وسىدان جيىرما جىل بۇرىن قازاقستاننىڭ جاڭا استاناسىنىڭ تۇساۋكەسەرىنە قاتىسۋ قۇرمەتىنە يە بولعان ەدىم. استانا – ول تاۋەلسىز ەلدىڭ جاڭا استاناسى! بۇل – كورەگەن پرەزيدەنت نۇرسۇلتان نازارباەۆتىڭ باتىل ساياسي شەشىمى. ول شىن مانىندە استانانى قۇرۋشى جانە ونىڭ باس ارحيتەكتورى بولىپ تابىلادى. قالا كوپ ەتنوستى ەلدىڭ جاراسىم تاپقان ىنتىماعى مەن بەرەكە-بىرلىگىنىڭ ناقتى كورىنىسىن بۇكىل الەمگە پاش ەتىپ تۇر.
ماعان, اسىرەسە استانانىڭ برەندىنە اينالعان «بايتەرەك» مونۋمەنتى ەرەكشە ۇنايدى جانە قىزىقتىرادى. مەن ونى جەمىسى مول الما اعاشىنا بالايمىن. ويتكەنى «باي» دەگەن ءسوز تاتارشا دا باي دەگەن ۇعىمدى بىلدىرەدى. استانا – قازاقستاننىڭ جاڭا ءومىرىنىڭ شىنايى كەسكىن-كەلبەتى, ال الماتى – تاريحي مۇراعا اسا باي مەگاپوليس.
ۋاقىت وتكەن سايىن بەدەل مەن كۇش-قۋات الىپ كەلە جاتقان قازاقستان مەملەكەتى الەم كارتاسىندا مىقتاپ ورنىقتى. بۇل بىرەگەي دە دارا تۇلعا – قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ارقاسى دەپ بىلەمىن.
ول قازىرگى زامان سىن-تەگەۋرىندەرىنە باتىل ءۇن قاتا ءبىلدى, الەمدە بەيبىتشىلىكتى قامتاماسىز ەتۋگە بايلانىستى ومىرشەڭ باستامالار كوتەرىپ وتىردى. ەڭ باستىسى, ول ءوز ەلىنىڭ بولاشاعى ءۇشىن ادال قىزمەت ەتتى, الداعى ۋاقىتتا دا سولاي بولا بەرەتىنىنە سەنىمدىمىن.
نۇرسۇلتان ءابىش ۇلى كوپتەگەن يگى ءىستىڭ باستاماشىسى بولدى. نەبىر قيىن شاقتاردا شىدامدىلىق تانىتتى, ودان شىعۋدىڭ جولدارىن قاراستىردى. ەلىنىڭ مول مۇمكىندىگىن جۇزەگە اسىرۋعا بەلسەنە كىرىسۋمەن بولدى. بۇگىندە سونىڭ يگىلىگىن قازاقستان حالقى كورىپ وتىر. قازاق ەلىن قازىرگى كەزدە بۇكىل الەم تانىدى, حالىقارالىق قوعامداستىق مويىندادى.
كوپتەگەن جىلدار بويى مەن نۇرسۇلتان ابىش ۇلىمەن اڭگىمەلەسۋ باقىتىنا يە بولعان جانداردىڭ ءبىرىمىن. ءبىز ونىمەن بىرگە باۋىرلاس قازاق پەن تاتار حالىقتارىنىڭ اراسىنداعى ەجەلگى تاريحي دوستىق قاتىناستاردى نىعايتۋدىڭ, سونداي-اق ءبىزدىڭ رەسپۋبليكالار اراسىنداعى كوپجاقتى ىنتىماقتاستىقتى دامىتۋدىڭ باستاۋىندا تۇردىق. شىن نيەتپەن اتاپ ءوتۋىم كەرەك, تاتارستان ءۇشىن ساياسي قيىن جاعداي تۋعان كەزدە نۇرسۇلتان نازارباەۆ تۇسىنىستىك تانىتىپ, بىزگە بەدەلدى قولداۋ كورسەتتى. بۇگىندە باۋىرلاس حالىقتار اراسىنداعى بايلانىستار نىعايىپ كەلەدى. وعان ءبىزدىڭ پرەزيدەنت رۋستام ميننيحانوۆ ەرەكشە نازار اۋدارىپ وتىر. ەڭ باستىسى – بۇل ءبىزدىڭ حالقىمىزعا ۇنايدى. وسىنداي دوستىق قاتىناستار ۇرپاقتان-ۇرپاققا جالعاسا بەرەتىن بولادى.
وسىنداي ءساتتى پايدالانا وتىرىپ, جەكە ءوز اتىمنان جانە تاتارستاندىقتار اتىنان اسەم استانانىڭ تۋعان كۇنىمەن قازاقستاندىقتاردى جانە نۇرسۇلتان ءابىش ۇلىن شىن نيەتپەن قۇتتىقتايمىن!
مينتيمەر شايميەۆ,
تاتارستان رەسپۋبليكاسىنىڭ
ەكس-پرەزيدەنتى
