ەڭبەك جولىم تسەلينوگرادتا باستالدى
– ومىربايانىڭىزعا قاراپ وتىرىپ, ءومىر جولىڭىزدا بۇرىنعى تسەلينوگراد, اقمولا, بۇگىنگى استانا ماڭىزدى ورىن العانىن بايقادىق. قالامەن قاتار وربىگەن جولىڭىز قالاي باستالىپ ەدى؟
– مەنىڭ ەڭبەك جولىم, ءومىر جولىم تەمىر جول سالاسىمەن تىعىز بايلانىستى. ال ءوزىم ۇزاق جىلدار جۇمىس ىستەگەن تىڭ تەمىر جولىنىڭ كىندىگى قازىرگى استانا – بۇرىنعى اقمولا, تسەلينوگراد قالاسىندا بولدى. ءسال ارىدەن باستايتىن بولسام, 1964 جىلى ينستيتۋتتى ءتامامداپ, تەمىرجولدى اۆتوماتتاندىرۋ, تەلەمەحانيكا جانە بايلانىس ماماندىعىن يەلەنىپ شىقتىم. ول كەزدە تەمىر جول ماماندارىنا سۇرانىس وتە جوعارى بولاتىن. ءبىزدىڭ قايدا جۇمىس ىستەۋگە باراتىنىمىزدى الماتىداعى جول باسقارماسى شەشەتىن. سوڭعى كۋرستا وقىپ جۇرگەندە ديپلوم الدىنداعى تاجىريبەدەن ءوتۋ ءۇشىن تسەلينوگراد سيگناليزاتسيا جانە بايلانىس ديستانتسياسىنا كەلىپ, ءۇش اي جۇمىس ىستەدىم, ديپلوم جازدىم. ستۋدەنت ەكەنىمە قاراماستان, مەنى سول مەكەمەگە جۇمىسقا الدى. ول كەزدە ستۋدەنت ءۇشىن تۇراقتى ەڭبەكاقى الۋدىڭ ءوزى ءبىر كەرەمەت ەدى.
مەن جاس كەزىمنەن باستاپ وزىمە قانداي جۇمىس تاپسىرىلسا, سونى بۇلجىتپاي ورىنداۋعا تىرىستىم. وسى قاسيەتىمنىڭ ارقاسىندا ۇجىمعا ۇنادىم, ۇجىم دا ماعان ۇنادى. ديپلوم العاننان كەيىن تسەلينوگراد سيگناليزاتسيا جانە بايلانىس ديستانتسياسى ارنايى سۇرانىس جىبەرىپ, وزدەرىنە جۇمىسقا شاقىرىپ الدى. بولاشاق ەلوردامەن بايلانىسىم وسىلاي باستالعان-دى.
بىراق ارادا ءۇش اي وتپەي جاتىپ اسكەري بورىشىمدى وتەۋگە الىپ كەتتى. بۇرىنعى ارىپتەستەرىم «اسكەردەن كەيىن بىزگە كەل» دەپ حات جازىپ تۇردى. ول كەزدە شەشەم قوستاناي وبلىسى سەميوزەر اۋدانىندا تۇراتىن, اكەم ەرتە قايتىس بولعان. اسكەردەن كەيىن انامنىڭ وتىنىشىمەن اتا-بابامىزدىڭ مەكەندەگەن جەرى دەپ قوستانايعا قايتىپ بارىپ ەدىم, ول جاقتا ونشا جىلى قابىلدامادى. ءسويتىپ تسەلينوگرادقا ورالدىم.
بەس اي قاتارداعى ينجەنەر بولىپ ىستەگەننەن كەيىن سول ديستانتسيانىڭ باس ينجەنەرى قىزمەتىنە تاعايىندالدىم. ءبىر جارىم جىلدان كەيىن تسەلينوگراد تەمىر جولىنىڭ ءبولىم باستىعى ەتىپ جوعارىلاتتى. جاقسى تەحنولوگ رەتىندە كورىندىم, قالادان پاتەر الدىم. ەڭبەگىم باعالانىپ, الماتىعا جۇمىسقا شاقىرىلدىم. ەكى رەت باس تارتسام دا, ءۇشىنشى رەت الماتى تەمىر جولىنىڭ باس ينجەنەرىنىڭ ورىنباسارى قىزمەتىنە كەلىسىم بەرۋىمە تۋرا كەلدى, بىرنەشە جىل الماتىدا جۇمىس ىستەدىم.
