمەن قازاقستان»
تۇركىستان وبلىسى
