ونىڭ ايتۋىنشا, وتكەن جىلدارى بولىنگەن قاراجاتتى قوسا العاندا, قازىر اۆتونەسيەلەندىرۋ ءۇشىن 40 ملرد تەڭگە كولەمىندەگى سوما بار. بۇل مودەلىنە بايلانىستى شامامەن 12–13 مىڭ اۆتوكولىكتى ساتىپ الۋعا جەتەدى.
«قازىر بۇل قارجىنىڭ بارلىعى تولىق يگەرىلدى. اۆتونەسيەلەندىرۋدىڭ ءبىر ءپرينتسيپى – وعان سالىنعان قارجى رەۆولۆەرلى تۇردە قايتا اينالىمعا تۇسەدى, ياعني بۇل رەۆولۆەرلى نەسيە. سوندىقتان قازىر بىزدە نەسيەدە وتكەن جىلداردان قايتا كەلىپ تۇسكەن اقشالارمەن قوسقاندا, 58–59 ملرد تەڭگەدەي قارجى بار. اۆتونەسيەلەندىرۋ باعدارلاماسى توقتاتىلمايدى, ءارى قاراي جالعاسىن تابادى», — دەدى ا. باتانوۆ.
ماشينا جاساۋ قازاقستانداعى يندۋستريالىق-يننوۆاتسيالىق دامۋ مەملەكەتتىك باعدارلاماسىنىڭ ءبىرىنشى جانە ەكىنشى بەسجىلدىعىنداعى باسىمدىقتى سالا بولىپ تابىلادى. يندۋستريالاندىرۋ باعدارلاماسىنىڭ ءبىرىنشى بەسجىلدىعى ىسكە اسىرىلعان جىلدارى ماشينا جاساۋ قارقىندى دامۋشى سالالاردىڭ ءبىرى بولدى.
2018 جىلدىڭ 5 ايىندا ماشيناجاساۋ ءوندىرىسى 12,2%-عا وسكەن.
«ماشينا جاساۋداعى ءوندىرىس كولەمى 2010 جىلدان باستاپ 2,3 ەسە ۇلعايدى. ماشينا جاساۋدىڭ وڭدەۋ ونەركاسىبىندەگى ۇلەسى 2010 جىلى 9% بولسا, 2014 جىلى ءبىرىنشى بەسجىلدىقتا 15%-عا دەيىن ءوستى», — دەپ تۇيىندەدى ا. باتانوۆ.
