جۋىردا شىمكەنت قالاسى تۇرعىندارىنىڭ ميلليونعا جەتۋىنە بايلانىستى جەرگىلىكتى اكىمدىك پەن ءماسليحات رەسپۋبليكالىق ماڭىزى بار قالا مارتەبەسىنە قاتىستى بىرلەسكەن شەشىمگە قول قويعان بولاتىن. سونداي-اق وبلىس ورتالىعىن تۇركىستان قالاسى ەتۋ جونىندەگى ۇسىنىس تا جاسالدى.
ارينە, بۇل ىزگى قادامداردىڭ بارلىعى جان-جاقتى سارالانىپ, بارلىق ماسەلە ەسەپتەلىپ-ەسكەرىلىپ جاسالىپ وتىر. وڭىردەگى دەموگرافيالىق ءوسىمدى, الەۋمەتتىك-ەكونوميكالىق دامۋ دەڭگەيىن ساراپتاعان ەلباسى شىمكەنتتىڭ مەگاپوليس اتاناتىنىن وسىدان 3-4 جىل بۇرىن ايتقان بولاتىن. ەندى مىنە ۇلى تۇركى بابالارىمىزدىڭ تۇپقازىعى سانالاتىن قاسيەتتى ولكەنى – تۇركىستان وبلىسى دەپ اتاۋ جونىندەگى ەلباسىنىڭ كورەگەن شەشىمى ءوڭىر حالقىن قۋانتىپ وتىر. «تۇركىستان» اتاۋى ۇلى دالانىڭ ءداۋىرى مەن داۋىسىن بۇگىنگە جەتكىزىپ تۇر.
تۇركىستان – رۋحتى جىگەرلەندىرىپ, الاشتى ارقالاندىرىپ, تاعدىرلى كەزەڭدەردە قازاق دەيتىن حالىقتى ساقتاپ, بەرەكەسىن ارتتىرا بىلگەن, حاندار مەن بيلەردىڭ, باتىرلاردىڭ ماڭگىلىك مەكەنىنە اينالعان قاسيەتتى جەر. تۇركىستاننىڭ وبلىس ورتالىعى رەتىندە دامۋ مۇمكىندىگى مول ەكەنىن سەنىممەن ايتا الامىن. ونىڭ دامۋ الەۋەتىنىڭ جوعارى ەكەندىگىنە ىلگەرىدە وسى قالا اكىمىنىڭ ورىنباسارى قىزمەتىن اتقارىپ جۇرگەندە كوز جەتكىزگەن بولاتىنمىن. تۇركىستاننىڭ 1500 جىلدىق مەرەيتويىندا شتاب باسشىسى رەتىندە دە قالانىڭ ءوسىپ-وركەندەۋىنە ءوز ۇلەسىمدى قوستىم. تۋريزم سالاسى بويىنشا دا قالانىڭ الەۋەتى مول جانە وبلىس ورتالىعى رەتىندە الەمدىك ارەنادا ەلىمىزدىڭ بەدەلىن, مارتەبەسىن كوتەرەتىنىنە سەنىمدىمىن.
تۇركىستانعا, وبلىستىڭ اتاۋىنا قاتىستى ەلباسى, نۇرسۇلتان نازارباەۆ تاعدىرلى جانە تاعىلىمدى شەشىم قابىلدادى.
سەرىكباي يبادۋللاەۆ,
وبلىستىق ءماسليحاتتىڭ
دەپۋتاتى, «قۇرمەت» وردەنىنىڭ يەگەرى
شىمكەنت
