قازاق عىلىمىنا ولشەۋسىز ۇلەس قوسقان ومىرزاق ماحمۇت ۇلىنىڭ ەسىمى فيزيكا-ماتەماتيكا سالاسىنداعى سيرەك ءارى ماڭىزدى زەرتتەۋلەرمەن تىعىز بايلانىستى. اسىرەسە, قازاقستاننىڭ عارىش سالاسىنا قاتىستى ىلگەرىندى زەرتتەۋلەرى ەلىمىز عانا ەمەس, پوستكەڭەستىك ەلدەر مەن الىس-جاقىن شەتەلدەردە جوعارى باعالانعانى بەلگىلى. ومىرزاق ماحمۇت ۇلىنىڭ عىلىمي جەتەكشىلىگىمەن 6 دوكتورلىق جانە 25 كانديداتتىق ديسسەرتاتسيا قورعالىپ, ەكى جۇزدەن استام عىلىمي جانە عىلىمي-كوپشىلىك ماقالالارى, مونوگرافيالارى مەن وقۋلىقتارى بۇگىندە ەلىمىزدىڭ جوعارى وقۋ ورىندارى ستۋدەنتتەرى ءۇشىن قۇندى ەڭبەكتەر بولىپ تابىلادى.
ايتۋلى شاراعا قاتىسقان الماتى قالاسى اكىمدىگى مادەنيەت جانە ارحيۆتەر باسقارماسى باسشىسىنىڭ ورىنباسارى د.ا. اليەۆ ۇلتتىق كىتاپحانا قولعا العان يگى شارانىڭ ماڭىزدىلىعىنا توقتالىپ ءوتتى. بۇگىندە جەتى ميلليونعا جۋىق كىتاپ قورى بار رۋحانيات ورداسى ءبىلىم, عىلىم جولىندا جۇرگەن قاۋىمعا عانا ەمەس, مادەني قۇندىلىقتارىمىزدى ەرتەڭگى ۇرپاققا سىنى مەن سىرىن بۇزباي جەتكىزۋدە كوپتەگەن جوبالاردى جۇزەگە اسىرىپ كەلەدى. دانيار ابزاليدەن ۇلى ەلىمىزدىڭ عىلىم اكادەمياسىنىڭ باسشىلىعىندا قىزمەت ەتىپ, وتاندىق عىلىمنىڭ دامۋىندا ايرىقشا ۇلەس قوسقان ومىرزاق ماحمۇت ۇلىنىڭ ەرەن ەڭبەكتەرىنە توقتالىپ ءوتتى. وسى يگى شارانى قولعا الىپ, ۇزەگە اسىرىپ وتىرعان عالىمنىڭ وتباسىنا, ۇلتتىق كىتاپحانا ديرەكتورى ج.ت.سەيدۋمانوۆقا العىس ءبىلدىرىپ, كىتاپحاناعا ارنايى سىيلىق تابىس ەتتى.
ال قيىن-قىستاۋ جىلداردا عالىمنىڭ عىلىمي ىزدەنىستەرى جولىندا ەڭبەك ەتۋىنە قولداۋشى, قامقورشى بولا بىلگەن جارى رايحان عانيقىزى ءو.سۇلتانعازين ەسىمىمەن اتالاتىن عىلىمي قىزمەتكەرلەرگە ارنالعان زالعا ماتەماتيكا, فيزيكا سالاسىنا قاتىستى عىلىمي كىتاپتاردى سىيعا تارتىپ, وسى يگى شاراعا اتسالىسىپ وتىرعان ازاماتتارعا العىسىن ءبىلدىردى. سونىمەن بىرگە عالىمنىڭ ارتىندا قالعان ۇرپاقتارى عىلىم جولىنا تۇسپەگەنىمەن, ەلىمىز ەكونوميكاسىنىڭ دامۋىنا ءوز ۇلەستەرىن قوسىپ جۇرگەنىن ايتىپ ءوتتى. قىزى جانات حالىقارالىق دەڭگەيدەگى بيزنەستەرگە اتسالىسىپ جۇرسە, ۇلى الماز ومىرزاق ۇلى «Sulpak» كومپانياسىنىڭ اكتسيونەرى.
كەلەسى كەزەكتە ءسوز العان عالىمنىڭ شاكىرتى, اباي اتىنداعى قازۇپۋ رەكتورى ت.و. بالىقباەۆ ومىرزاق ماحمۇت ۇلىنىڭ عىلىمداعى ولشەۋسىز ەڭبەگى تۋرالى ايتىپ ءوتىپ, ۇستازدىق ەتكەن جىلدارداعى ەستەلىكتەرىمەن ءبولىستى. «قازاقستان عىلىمىندا ايشىقتى ورنى بار ءو.سۇلتانعازين ەسىمىنىڭ ۇلتتىق كىتاپحانا تورىنەن الۋى قازاق عىلىمىنا دەگەن ۇلكەن قۇرمەت. ءو.سۇلتانعازين ەسىمى اتالعاندا عارىش سالاسىندا جاساعان ىلگەرىندى ەڭبەكتەرى ءسوزسىز ەسكە تۇسەدى. عالىمنىڭ باستاماسىمەن عارىش زەرتتەۋلەرى ينستيتۋتى قۇرىلعانىنىڭ ءوزى ءو.سۇلتانعازيننىڭ بۇتىندەي قازاق عىلىمىنا قوسقان ەڭبەگىنىڭ ولشەۋسىز ەكەندىگىن بىلدىرەدى»,- دەپ اتاپ ءوتتى شاراعا قاتىسقان پروفەسسور ي.ت.پاك.
ەلۆيرا سەرىكقىزى,
«ەگەمەن قازاقستان»
الماتى
