«استانا» حالىقارالىق قارجى ورتالىعىنىڭ رەسمي تۇردە اشىلۋىنا ساناۋلى كۇندەر قالدى. وسىعان بايلانىستى قازىرگى تاڭدا جەرگىلىكتى بيرجانىڭ قازاقستاندىق جانە حالىقارالىق بروكەرلىك كومپانيالارمەن ساۋدا وپەراتسيالارىن جۇرگىزۋگە دايىندىعى پىسىقتالۋدا. سونىمەن قاتار «ايوسكو» قۇندى قاعازدار جونىندەگى حالىقارالىق كوميسسيا, «بيسيبيەس» بانكتىك قاداعالاۋ جونىندەگى بازەل كوميتەتى جانە «ايەفەسبي» يسلام قارجىلىق قىزمەت كورسەتۋ كەڭەسى سىندى تانىمال ۇيىمدارمەن ورتاق ستاندارتتار بەكىتىلىپ, جالپىعا بىردەي قاعيداتتار باسشىلىققا الىنباق. وسى ەرەجەلەر كاپيتال نارىعىنىڭ تيىمدىلىگى مەن تازالىعىن قامتاماسىز ەتىپ قانا قويماي, جۇيەلى تۇردە جۇمىس ىستەۋگە مۇمكىندىك بەرەدى.
«استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ:
− مەملەكەت باسشىسىنىڭ بەس ينستيتۋتتىق رەفورماسىن جۇزەگە اسىرۋعا باعىتتالعان «100 ناقتى قادام» ۇلت جوسپارى ستراتەگيالىق جوسپارى بويىنشا احقو-نىڭ جۇمىسىن جانداندىرۋدا اسا ماڭىزدى 3 رەفورمانى, ياعني مەملەكەتتىك قىزمەتتەردىڭ ساپاسىن جاقسارتۋ, ەكونوميكانى ءارتاراپتاندىرۋ, ونىڭ ىشىندە جەكەشەلەندىرۋدى جەتىلدىرۋ, زاڭنىڭ ۇستەمدىگىن ارتتىرۋ باعىتتارى بويىنشا جۇمىس جۇرگىزىلەدى. بۇعان دەيىن ايتىلعانداي, «استانا» حالىقارالىق قارجى ورتالىعى اعىلشىن زاڭناماسى بويىنشا جۇمىس ىستەيدى. بۇگىنگى كۇنى اتالعان جۇيە لوندون, نيۋ-يورك, دۋباي, سينگاپۋر سىندى الەمدىك قارجى ورتالىقتارىندا كەڭىنەن قولدانىلدى. بۇعان قوسا, احقو جانىنان قۇرىلاتىن تاۋەلسىز سوت پەن تاۋەلسىز اربيتراج ورتالىعىنىڭ جۇمىسى شەتەلدىك ينۆەستورلاردىڭ سەنىمىن ارتتىرۋعا مۇمكىندىك بەرەدى, − دەدى.
ەلباسىنىڭ «100 ناقتى قادام» ۇلت جوسپارىندا بەكىتىلگەن تاپسىرماسىنا سايكەس, ەلىمىزدە جەكەشەلەندىرۋ شارالارىن جۇزەگە اسىرۋ بويىنشا احقو جەكەگە وتەتىن بىرقاتار نىسانداردى انىقتاعان. ق.كەلىمبەتوۆ اتاپ وتكەندەي, 2018-2020 جىلدارى «ەيراستانا», «قازاقتەلەكوم», «قازاتوم-
ونەركاسىپ» كومپانيالارى جەكەشەلەندىرۋگە بەرىلسە, 2019-2020 جىلدارى «قازمۇنايگاز» بەن «قتج»-نى جەكەگە وتكىزۋ جوسپارلانىپ وتىر. جوعارىدا اتالعان كومپانيالار ەل ەكونوميكاسىنداعى ءىجو-ءنىڭ 40 پايىزىن قۇرايدى. بۇعان دەيىن قازاقستاندىق كومپانيالار لوندون, گونكونگ سىندى الپاۋىت ساۋدا نارىقتارىنا بەت بۇرعانى بەلگىلى, ءوز كەزەگىندە احقو ەلىمىزدەگى كومپانيالاردى تارتۋ ءۇشىن بارلىق مۇمكىندىكتەرگە جول اشادى.
جەكەشەلەندىرۋدىڭ دە اتالعان ورتالىق اياسىندا وتكىزىلۋى اسا ماڭىزدى قادام بولماق.
− ءبىز وسى ماقساتتا الەمدەگى ەڭ ءىرى بيرجالارمەن بايلانىس ورتناتقان حالىقارالىق استانا بيرجاسىن قۇردىق. بۇل رەتتە اكتيۆتەرمەن جۇمىس جۇرگىزۋ ءىسى دە نەگىزگى باعىتتاردىڭ ءبىرى. «استانا» حالىقارالىق قارجى ورتالىعى الداعى 20 جىل ىشىندە الەمدەگى وزىق ساناتتاعى 20 ورتالىقتىڭ قاتارىنا ەنۋدى كوزدەيدى.وعان بارلىق جاعداي جاسالىپ وتىر», − دەدى احقو-نىڭ باسقارۋشىسى.
ەلىمىزدىڭ باس قالاسى – استانانىڭ 20 جىلدىق مەرەيتويىمەن تۇسپا-تۇس كەلگەن احقو-نىڭ اشىلۋى ەل ەكونوميكاسىنىڭ الداعى ۋاقىتتا جاڭا باعىتتا تىڭ سەرپىنمەن دامي تۇسۋىنە نەگىز بولارى ءسوزسىز.
ەركەجان ايتقازى,
«ەگەمەن قازاقستان»
