«بۇل اكىمشىلىك بىرلىك ەلىمىزدەگى ون جەتىنشى ايماق بولادى. وبلىس ورتالىعى قازاق حاندىعىنىڭ جانە بۇكىل تۇركى الەمىنىڭ ساياسي ءارى رۋحاني ورتالىعى بولعان تۇركىستان قالاسىنا كوشىرىلەدى. شىمكەنت ءبىزدىڭ ەلدىڭ عانا ەمەس, بۇكىل ورتالىق ازيا ءوڭىرىنىڭ ينۆەستيتسيالار, تەحنولوگيالار جانە ينتەللەكتۋالدى رەسۋرستار تارتاتىن جاڭا ورتالىعىنا اينالادى. بۇل ءۇشىن بارلىق جاعداي مەن قاجەتتى الەۋەت بار. بۇل قادام شاھاردىڭ تەڭگەرمەلى الەۋمەتتىك-ەكونوميكالىق دامۋىنا جانە بۇكىل ءوڭىر تۇرعىندارىنىڭ تۇرمىس ساپاسىنىڭ دايەكتى تۇردە ارتۋىنا تىڭ سەرپىن بەرەدى», دەدى نۇرسۇلتان ءابىش ۇلى.
تۇركىستان وبلىس ورتالىعى بولاتىنىن نۇرسۇلتان نازارباەۆ وسىدان 22 جىل بۇرىن تۇركىستانعا كەلگەن ساپارىندا ايتىپ ەدى, ەندى مىنە, ءسوزى مەن ءىسىنىڭ اراسىندا الشاقتىق بولمايتىنىن ەلباسى وسى تاريحي, تاعدىرلى شەشىمىمەن تاعى ءبىر مارتە دالەلدەدى.
ون جەتىنشى ايماقتىڭ ومىرگە كەلۋى – ەلىمىزدىڭ كەرەگەسى كەڭىپ, شاڭىراعى بيىكتەي بەرەدى دەگەن ءسوز. تۇتاس تۇراننىڭ تۇلعاسى ماعجان:
تۇركىستان – ەكى دۇنيە ەسىگى عوي,
تۇركىستان – ەر تۇرىكتىڭ بەسىگى عوي.
تاماشا تۇركىستانداي جەردە تۋعان
تۇركىستان ءتاڭىر بەرگەن نەسىبى عوي, – دەپ جىرلاعان قاسيەتتى, كيەلى تۇركىستان اتى تاعى دا جاڭالىقپەن, جاقسىلىقپەن جاڭعىرىپ, ۇلى تۇركىنىڭ ءانىن ايتىپ, ماڭگىلىك, كوك اسپاننىڭ وزىنە اسقاق قاراپ تۇر.
تۇگەل تۇركىنى قۋانتقان حابار – سونىڭ ايقىن ايعاعى. قۋانىش قۇتتى, باقىتىمىز باياندى بولسىن, وتانداستار! باقىت – بىرلىكتە, ىرىس – ىنتىماقتا!
حالقىمىزدى «نۇرلى جولمەن» «ماڭگىلىك ەلگە» باستاي بەر, ەلباسى.
ءسابيت دوسانوۆ,
جازۋشى, مەملەكەتتىك
سىيلىقتىڭ لاۋرەاتى
الماتى