1977 جىلى قازاقستان تەمىر جولى ۇلكەن-ۇلكەن ءۇش قۇرىلىمعا ءبولىنىپ, تىڭ تەمىر جولى قۇرىلاتىن بولدى. مەن سول تۇستا ءوزىم جۇمىس باستاعان, بۇرىننان جاقسى بىلەتىن ولكەگە قايتىپ كەلىپ, تىڭ تەمىر جولىنىڭ باس ينجەنەرى قىزمەتىنە كىرىستىم. كەڭەس ۇكىمەتىندە 31 تەمىر جول ءبولىمى بولسا, 31-گە جاڭا تولعان مەن سول بولىمدەرىنىڭ باس ينجەنەرلەرىنىڭ ىشىندەگى ەڭ جاسى ەدىم.
«اۋەل باستان الەۋەتى زور قالا»
– جالپى بۇرىنعى اقمولادا حالىق سانى از, قالانىڭ اۋماعى شاعىن بولعانىنا قاراماستان, وسى ولكەدەگى الاتىن ورنى زور شاھار بولعانى بايقالادى. بۇل نەمەن بايلانىستى؟
– جوعارىدا ايتىپ وتكەنىمدەي, بۇل قالا اۋەل باستان توعىز جولدىڭ تورابىندا ورنالاسقان. گەوگرافيالىق جاعىنان العاندا قاراعاندى مەن جەزقازعان دا ورتالىقتا قونىس تەپكەن. بىراق كولىك-كوممۋنيكاتسيالىق, لوگيستيكالىق جاعىنان اقمولانىڭ ورنى قاشاندا بولەك. قالا سوناۋ وتىزىنشى جىلداردىڭ وزىندە ايماقتاعى باستى ورتالىق سانالدى. گەوگرافيالىق ورنالاسۋ ورنىنىڭ تيىمدىلىگىنە قوسا, ينفراقۇرىلىم سالىنعاننان كەيىن ماڭىزى ارتا بەردى. قىرقىنشى جىلدارى قاراعاندى ماگيسترالى ومبى تەمىر جولىنىڭ قۇرامىنان بولىنگەندە اقمولا ورتالىعى رەتىندە تاڭدالدى. ەلۋىنشى جىلدارداعى تىڭ يگەرۋ ناۋقانىندا ودان سايىن كۇشەيدى. كولىك تۇرلەرىنىڭ ىشىندەگى ەڭ ماڭىزدىسى – تەمىر جول قاتىناسىنىڭ قۋاتى ارتقان سايىن قالانىڭ ەكونوميكاسى, حالقىنىڭ الەۋمەتتىك جاعدايى دا جاقسارا بەردى. اقمولا – پويىزبەن دە, اۆتوكولىكپەن دە, اۆياتسيامەن دە جەتۋگە بولاتىن شاھار ەدى. قالانىڭ ەلوردا رەتىندە تاڭدالۋىنا ىقپال ەتكەن باستى فاكتورلاردىڭ ءبىرى دە وسى.
– تەمىر جول سالاسىندا باسشىلىق قىزمەت اتقارا ءجۇرىپ, قالانىڭ كوركەيۋىنە قانشالىقتى ۇلەس قوسا الدىڭىز؟
– تىڭ تەمىر جولى ەلىمىزدىڭ سولتۇستىك جانە ورتالىق ايماعىنداعى 8 وبلىستى بىرىكتىرەتىن اسا ۇلكەن ۇجىم بولدى. سول جىلدارى «تسەلينترانسستروي» ترەسى جەڭىس داڭعىلىنداعى قىزمەتتىك عيماراتتاردى سالدى. تەمىرجولشىلارعا ارنالعان جاڭا اۋرۋحانا پايدالانۋعا بەرىلدى. بەس جىلدىڭ ىشىندە ەكىباستۇز, بۋراباي ستانسالارىندا جاڭا ۆوكزالدار بوي كوتەردى, ارقالىق پەن ەسىلدەگى ەسكى ۆوكزالدار كەڭەيتىلدى. وڭ جاعالاۋداعى ۆوكزالدىڭ ءزاۋلىم بيىك جاڭا كورپۋسى دا سول جىلى سالىندى. 1986 جىلى قازاقستان كومپارتياسى ورتالىق كوميتەتىنىڭ حاتشىسى قاراتاي تۇرىسوۆقا تسەلينوگراد ۆوكزالىنىڭ جاڭا كورپۋسىن كورسەتكەنىمدە, ول كىسى: «ۆوكزالدى الماتىداعىدان دا بيىك ەتىپ سالىپسىڭ, تاياق جەپ قالامىن دەپ قورىقپايسىڭ با؟» دەپ ازىلدەگەنى بار. مەن دە قالجىڭداپ: «كىم بىلەدى, استانا بىزگە كەلىپ جاتسا, دايىن بولايىق دەگەنىم عوي» دەپ جاۋاپ بەردىم.
