شاراعا ءبىلىم جانە عىلىم ۆيتسە-ءمينيسترى اسحات ايماعامبەتوۆ, «ۇلتتىق تەستىلەۋ ورتالىعى» رمقك ديرەكتورى رامازان الىمقۇلوۆ قاتىستى.
«جالپى ەلىمىزدىڭ بارلىق مەكتەپتەرىندە وقۋ جىلى ويداعىداي اياقتالدى دەپ ايتا الامىز. مەملەكەتتىك ەمتيحاندار تاپسىرىلىپ كۇنى كەشە عانا مەكتەپتىڭ بارلىق تۇلەكتەرى وزدەرىنىڭ اتتەستاتتارىن قولدارىنا الدى. 2017-2018 وقۋ جىلىندا 147 023 تۇلەك ورتا مەكتەپتى ءبىتىرىپ, 29 مامىر - 9 ماۋسىم ارالىعىندا قورىتىندى اتتەستاتسيانى تاپسىردى. ەلىمىزدىڭ 7 مىڭنان استام وقۋ وشاقتارىندا 2 ملن 900 مىڭ وقۋشى وقيدى. سونىمەن قاتار وسى جىلى «التىن بەلگى» توسبەلگىسىنە ۇمىتكەر 6 892 تۇلەكتىڭ 6 780-ءى (98,4 پايىزى) ءوز بىلىمدەرىن راستاپ, «التىن بەلگى» توسبەلگىسىن الدى. ۇزدىك اتتەستاتقا ۇمىتكەر 4966 ۇزدىك ءبىتىرۋشىنىڭ 4915-ءى (99 پايىزى) ءوز بىلىمدەرىن راستادى. بيىلعى وقۋ جىلىندا 1,2,7 سىنىپ وقۋشىلارى جاڭارتىلعان ءبىلىم جۇيەسىنىڭ وقۋلىقتارىمەن ءبىلىم الدى. وقۋشىلاردىڭ ءبىلىم ساپاسى جاقساردى. جالپى, وقۋ جىلى جاقسى كورسەتكىشتەرمەن, ءساتتى اياقتالدى», دەدى ءبىلىم جانە عىلىم ۆيتسە-ءمينيسترى اسحات ايماعامبەتوۆ.
سونىمەن قاتار ول ەلەكتروندى جۋرنال ەنگىزىلگەننەن كەيىن ەل ىشىندە قىزۋ تالقىلاۋ ورىن الىپ, كەيبىر ءبىلىم بەرۋ مەكەمەلەرىندە ەلەكتروندى تۇردە دە, قاعاز تۇرىندە دە ەكى ءتۇرلى جۇمىس جاساپ جاتىرمىز دەگەن شاعىمدار تۇسكەنىن جەتكىزىپ, مينيسترلىك تاراپىنان ماسەلەنى شەشۋ جۇمىستارى جاسالىپ جاتقانىن اتاپ ءوتتى.
«ەگەر مەكتەپتە ەلەكتروندى جۋرنال قولدانسا, وندا قاعاز كۇيىندە قولدانىلمايدى. ال, كەڭ جولاقتى ينتەرنەت جوق ەلدى مەكەندەر جۋرنالدىڭ قاعاز جۇزىندەگى نۇسقاسىن قولدانا بەرەدى. ايتا كەتەتىن تاعى ءبىر جايت, بيىل ۇبت 15-رەت وتكىزىلگەلى وتىر. وسى جىلدىڭ ىشىندە ەلىمىز دە, مەكتەپتەر دە تەستىلەۋ جۇيەسىن تولىق يگەردى. وسى جىلعى تەست تالاپتارىندا وزگەرىس جوق. بالالاردىڭ ويلاۋ جۇيەسىن دامىتۋ ءۇشىن تەست سۇراقتارىن 50 پايىزىن جاڭارتتىق», دەدى ول.
راۋان قايدار,
«ەگەمەن قازاقستان»
