ءىس-شاراعا پارلامەنت دەپۋتاتتارى, قوعام قايراتكەرلەرى, ۇكىمەتتىك ەمەس ۇيىم وكىلدەرى, پارتيا ورتالىق اپپاراتىنىڭ قىزمەتكەرلەرى جانە بەينەكونفەرەنتس بايلانىسى ارقىلى وبلىس اكىمدەرىنىڭ ورىنباسارلارى مەن پارتيا وڭىرلىك فيليالدارىنىڭ باسشىلىعى قاتىستى.
وتىرىستى اشقان ماۋلەن اشىمباەۆ ەلباسى, پارتيا توراعاسىنىڭ تاپسىرماسى بويىنشا «نۇر وتان» پارتياسىنىڭ قوعامنىڭ ءتۇرلى سالاسىندا سىبايلاس جەمقورلىققا قارسى ماقساتتى ءارى جۇيەلى جۇمىس جۇرگىزىپ كەلە جاتقانىن ايتتى. بۇل باعىتتا پارتيانىڭ سىبايلاس جەمقورلىققا قارسى ءىس-قيمىلدىڭ 2015-2025 جىلدارعا ارنالعان باعدارلاماسى باستى قۇجات بولىپ تابىلادى. سونداي-اق «نۇر وتاننىڭ» وسى ماسەلەمەن اينالىساتىن باستى قۇرىلىمى رەتىندە سىبايلاس جەمقورلىققا قارسى رەسپۋبليكالىق قوعامدىق كەڭەس جۇمىس ىستەيدى. مۇنداي كەڭەستەر بارلىق وبلىستار مەن اۋدانداردا قۇرىلعان. ودان بولەك, پارتيانىڭ ماجىلىستەگى فراكتسياسىنىڭ دەپۋتاتتارى دا اتالعان سالادا اۋقىمدى جۇمىستار اتقارۋدا. وسى ماسەلەلەرگە توقتالىپ وتكەن م.اشىمباەۆ الداعى ۋاقىتتا بۇل جۇمىستاردىڭ ودان ءارى جاندانا تۇسەتىنىن جەتكىزدى.
– بۇگىنگى مەموراندۋم پارتيا مەن اگەنتتىك اراسىنداعى سىبايلاس جەمقورلىققا قارسى ءىس-قيمىلدىڭ جاڭا كەزەڭىنە جول اشادى دەپ سەنەمىز. «نۇر وتان» الداعى ۋاقىتتا وسى سالادا باسقا دا مەملەكەتتىك ورگاندارمەن تىعىز جۇمىس ىستەۋگە دايىن. ويتكەنى پارتيانىڭ باستى ميسسياسى – ەلباسىنىڭ سەنىمدى تىرەگى بولۋىمەن قاتار قازاقستاندى جاڭعىرتۋعا جۇيەلى قاتىساتىن ستراتەگيالىق كۇشكە اينالۋ, – دەدى ماۋلەن اشىمباەۆ.
پارتيا توراعاسىنىڭ ءبىرىنشى ورىنباسارى مەموراندۋمدا كورسەتىلگەن تالاپ, مىندەتتەردى ماقساتتى تۇردە ورىنداۋعا قاتىستى بىرقاتار باسىمدىقتاردى اتاپ ءوتىپ, الدىمەن پرەزيدەنتتىڭ بەس الەۋمەتتىك باستاماسىنىڭ جۇزەگە اسىرىلۋىن باقىلاۋ جۇمىستارىنا نازار اۋداردى. ەلباسى تاپسىرماسىنا وراي بەس باستامانىڭ جۇزەگە اسىرىلۋىن باقىلاۋ ماقساتىندا پارتيانىڭ مۇرىندىق بولۋىمەن قوعامدىق كەڭەس قۇرىلعان بولاتىن. سونىڭ ناتيجەسىندە پارتيا وسى باعىتتاعى جۇمىستارعا مونيتورينگ جۇرگىزىپ, انىقتالعان ولقىلىقتاردى جان-جاقتى قاراستىرىپ, سىبايلاس جەمقورلىققا قاتىستى تۇستارىن اگەنتتىكپەن بىرلەسىپ شەشەتىن بولادى. ماۋلەن اشىمباەۆ بۇل جۇمىسقا ۇكىمەتتىك ەمەس ۇيىمداردىڭ دا بەلسەنە قاتىسۋى كەرەكتىگىن ايتتى.
