مينيستر مينيسترلىكتىڭ قىزمەتى 3 ستراتەگيالىق باعىتقا نەگىزدەلگەنىن العا تارتىپ, ءبىرىنشى, مۇناي-گاز جانە مۇنايگاز-حيميا سالالارى, ەكىنشىسى, ەلەكتر ەنەرگەتيكا, كومىر جانە اتوم ەنەرگياسىن پايدالانۋ سالالارىن دامىتۋ, ءۇشىنشىسى, قورشاعان ورتانى قورعاۋدى جاقسارتۋ ەكەنىن جەتكىزدى.
سونىمەن قاتار ول گاز ونەركاسىبىن دامىتۋ جانە گازداندىرۋ ماسەلەسى مينيسترلىكتىڭ كۇن تارتىبىندەگى ماڭىزدى سالانىڭ ءبىرى ەكەنىن اتاپ ءوتتى.
«ەلدى گازداندىرۋ دەڭگەيى شامامەن 47,4 پايىزدى قۇرايدى. 1300-دەن استام ەلدى مەكەن گازعا قول جەتكىزدى. رەسپۋبليكالىق بيۋدجەتتەن گازداندىرۋعا جىل سايىن شامامەن 13 ملرد. تەڭگە بولىنۋدە. بۇگىندە, 16 ءوڭىردىڭ ىشىندە ورتالىق جانە سولتۇستىك وڭىرلەرى عانا گازداندىرۋ سحەماسىنان تەحنيكالىق شەكتەۋلەرگە بايلانىستى تىس قالىپ وتىر. ەلباسىنىڭ بەس الەۋمەتتىك باستاماسىنىڭ ارقاسىندا استانا, قاراعاندى جانە اقمولا وبلىستارىن گازداندىرۋ ماسەلەسى شەشىلۋدە. بيىل شىلدە ايىنىڭ باسىندا «سارىارقا» ماگيسترالدىق گاز قۇبىرىن سالتاناتتى اشۋ جوسپارلانۋدا. «قىزىلوردا-جەزقازعان-قاراعاندى-تەمىرتاۋ-استانا» باعىتى بويىنشا ءبىرىنشى كەزەڭ 2019 جىلدىڭ جەلتوقسان ايىنا دەيىن اياقتالادى. ءبىرىنشى كەزەڭىنىڭ شامامەن قۇنى 267 ملرد-تان استام تەڭگەنى قۇرادى. قاراعاندى, اقمولا وبلىستارى مەن استانا قالاسى اكىمدىكتەرى ماگيسترالدى گاز قۇبىرى مەن ايماقتىق جەلىلەر قۇرىلىسىنىڭ مەرزىمىن ەسكەرە وتىرىپ, ينفراقۇرىلىم قۇرىلىسى ءۇشىن جول كارتاسىن ازىرلەدى. ءبىرىنىشى كەزەڭدە گاز قۇبىرى بويىنشا 171 ەلدى مەكەن قامتىلىپ, 2,7 ميلليون ادام گازبەن قامتاماسىز ەتىلەدى. ەلوردا تۇرعىندارى ءۇشىن, ەڭ الدىمەن, گازدى «كوكتال-1,2», «جەلەزنودوروجنىي», «يۋگو-ۆوستوك» اۋداندارىنا, جانە ءبىرىنشى, ەكىنشى, ءۇشىنشى جىلۋ ەلەكتروستانتسيالارىنا جەتكىزۋ جوسپارلانۋدا. سۇيىتىلعان مۇناي گازىن باعالاۋ جانە ءبولۋ تەتىگىن جەتىلدىرۋ ءۇشىن ەلەكتروندى ساۋدا الاڭىن ەنگىزۋ جوسپارلاندى. قازىر زاڭنامالىق نورمالار ازىرلەندى. زاڭ جوباسى پارلامەنت سەناتىندا قارالۋدا», دەدى ق.بوزىمباەۆ.
مينيسترلىكتىڭ تاعى ءبىر نازارىن اۋدارۋداراتىن ماڭىزدى باعىتى مۇناي-گاز حيميا ونەركاسىبى ەكەنى بەلگىلى.