جالپى, تىڭ تەمىر جولى ءبىر عانا تسەلينوگراد قالاسىنىڭ وزىندە وتىزدان استام ءىرى قۇرىلىس نىساندارىن سالدى. ولاردىڭ ىشىندە تەمىر جول اۋرۋحاناسىنىڭ حيرۋرگيالىق كورپۋسى, 200 ورىندىق تۋبەركۋلەز ديسپانسەرى, جۇزدەگەن ادامعا ارنالعان ەمحانا, ستانسالاردى سۋمەن جابدىقتايتىن شەبەرحانالار, تاعى باسقالارى بار. جالپى اۋماعى 28 مىڭ شارشى مەترگە تەڭ باسپانا بەرىلدى. قاراپ وتىرسام, جىل سايىن 840-قا جۋىق پاتەر بەرىلىپ وتىرعان ەكەن. مۇنىڭ ءبارىن نە ءۇشىن ايتىپ وتىر دەرسىز. ونىڭ سەبەبى, بۇگىنگى ەلوردامىزدىڭ نەگىزگى ىرگەتاسى سول جىلدارى قالىپتاستى. تەمىر جول قالانىڭ ينفراقۇرىلىمىنا نەگىز قالادى. توڭىرەكتىڭ بارلىعىمەن بايلانىس كۇشەيدى. بۇل جۇمىستىڭ ءبارىن تەك ءوزىمنىڭ ەسىمىممەن بايلانىستىرۋدان اۋلاقپىن, مەن وسى قىرۋار ءىستىڭ باسى-قاسىندا ءجۇرىپ, ءوز كوزىممەن كورگەندەرىمدى ايتىپ وتىرمىن.
تىڭ تەمىر جولى ەڭ دامىعان, جەتەكشى جولداردىڭ ءبىرى بولدى. بەس جىل تاپجىلماي ەڭبەك ەتكەننەن كەيىن ءارى قاراي ءبىلىمىمدى جەتىلدىرۋ كەرەكتىگىن ءتۇسىنىپ, ماسكەۋدەگى مينيسترلەر كەڭەسىنىڭ جانىنداعى حالىق شارۋاشىلىعى اكادەمياسىنا وقۋعا ءتۇستىم. 2 جىلداي وقىپ, كانديداتتىق ديسسەرتاتسيا قورعاپ, بىتىرگەننەن كەيىن ءوزىم سۇرانىپ تسەلينوگرادقا قايتا ورالدىم, ۇلكەن تىڭ تەمىر جولىن باسقاردىم. قاراپ وتىرسام, وسى ولكەگە بىرنەشە رەت ءوزىم نيەتتەنىپ قايتىپ كەلىپ وتىرعان ەكەنمىن. ءسويتىپ العاشىندا قاراپايىم ينجەنەر بولىپ باستاعان تىڭ تەمىر جولىندا 150 مىڭ ادامنان ارتىق ادامعا باسشىلىق جاسايتىن دارەجەگە دەيىن جەتىپپىن.
تسەلينوگراد مەنىڭ تۋعان جەرىم سياقتى بولىپ كەتتى. وسى جەردە ەڭبەك جولىمنىڭ باسىم بولىگى, سانالى عۇمىرىم وسىندا ءوتتى. ءوزىم قازاقستانداعى جۇمىسىمدى ودان ءارى جالعاستىرعىم كەلگەن. بىراق سول كەزدەگى كسرو جول قاتىناستارى ءمينيسترى نيكولاي كونارەۆتىڭ شاقىرۋىمەن ءمينيستردىڭ ورىنباسارى قىزمەتىنە تاعايىندالىپ, ماسكەۋگە كەتۋىمە تۋرا كەلدى.