– ەكىنشىدەن, بۇگىندە پارتيا سىبايلاس جەمقورلىقتىڭ الدىن الىپ, وسى سالاداعى كولەڭكەلى تۇستاردى جويۋعا باعىتتالعان بىرقاتار پارتيالىق جوبالاردى قولعا الدى. ۇشىنشىدەن, سىبايلاس جەمقورلىقتى مۇلدەم بولدىرماۋ ءۇشىن مەملەكەتتىك ورگاندار مەن ۇلتتىق كومپانيالاردىڭ اقپاراتتارعا قولجەتىمدىلىگىن قامتاماسىز ەتۋگە ەرەكشە كوڭىل بولىنبەك. تورتىنشىدەن, كۇرەستى كۇشەيتۋ ءۇشىن پارتيانىڭ بارلىق رەسۋرسىن جۇمىلدىراتىن بولامىز. قوعامدىق قابىلداۋعا كەلگەن حالىق وسى ماسەلەگە قاتىستى قانداي دا ءبىر اقپارات, ۇسىنىس بەرسە, ونى تالداپ, قاجەت جاعدايدا اگەنتتىككە جولدايمىز. بەسىنشىدەن, پارتيا مەن ۇكىمەتتىك ەمەس ۇيىمدار اراسىنداعى جۇمىستى جانداندىرۋعا تىڭ سەرپىن بەرىلەدى, – دەدى ماۋلەن اشىمباەۆ.
سونىمەن قاتار جيىن بارىسىندا 2017 جىلى ءتۇرلى سەبەپتەرمەن 276 ادامنىڭ پارتيا قاتارىنان شىعارىلعانى ايتىلدى. ولاردىڭ 171-ءى سىبايلاس جەمقورلىققا قاتىستى ءىس-ارەكەتى ءۇشىن شىعارىلعان. پارتيا توراعاسىنىڭ ءبىرىنشى ورىنباسارى مۇنداي جايتتاردى مۇلدەم بولدىرماۋ ءۇشىن الداعى ۋاقىتتا نۇروتاندىقتاردىڭ ساپاسىنا ەرەكشە ءمان بەرىلەتىنىن باسا ايتتى.
– ەندى ءبىز پارتيا مۇشەلەرىنىڭ سانىنا ەمەس ساپاسىنا كوپ كوڭىل بولەتىن بولامىز. قانداي دا ءبىر سىبايلاس جەمقورلىققا قاتىسى بار, قىزمەتىن ءوزىنىڭ جەكە ماقساتىنا پايدالانعىسى كەلەتىن ادامعا پارتيادا ورىن جوق. ەگەر ءبىز جەمقورلىقپەن كۇرەسكە بەلسەنە قاتىسقىمىز كەلسە, الدىمەن ءوز قاتارىمىزدىڭ تازالىعىن قامتاماسىز ەتىپ الۋىمىز كەرەك, – دەدى ماۋلەن اشىمباەۆ.
ءوز كەزەگىندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ سىبايلاس جەمقورلىقپەن كۇرەس تەك مەملەكەتكە عانا ەمەس, بۇل بۇكىل ازاماتتىق قوعامعا ورتاق ماسەلە ەكەنىن ايتتى. «نۇر وتان» پارتياسىنىڭ بۇل سالاعا كوڭىل ءبولىپ, جوعارى دەڭگەيدە تالقىلاۋى قۇپتارلىق ءىس, – دەدى اليك شپەكباەۆ.ونىڭ سوزىنە قاراعاندا, ەلەكتروندى ۇكىمەت پەن كاسىبي, ستراتەگيالىق مەملەكەتتىك اپپاراتتىڭ قۇرىلۋى بۇل سالاداعى باقىلاۋ جۇمىستارىنا وڭ سەپتىگىن تيگىزۋدە. «ەندىگى ساتى – يننوۆاتسيالىق مەملەكەتتىك اپپاراتقا كوشۋ. بۇل باعىتتا اۋقىمدى جۇمىستار اتقارىلۋدا», – دەيدى اگەنتتىك توراعاسى.
وسى رەتتە ايتا كەتەر جايت, پارتيا مەن اگەنتتىك اراسىنداعى مەموراندۋمنىڭ باستى ماقساتى – ەلىمىزدىڭ سىبايلاس جەمقورلىققا قارسى ساياساتىن ورىنداۋعا باعىتتالعان بىرلەسكەن جانە كەلىسىلگەن ءىس-قيمىلدى دايارلاپ, جۇزەگە اسىرۋ, وسى باعىتتاعى قولعا الىنعان شارالاردىڭ تيىمدىلىگىن ارتتىرۋ, جەمقورلىقتىڭ سەبەپ-سالدارىن جويۋ جانە ونىڭ الدىن الۋ.
سونىمەن قاتار كۇش بىرىكتىرۋ ارقىلى قوعامدا جەمقورلىققا قارسى مادەنيەت قالىپتاستىرىپ, قۇقىقتىق ساۋاتتىلىقتى ارتتىرۋ, ەڭبەككە ادالدىق پەن جەمقورلىققا توزىمسىزدىكتى كەڭىنەن ناسيحاتتاۋ, سىبايلاس جەمقورلىققا قارسى تاربيە جانە وسكەلەڭ ۇرپاق پەن جاستاردىڭ بۇل سالاداعى ءبىلىمىن تەرەڭدەتۋ سياقتى باسىم باعىتتار جۇزەگە اسىرىلاتىن بولادى.
جولدىباي بازار,
«ەگەمەن قازاقستان»