«جىلدان جىلعا بيتۋم ءوندىرىسىنىڭ كولەمى ارتىپ, ىشكى سۇرانىستى تولىق قامتاماسىز ەتۋدە. 2017 جىلى 731 مىڭ توننا بيتۋم ءوندىرىلدى, بۇل 2016 جىلمەن سالىستىرعاندا ەكى ەسەگە كوپ. 2018 جىلعا 750 مىڭ توننا بيتۋم شىعارۋ جوسپارلانۋدا. 500 مىڭ توننا پوليپروپيلەن جانە 1 250 000 توننا پوليەتيلەن وندىرەتىن ءىرى جوبالاردى جۇزەگە اسىرۋ جالعاسۋدا. پوليپروپيلەن جوباسىنىڭ قۇرىلىس كەزەڭى ىسكە اسىرىلۋدا. ال,پوليەتيلەن جوباسى بويىنشا ستراتەگيالىق ارىپتەسى - اۆستريالىق Borealis كومپانياسىمەن تەحنيكالىق-ەكونوميكالىق نەگىزدەمە ازىرلەنۋدە. ەكى جوباعا ينۆەستيتسيا كولەمى 9 ميلليارد دوللاردان اسادى. قۇرىلىس كەزەڭىندە شامامەن 10 مىڭ جۇمىس ورنى جانە جۇمىس بەرىلگەن كەزدە 1000-نان استام جۇمىس ورىندار پايدا بولادى. ستاتيستيكاعا سايكەس, ءبىزدىڭ پوليپروپيلەن يمپورتىمىز 22,4 مىڭ توننا, پوليەتيلەن - 122 مىڭ توننانى قۇرايدى. بۇگىندە ەلىمىزدە پوليمەردەن ءونىم شىعاراتىن شامامەن 44 ءىرى جانە ورتا كاسىپورىن بار. ولار جالپى العاندا 176 ملرد. تەڭگەنى قۇرايدى. بۇل كاسىپورىنداردا 5000-نان استام ادام جۇمىس ىستەيدى», دەدى ول.
سونىمەن قاتار, ەنەرگەتيكا ءمينيسترى قانات بوزىمباەۆ بىرىڭعاي ەلەكتر ەنەرگەتيكاسى جۇيەسىندەگى جاعداي تۇراقتى, بۇگىندە تۇتىنۋ كولەمىنىڭ ۇلعايۋىنان وندىرىلەتىن ەلەكتر ەنەرگياسىنىڭ كولەمى ارتىپ كەلە جاتقانىن جەتكىزدى.
«ەلەكتر ەنەرگيانى ءوندىرۋ كولەمى 46,4 ملرد. كۆت.ساع قۇرادى. بۇل 2017 جىلدىڭ سايكەس كەزەڭىنە قاراعاندا 7,7 پايىزدىق ء وسىم كورسەتتى. ەنەرگيا ءوندىرۋشى كومپانيالاردىڭ سىيىمدىلىق رەزەرۆىنىڭ بولۋى 2025 جىلعا دەيىن ەكونوميكانىڭ بولاشاق سۇرانىسىن ەلەكتر ەنەرگيامەن قامتۋعا مۇمكىندىك بەرەدى. ايتا كەتۋ كەرەك, ءبىز ەنەرگيا ءوندىرۋشى كومپانيالاردىڭ شەكتى تاريفتەرىن قايتا قاراۋ بويىنشا جۇمىستار جۇرگىزۋدەمىز. بۇگىنگى تاڭدا, شەكتى تاريفتەردى تومەندەتۋ بويىنشا ۇسىنىستار ۇكىمەت قاراۋىندا. 2018 جىلدىڭ سوڭىنا قاراي «نۇرلى جول» باعدارلاماسى بويىنشا, سولتۇستىك-شىعىس-وڭتۇستىك جوعارى ۆولتتى ەلەكتر بەرۋ جەلىسى قۇرىلىس جوباسىنىڭ ەكىنشى كەزەڭى اياقتالادى. اتالعان جوبا ەلدىڭ وڭتۇستىك وڭىرلەرىنىڭ ەلەكتر ساپاسىن جاقسارتادى. كومىر ونەركاسىبىندە دە ءوسىم بايقالادى. وسى جىلدىڭ 5 ايىندا 44,5 ملن. توننا كومىر ءوندىرىلدى. بۇل وتكەن جىلدىڭ سايكەس كەزەڭىمەن سالىستىرعاندا 4,5 پايىزدان جوعارى.2017 جىلى جوسپار كورسەتكىشىنەن 5,7 پايىزعا ارتىق ياعني 23,4 مىڭ توننا ۋران ءوندىرىلدى. ۋران ءوندىرۋدىڭ وسى جىلعى جوسپارى 21,6 مىڭ توننا كولەمىندە», دەدى ۆەدومستۆو باسشىسى.
راۋان قايدار,
«ەگەمەن قازاقستان»
