ابايدىڭ «جيدەباي-ءبورىلى» قورىق-مۋزەيىندە ۇيىمداستىرىلىپ وتىرعان كورمە ەلباسىمىزدىڭ ۇلتتىق دومبىرا كۇنىن بەكىتۋ تۋرالى جارعىسىنىڭ حالىق اراسىندا ۇلكەن قولداۋ تاپقانىنىڭ كورىنىسى.
-حاكىم اباي قازاقتىڭ كەز كەلگەن ونەر ءتۇرىن ۇلكەن تالعاممەن اسا جوعارى باعالاپ وتىرعان,-دەدى اباي مۋزەيىنىڭ قىزمەتكەرى مەيىرجان نۇرلانوۆ,-اقىن ءوز تاراپىنان ولاردى دامىتۋعا ۇنەمى قامقورلىق جاساعانى ابايعا قاتىستى ەستەلىك ەڭبەكتەردەن بەلگىلى. ماڭايىنا تەك ءانشى مەن كۇيشىنى, اقىن مەن جىرشىنى توپتاستىرىپ قانا قويماي, ەل ىشىندە ون ساۋساعىنان ونەر تامعان ۇلتتىق قولونەردىڭ ۇزدىك ۇلگىلەرىن تاراتۋشى ۇستالار مەن زەرگەرلەردى, اعاش شەبەرلەرىن, ىسمەرلەردى ىزدەستىرىپ ارنايى تاپسىرمالار بەرىپ, قۇرمەتتەپ, باسقالارعا ۇلگى ەتكەن. اباي اۋىلىنىڭ ءانشىسى الماعامبەت قاپسالام ۇلى, احات شاكارىم ۇلى, اسەت نايمانباي ۇلى, مادەنيەت ەشەكە ۇلى, شاكىر ابەن ۇلى, مۇساحان كۇيشىنىڭ دومبىرالارى كورمەدەن ورىن العان.
سونىمەن قاتار كورمەدەگى قۇرمانعازى, داۋلەتكەرەي, تاتتىمبەت پەن دينا سىندى اتاقتى كۇيشىلەر تۋرالى جانە ءداستۇرلى قازاق ونەرىمەن حالىقتى سۋسىنداتىپ جۇرگەن ونەر تارلاندارى تۋرالى ا.جۇبانوۆتىڭ «قۇرمانعازىنىڭ كۇيلەرى قالاي شىققان», ت.يبراگيموۆ, س.مالاەۆتىڭ «شىڭعىستاۋ ءوڭىرىنىڭ شەرتپەلەرى», ش.ابەن ۇلىنىڭ ء«انىم مەن كۇيىم-حالقىما سىيىم» ەڭبەكتەرى, مادەنيەت پەن ونەرگە قاتىستى كىتاپتار مەن مەرزىمدى باسىلىمدار كەلۋشى مەيمانداردىڭ قىزىعۋشىلىعىن تۋدىرارى انىق.
راۋشان نۇعمانبەكوۆا,
سۋرەتتەردى تۇسىرگەن اۆتور
سەمەي