– بىلۋىمىزشە, سول تۇستا مۇنداي جوعارى لاۋازىمعا تاعايىندالعان قازاقتار نەكەن-ساياق ەدى عوي؟
– دۇرىس ايتاسىز. جالپى, كەڭەس كەزىندە كادرلاردى ىرىكتەۋ وتە قاتال, بىراق ءبىرشاما ءادىل بولاتىن. جوعارى لاۋازىمدى قىزمەتتەردى اتقارۋ ءۇشىن كادرلاردىڭ تومەنگى ساتىلاردىڭ بارىنەن وتۋىنە ەرەكشە نازار اۋدارىلاتىن. بۇل جۇيەنىڭ ءبىر كەمشىلىگى, قازاقستان جانە باسقا دا ورتالىق ازيانىڭ جەرگىلىكتى كادرلارىنا قاتىستى كوزقاراس اسا جاقسى بولعان جوق. ەڭ العاش سوۆناركوم توراعاسىنىڭ ورىنباسارى بولعان ادام – كورنەكتى مەملەكەت قايراتكەرى تۇرار رىسقۇلوۆ بولدى. از ۋاقىت كسرو ەنەرگەتيكا ءمينيسترىنىڭ ورىنباسارى قىزمەتىن يبراگيم تاجيەۆ تە اتقارعان. بۇل ەكى ازاماتتان كەيىن ارادا قىرىق جىل وتكەن سوڭ كسرو جول قاتىناستارى ءمينيسترىنىڭ ورىنباسارى قىزمەتىنە مەن تاعايىندالدىم.
– ماسكەۋدەن ەلگە ەرتەرەك قايتۋىڭىزعا نە سەبەپ بولدى؟
– ماسكەۋدە جاقسى جۇمىس ىستەدىم, ورتالىق كوميتەت پەن ۇكىمەتتە ءبىر كىسىدەي بەدەلىم بولدى. سەكسەنىنشى جىلدارى وداقتاعى ەكونوميكالىق قيىندىقتار, ونى تۇبەگەيلى شەشۋگە دەگەن تالپىنىستاردىڭ السىزدىگى بىردەن سەزىلىپ تۇردى. بۇل تەمىر جول سالاسىنا دا قاتىستى. لوكوموتيۆتەر, شپال, رەلس سياقتى ەڭ باستى قاجەتتىلىكتەردىڭ جەتپەۋى, بۇرىنعى تەحنيكالاردىڭ توزۋى سياقتى ماسەلەلەردى شەشۋگە ورتالىق ورگانداردىڭ ونشا ق ۇلىقتى ەمەس ەكەنى كورىنىپ تۇراتىن. قايتا قۇرۋدان ناتيجە شىقپايتىنىنا سول جاقتا ءجۇرىپ كوزىم جەتتى. جاعداي قيىنداماسا, جاقسارمايتىنى, الدا قيىن جىلدار كەلە جاتقانى بەلگىلى ەدى. ءسويتىپ «ەسىڭ باردا ەلىڭدى تاپ» دەگەندەي, مەن قازاقستانعا قايتۋ تۋرالى ويلانا باستادىم. قانداي قيىن جاعداي بولسا دا ءوز ەلىڭدە, ءوز ۇيىڭدە, حالقىڭنىڭ ورتاسىندا بولعان ارتىق دەپ شەشتىم. كوپ ۇزاماي الماتى تەمىر جولىنىڭ باستىعى بولىپ اۋىستىم.
– استانانى اقمولاعا كوشىرۋ ماسەلەسى قوزعالعان تۇستا ءسىز پرەمەر-ءمينيستردىڭ ءبىرىنشى ورىنباسارى قىزمەتىن اتقارىپ ءجۇردىڭىز. ارتىنشا ەلوردانى كوشكە دايىندايتىن ۇكىمەتتىك كوميسسياعا توراعالىق جاسادىڭىز. بۇل ۇلان-عايىر جۇمىس قالاي جۇرگىزىلدى؟
– استانانى اۋىستىرۋ ماسەلەسى قوزعالعاندا بىرنەشە قالانىڭ كانديداتۋراسى ۇسىنىلعانى بەلگىلى. اقمولا, كوكشەتاۋ, قاراعاندى قالالارىنىڭ اتى اتالعاندا مەن ءوزىم جاقسى بىلەتىن اقمولانى بىردەن قولدادىم. قالانىڭ ءار عيماراتىن, ءار بۇرىشىن, توڭىرەگىن تۇگەل بىلەتىن, ولكەدەگى احۋالدان جان-جاقتى حاباردار ادام رەتىندە كوميسسيانىڭ توراعالىعى ماعان جۇكتەلدى.
