28 – 29 ماۋسىم ارالىعىندا, استانادا, جەتكىزپ بەرۋشىلەردىڭ جانە ساۋداگەرلەردىڭ باسىن قوساتىن حالىقارالىق جيىن وتەدى. شاراعا قاتىسۋعا مىڭنان استام كومپانيالاردىڭ توپ-مەنەدجەرلەرى جانە 2 000 اسا ساۋدا جەلىلەرىنىڭ باسشىلارى نيەت ءبىلدىردى.
«World of Trade 2018» الاڭى ساۋداگەرلەر مەن جەتكىزىپ بەرۋشىلەر كەلىسسوز جۇرگىزەتىن حالىقارالىق ورتالىققا اينالماق. جاڭا فورماتتاعى ءىس-شارا قازاقستان ەلورداسى 20 جىلدىعىنىڭ قارساڭىندا ۇيىمداستىرىلىپ, حالىقارالىق ساۋدانىڭ قىزا تۇسۋىنە سەپ بولادى. جيىندا ۇيىمداستىرۋشى - «EXIM Partners» كومپانياسى, استانا اكىمدىگى رەسمي تۇردە قولداۋ بىلدىرگەن. شاراعا ەلوردا اكىمى اسەت يسەكەشەۆ قاتىسادى دەپ كۇتىلۋدە.
استاناعا 8 مەملەكەتتىڭ: قازاقستان, رەسەي, وزبەكستان, قىرعىزستان, تۇركمەنستان, ءازىربايجان, ۋكراينا, ارمەنيانىڭ ساۋدا جەلىلەرىنەن وكىلدەر جينالادى. حالىقارالىق جيىن تمد جانە ەاەو ەلدەرنەن كەلگەن 100-دەن اسا ساۋدا جەلىسىنىڭ وكىلدەرى مەن 2000 جەتكىزىپ بەرۋشىلەردىڭ باسىن قوسادى.
شاراعا قاتىسۋشىلار 6 000 ەكىجاقتى كەزدەسۋلەر جۇرگىزىپ, 500-دەن استام كەلىسىم-شارتقا قول قويادى دەپ جوسپارلانعان. 2018-2019 ماركەتينگ ماۋسىمىن قامتيتىن ساۋداگەرلر مەن جەتكىزىپ بەرۋشىلەردىڭ ۇلكەن كەلىسسوز كومپانياسى ەكى كەزەڭمەن حالىقارالىق ورتالىقتا وتكىزىلەدى. جەتكىزىلىپ بەرىلەتىن ءونىم ۇلگىلەرى «World of Trade 2018» الاڭىندا ارنايى تۇرعىزىلعان گيپەرماركەت ىسپەتتەس نىساندا ۇسىنىلماق.
جيىنعا قاتىسۋشىلار بولشەك ساۋدانىڭ بولاشاعى مەن جاڭا ترەندتەر تۋرالى پىكىر الماسىپ, ءونىمدى شەتەلدەرگە ەكسپورتتاۋ جولدارى جايىندا ءدارىس الادى. شارانىڭ ىسكەرلىك باعدارلاماسىندا ءۇش ءىرى كونگرەسس بار: ەۋرازيالىق ساۋدا, ريتەيل تاجىريبەسى, قازاقستاندىق ەكسپورتتاۋشى كۇنى. سونىمەن قاتار جيىن اياسىندا ريتەيلەرلەر شەرۋى مەن جىل سايىنعى «ميسس ريتەيل قازاقستان – 2018» سالالىق بايقاۋى وتكىزىلەدى.