جاڭادان قۇرىلعان كوميسسيا اقمولاعا بىرنەشە رەت كەلىپ, جوسپار قۇردىق. ورتالىق ۆەدومستۆولار ورنالاساتىن عيماراتتاردى ۇسىندىق. تەمىر جولعا تيەسىلى ءبىراز عيماراتتاردى مينيسترلىكتەرگە بەرەتىن بولدىق. قازىرگى اباي – بۇرىنعى لەنين كوشەسىندەگى تىڭ تەمىر جولى باسقارماسىنىڭ عيماراتىنا كولىك جانە كوممۋنيكاتسيا مينيسترلىگى مەن اۋىل شارۋاشىلىعى مينيسترلىگى ورنالاستى. وبلىس اكىمدىگىنىڭ عيماراتىنا ۇكىمەت كوشىپ كەلدى. جەلتوقسان مەن كەنەسارىنىڭ قيىلىسىنداعى تەمىر جول تەحنيكۋمى ۇلتتىق قاۋىپسىزدىك كوميتەتىنە, كەنەسارى كوشەسىندەگى تەمىر جولدىڭ ينتەرناتى رەسپۋبليكالىق ۇلاننىڭ شتابىنا بەرىلدى.
– جاڭا ەلوردا تەز قانات جايىپ, ۇلكەن شاھارعا اينالاتىنىن سول كەزدە ءبىلدىڭىز بە؟
– بىردەن ايتايىن, استانانىڭ قۇرىلىسى سونشالىقتى قارقىندى جۇرگىزىلەدى دەپ ويلاعان جوقپىن, ونى ەلەستەتۋدىڭ ءوزى مۇمكىن ەمەستەي ەدى. ءبىز جۇمىستاردىڭ بارلىعى بىرتىندەپ جۇرگىزىلەدى دەپ ويلادىق. ەكونوميكالىق جاعداي وتە قيىن بولدى, باسقا شىعىنداردى ايتپاعاندا حالىقتىڭ ەڭبەكاقىسىن ۋاقتىلى تولەپ وتىرۋدىڭ ءوزى قيىنعا ءتۇستى. ءبىر جەردە جارىق جوق, ەندى ءبىر جەردە سۋ جوق, گاز جوق... جاعداي شىنىندا دا كۇردەلى بولاتىن. اپتا سايىن سەلەكتورلىق جيىن وتكىزىپ, كۇن سايىن تالداۋ جاساپ, پروبلەمالاردى نارىق جاعدايىندا قالاي شەشۋ كەرەكتىگىن ۇيرەندىك. وسىنىڭ ءبارىن كوزىمىزبەن كورىپ وتىرىپ ەلوردانى بىردەن سالىنادى دەپ كىم ويلاعان؟! ەلوردانىڭ سونشالىقتى جىلدام قارقىنمەن سالىنعانى, از ۋاقىت ىشىندە گۇلدەنگەن قالاعا اينالعانى, ەڭ ءبىرىنشى كەزەكتە پرەزيدەنتتىڭ ەرىك-جىگەرىنىڭ ارقاسى دەپ سانايمىن.
ۆوكزال – قالانىڭ جانى
– استاناعا ەكىنشى ۆوكزال كەرەك ەكەندىگىن ەڭ العاش ءباسپاسوز بەتىندە ايتقانداردىڭ ءبىرى ەدىڭىز. بىلتىر اشىلعان «نۇرلى جول» ۆوكزالىن كوردىڭىز بە؟
– ۆوكزال دەگەن تاۋلىكتىڭ 24 ساعاتىندا تىرشىلىك تولاستامايتىن, ءومىر قايناپ جاتاتىن جەر. قالانىڭ جانى دەۋگە بولادى. جولاۋشىلار دا, ماشينالار دا, قوعامدىق كولىكتەر دە ۆوكزالعا, ۆوكزالدىڭ ماڭىنا جينالادى. ۇلكەن قالاعا ءبىر ۆوكزال ازدىق ەتەدى, مەگاپوليستەردە 2-3 ۆوكزالعا دەيىن بولادى. استاناعا دا جاڭا ۆوكزال كەرەك ەكەندىگىن ايتۋىما وسى سەبەپ بولدى.
مەن باسپاسوزدە وسى ۆوكزال ماسەلەسىن شەشۋدىڭ بىرنەشە جولى بار ەكەنىن ايتتىم. ءبىرىنشىسى – ەسكى ۆوكزالدى ۇلكەيتۋ, ەكىنشىسى – 40-شى ستانسادان سالۋ. ءۇشىنشى نۇسقام مۇلدە باسقا جەردەن جاڭا ۆوكزال سالۋ بولدى. ەسكى ۆوكزالدى ۇلكەيتكەننەن ماسەلە شەشىلمەيتىنى تۇسىنىكتى بولدى. ال جاڭادان سالىنعان «نۇرلى جول» ۆوكزالى بولاشاقتا حالىق سانىنىڭ ارتۋىنا دا, جولاۋشىلارعا ىڭعايلى بولۋى جاعىنان دا, تەمىر جول قاتىناستارىنا, ماشينا مەن قوعامدىق كولىكتەر قاتىناسىنا دا ىڭعايلى ەتىپ سالىنعان. بولاشاقتا ەلوردانىڭ حالقى 1,5-2 ميلليونعا جەتسە دە, جاڭا ۆوكزال ولاردىڭ ءبارىن قابىلداۋعا دايىن.
– قازىرگى ەلوردانىڭ ساۋلەتىنە قاتىستى قانداي كوزقاراستاسىز؟ باسقاشا جاساعاندا بۇدان دا جاقسى بولار ەدى دەيتىن جەرى بار ما؟
– استانا كوز الدىمىزدا سالىندى, از عانا جىلداردىڭ ىشىندە كوركەيدى. بۇرىن سايىن دالا بولىپ جاتقان سول جاعالاۋ ادام تانىماستاي وزگەرىپ, ۇلكەن قالاعا اينالدى. مۇنىڭ بارلىعى ۇلكەن ەڭبەكتى, قاجىر-قايراتتى قاجەت ەتەدى. مەن ەندىگى ۋاقىتتا قالانىڭ تەك جاڭادان سالىنعان بولىگىنە عانا ەمەس, وڭ جاعالاۋداعى اۋداندارىنا دا نازار اۋدارىلسا دەيمىن. استانادا ءۇش قالانىڭ ساۋلەت نىشانى بار. ەسىلدىڭ سول جاعالاۋى – جاڭا استانا بولسا, وڭ جاعالاۋداعى بۇرىنعى بازاردىڭ ماڭايىندا, ۆوكزال جاقتاعى اۋدانداردا اقمولا مەن تسەلينوگرادتىڭ بەلگىلەرى ساقتالعان. ەندى سول بۇرىنعى اۋداندار دا جاڭارعانىن, جاسارعانىن قالايمىن. ەسكى قالانى ۇمىتىپ كەتپەي, قالانىڭ جاڭا بولىگىمەن بىرگە دامىتۋ كەرەك.
استانادا دامىعان ينفراقۇرىلىم دا, سۋ دا, تابيعات تا, تاريح تا بار. ەلوردا بولۋ ءۇشىن قالاعا كەرەك دەگەن باستى قۇندىلىقتاردىڭ ءبارى وسى جەردەن تابىلادى. ءبىراز ۋاقىت الماتىدا تۇرسام دا, استانا مەن ءۇشىن ەرەكشە ىستىق. تاۋ-تاستى جەردەن گورى دالا جانىما جاقىن, قايدا جۇرسەك تە ارقانىڭ دالاسى تارتىپ تۇرادى. ەڭبەك جولىمنىڭ, ءومىر جولىمنىڭ ەڭ ۇزاق تا قىزىقتى ساتتەرى وسى قالادا ءوتتى. تسەلينوگراد كەزىنەن باستاپ ماعان بۇل جەردىڭ ءار بۇرىشى ىستىق.
– اڭگىمەڭىزگە راحمەت.
اڭگىمەلەسكەن ارنۇر اسقار,
«ەگەمەن قازاقستان»
